" من فنان مرهف الحس لمجرم حرب مات بسببه 60 مليون إنسان .. تعرف على أدولف هتلر في دقايق "

 

" من فنان مرهف الحس لمجرم حرب مات بسببه 60 مليون إنسان .. تعرف على أدولف هتلر في دقايق "

من شخص مرهف الحس هدفه في الحياة 

إنه يشتغل رسام والعالم كله يتفرج على لوحه 

لديكتاتور هو الأشهر في العالم ، اتقتل بسببه 60 مليون بني آدم

أدولف ألويس هتلر .. الطفل اللي عاش طفولة قاسية جدًا 

ومراهقة متوترة ، ومر بأحلام كتير ضاعت منه 

الرسام .. النباتي .. الرقيق .. 

إزاي وصل إنه يكون رئيس دولة من أكبر دول العالم ؟ 

ازاي قدر يحتل 11 دولة هم الأكبر على مر التاريخ ؟ 

ازاي اتحولت شخصيته من حد بيرسم مناظر طبيعية 

لحد بيحرق كل حاجة حواليه ؟ 

ده اللي هنعرفه في حلقة النهارده من قصص وأحداث 

اتولد أدولف هتلر في 20 أبريل سنة 1889

في مدينة برونو في الإمبراطورية المجرية النمساوية 

وكان الإبن الرابع بين 6 أخوات ماتوا كلهم في سن صغير 

وما بقاش منهم غير أدولف وأخته الصغيرة باولا

هتلر عانى في طفولته من معاملة ابوه القاسية 

واللي كان أحيانًا كتير بيضربه بالكرباج هو وأمه 

وده اللي خلاه يكرهه طول حياته وبرغم كده 

 هتلر كان طالب متفوق جدًا لعند ما سقط في المدرسة

في الصف السادس وفضل بعده يتعسر في التعليم 

لعند ما ساب المدرسة الثانوية من غير ما ياخد الشهادة

وهو عنده 16 سنة .. كان في الوقت ده والده توفى 

وما كانش فيه مانع يمنعه من تحقيق حلمه كرسام 

وده اللي خلاه يسافر لفيينا لدراسة الفن 

وهو سايب وراه أول حب في حياته 

واللي وعدها انه هيرجع لها بعد دراسة الفن في فيينا ويتجوزها 

والحقيقة ان هتلر ما نفذش أي وعد من الوعود دي 

لأنه لا رجع قريته تاني ولا اتجوز البنت دي ولا حتى درس الفن 

لأن هتلر لما سافر فيينا قدم في اكاديمية الفنون 

واترفض مرتين من الالتحاق بيها … 

و مش عارفين لو كان اتقبل كان العالم اتغير ازاي  

ولكن ده اللي حصل وبعدها قرر هتلر انه يشتغل رسام هاوي 

يرسم في الشوارع ولكنه ما حققش اي نجاح 

سنة 1914 اتطوع هتلر في الجيش الألماني 

علشان يشارك في الحرب العالمية الاولى 

وخلال الحرب حصل على وسام الشجاعة مرتين 

ولكنه ما اترقاش في منصبه وفضل عريف 

والقادة بتوعه صرحوا انه معندش مهارات قيادية 

بعدها هتلر وقع في حبه الثاني (ميم رايتر) واتقدملها 

علشان يخطبها ولكنهم ما اتجوزوش .. وهو عنده ٢٣ سنة 

ومن بعدها ارتبط ببنت خالته (جيلي راوبال) 

واللي برضه بعد علاقة طويلة ما اتجوزوش 

والغريبة إنه التلات ستات اللي دخل حياتهم 

حاولوا الانتحار ومات اتنين منهم بالفعل 

سنة ١٩١٨ تقوم ثورة في ألمانيا في فترة الحرب العالمية الأولى

تجبر الإمبراطور الألماني على التخلي عن عرشه والهروب لهولندا 

وبناءًا عليه تنتهي الحرب العالمية الأولى باستسلام ألمانيا 

وده اللي كان سبب في صدمة كبيرة لهتلر اللي كان جندي ألماني طموح 

وبعدها بسنة واحدة في ١٩١٩ وقعت ألمانيا معاهدة فرساي 

واللي بتجبر ألمانيا على تقليل عدد الجيش 

ودفع تعويضات ضخمة للدول اللي اتدمرت بسبب الحرب

وبعد انتهاء الحرب اشتغل هتلر جاسوس لصالح 

مخابرات قوات الدفاع الوطني وكانت مهمته 

اختراق صفوف حزب العمال الألماني .. يعني يحضر 

اجتماعاتهم ويعرف أسرارهم ، ولكن على غير المتوقع 

يُعجب هتلر بأفكار الحزب اللي رايح يتجسس عليه 

فينقلب ضد المخابرات وينضم للحزب ده نفسه 

ولأنه كان مفوه وبيعرف يخطب في الناس

مع الوقت بقى من نجوم الحزب ده .. واللي كانت أفكاره 

متطرفة جدًا فكانوا بيعادوا الشيوعية والرأسمالية واليهودية 

وكان هدفه انشاء حكومه ديكتاتورية

وكانت أهداف الحزب ده اللي اتسمى بعدها بالحزب النازي 

اننا مش هندفع فلوس تعويضات الحرب العالمية الأولى

وهناخد الأرض اللي اتاخدت مننا في الحرب 

و قاموا بنشر افكارهم دي في جريدة خاصة بالحزب 

وروجوا بين الناس أنه الألمان غير اليهود 

هم احفاد سكان قارة أطلانتيس الأسطورية 

وانهم عرق نادر اتكتب عليه يحكم العالم إسمه الحزب الآري 

والحقيقة الأفكار دي عجبت الشعب الألماني 

اللي كان بيعاني من التضخم والبطالة بسبب دفع مبالغ للتعويضات 

بعدها هتلر انتخب كرئيس للحزب النازي وقام بتسليح أعضاء الحزب 

واللي وصل عددهم ل ٤٠٠ الف مسلح 

وبعدها يقوم بعمل انقلاب مسلح للسيطرة على الحكم ولكنه بيفشل

ويتحبس لمدة ٩ شهور بيكتب خلالهم كتابه المشهور (كفاحي) 

وبعد خروج هتلر من السجن وزيادة البطالة بين الشعب الألماني 

بيترشح الحزب النازي لانتخابات البرلمان سنة ١٩٣٢ ويكسب الانتخابات 

بعد محاولتين فاشلين ، وفي السنة دي هتلر بيقابل حب حياته 

اللي كملت معاه ١٤ سنة (إيفا براون) واللي كانت مساعدة مصوره الخاص 

وبعد صداقة استمرت لسنتين بيرتبطوا بشكل غير رسمي وبتكون ايفا 

من اقرب المقربين لهتلر ومصورته الخاصة 

والغريب إن إيفا نفسها حاولت الانتحار مرتين بعد ارتباطها بهتلر 

سنة ١٩٣٣ بيعين الرئيس الألماني (بول فون هندينبرج) 

هتلر كمستشار رئاسي يعني علشان يكسبه في صفه 

هو وحزبه اللي بيحميه ٤٠٠ ألف عسكري واللي الصحافة سميتهم (قوات العاصفة) 

لعند ما يحصل حدث يقلب كل الموازين وهو حريق البرلمان الألماني

في نفس السنة تحديدًا ٢٧ فبراير ١٩٣٣ فيقوم هتلر باصدار قرار

بتعليق كل الحريات المدنية والسياسية لمواجهة الفوضى 

من الآخر كده قانون طوارئ 

وبعدها بأقل من أسبوعين تنظم الحكومة انتخابات جديدة 

ويكسب فيها الحزب النازي بالأغلبية 

وفي نفس الشهر يقدم هتلر مشروع قانون 

هو اللي مكنه من السيطرة على ألمانيا بالكامل 

قانون التمكين واللي بيدي هتلر الحق في اصدار قوانين

بدون الرجوع للبرلمان وبقى هتلر يمتلك السلطتين التشريعية والتنفيذية

وبيصل بعدها عدد الميليشيات المسلحة للحزب النازي 

ل ٢ مليون مسلح في سنة ٣٤ 

وعلشان يقدر هتلر يكسب الميليشيات والجيش والبرلمان في صفه

قام بقتل قادة الميليشيات في ليلة واحدة

ووصل عددهم ل ٨٠٠ قتيل وبكده بقى هو الكل في الكل 

وبعدها بشهور بيموت الرئيس الألماني

وبيوافق البرلمان على دمج منصب المستشار 

بمنصب الرئيس وبقى هتلر رئيس الدولة رسمي 

وفي شهر أغسطس قدر بالدعاية إنه يقنع الشعب الألماني

إنه يصوتله كقائد أعلى للجيش كمان أو ما يعرف ب (الفهرر) 

وبعدها بأربع سنين يقرر هتلر السيطرة على العالم 

فيغزوا بولندا سنة ١٩٣٩ وخلال ٣ سنين 

يحتل أوروبا بالكامل ما عدا بريطانيا

وأجزاء من أفريقيا وجنوب أسيا وتلت مساحة الاتحاد السوڤيتي 

لعند ٢٧ أبريل ١٩٤٥ لما اخترقت القوات السوفيتية خطوط دفاع برلين 

فبينهار هتلر في اجتماع مع القادة بتوعه ويقول انه اتعرض للخيانة 

ويحلف انه هيضرب نفسه بالنار 

وفي نفس الليلة بيحتفل بزواجه أخيراً من ايفا براون حبيبة عمره 

وبعد ٤٨ ساعة بس وتحديداً يوم ٣٠ أبريل ١٩٤٥ 

بتلاقي القوات السوفيتية جثة هتلر ومراته وهما ميتين بسم السيانيد 

ولكن هتلر نفذ وعده وضرب نفسه بالنار قبل ما يموت بالسم 

بتقوم القوات السوفيتية بدفن هتلر ومراته وكلابه في مقبرة سرية 

في ولاية براندنبرج وبعدها بسنين في ١٩٧٠ 

بيرجعوا السوفييت ويفتحوا المقبرة ويحرقوا رفات هتلر 

وما يسيبوش الا اخر أثر منه .. جزء من جمجمته 

واللي اتعرضت لأول مرة سنة ٢٠٠٠ في متحف 

خاص بجهاز الأمن الفدرالي الروسي 

ومع ان اسم هتلر كان بيهز العالم حرفيًا ولكنه فشل في كل حاجة 

فشل يكون رسام معروف زي ما كان بيحلم 

وفشل انه يبني علاقة حب ناجحة أو بيت مستقر 

وكمان فشل في احتلال العالم .. 

بعد ما سمعت قصة أدولف هتلر .. تفتكر لو كان اتقبل 

في أكاديمية الفنون كان العالم دخل حرب عالمية تانية ؟

ياريت تقولنا رأيك في الكومنتات

وما تنساش تاخدلك لفة في المقالات اللي فاتت.. هتنبسط