البصق على العروسة وضرب العريس .. تعرف على أغرب عادات الزواج في العالم ..

 " أغرب عادات الزواج في العالم "

لو داخل على جواز ومتكدر بسبب موضوع القايمة 

وشايف إن عادات الجواز في مصر ظالماك ؟ 

فأحب أقولك إنك لازم تقوم تصلي ركعتين شكر لله 

بسبب إنك مش موجود في دولة من الدول اللي هنتكلم عليها دلوقت

واللي فيها أغرب عادات الزواج في العالم .. 

ومادام أغرب فهنروح على طول لشرق آسيا ، وهنبدأ بكوريا الجنوبية

واللي عندهم عادة من أغرب عادات الزواج 

وهي ضرب قدمين العريس ، فاكر زمان كان فيها حاجة اسمها فلكة 

بيربطوا عليها العيل الخايب ويمدوه .. 

أهوه هو ده اللي بيعملوه بالظبط ، وإن قرايب وأصحاب العريس 

بيسيبوا الفرح الشغال و الدي چيه والبوفيه والدنيا خربانة 

ويربطوا العريس من رجليه ويقلعوه الجزمة ويمدوه على رجليه بعصاية 

وأحيانا بسمكة .. قال ايه كده بيختبروا قوة تحمله 

والحقيقة إن ده عقاب مناسب لشخص عاقل مقبل على الجواز 

ما يعرفوش انه بعد كده هيعتمد على نفسه ويمد نفسه بنفسه 

ومن كوريا الجنوبية نطير لكينيا وتحديدًا شعب الماساي 

واللي عندهم عادة غريبة جدًا ، قبل ما يسلم ابو العروسة 

بنته للعريس لازم لا مؤاخذة يبصق على رأسها 

ده ايه القرف ده .. طب والله ما واخدها 

وبيقولوا انه التفة دي هتجلبلهم الحظ .. يا اخي كان القرد نفع نفسه

ولما بنقول عادات غريبة دايمًا بنتخيل قبائل وأمم مش متحضرة 

بس على العكس تمامًا هنلاقي دولة من أقوى دول العالم 

وعندهم عادة من أغرب عادات الجواز ، ألمانيا 

واللي عندهم عادة إنهم يتجمعوا بعد الفرح في بيت العرسان 

وينزلوا تكسير في الأطباق والأواني الفخارية ، وبرضه ده لجلب الحظ 

بقى انا ابقى بتخانق وبتفاوض بقالي سنة علشان أثبت إن النيش ملوش لازمة 

وفي الآخر لما اجيبه تكسروه ؟ طبعاً هو انتوا فارقلكوا ما انا اللي ماضي 

ولازم بعد ما يدغدغوا الدنيا يقف العريس والعروسة وينضفوا التكسير ده كله 

علشان تبقى بداية تعاونهم مع بعض 

ومن ألمانيا للصين اللي دايمًا بتبهرنا بعاداتها الغريبة 

واللي هنلاقي عندهم عادة من أغرب عادات الجواز ، واللي بيسموها طقوس البكاء 

وده طقس لازم تعمله العروسة قبل شهر من فرحها 

إنها تقعد كل يوم تعيط لمدة ساعة .. ومش لوحدها 

لأ .. بعد ١٠ ايام تنضملها أمها وبعد كمان ١٠ أيام تانيين 

تنضم الجدة لو كان فيها الروح .. ويقلبوها مناحة 

مستعجلين على ايه ؟ ده لسه العياط جاي .. مفيش أكتر منه 

ومن الصين لشعب تيدونغ في ماليزيا وجزيرة بورينو الاندونيسية

واللي عندهم طقس يجيب حصو ع الكلى 

فبيشترطوا على العرسان ما يدخلوش الحمام لمدة ٣ أيام بعد الفرح 

وده بيتم تحت حراسة مشددة .. اه مش سايبة هي 

وياكلوا ويشربوا كميات صغيرة جدًا 

وإلا هيحصلهم زي ما حصل لعبد الشكور

ولو سألتني عبد الشكور مين .. ده واحد صاحبي ما تعرفوش 

بعد ما سمعت عن أغرب عادات الزواج في العالم

عايزك تروح تحب على ايه حماك وتمضي ع القايمة وانت ساكت 

وتحمد ربنا على ما بلاك .. ولو عندك موقف غريب 

حصل في فرح قولنا عليه في الكومنتات

وما تنساش تاخدلك لفة في المقالات اللي فاتت

هتنبسط