أعظم الأخطاء عبر التاريخ

 

أعظم الأخطاء عبر التاريخ

صدق اللي قال غلطة الشاطر بألف .. 

كام مرة حصلك وغلطت غلطة تبان صغيرة 

بس سابت أثر كبير جدًا .. وغيرت في حياتك 

أو في حياة اللي حواليك .. 

أكيد حصلك قبل كده قلت كلمة وقت غضب 

أو اتصرفت تصرف وقت نرفزة وصلك لتغيير تام في مسار حياتك

في حكاية النهارده .. هنتعرف على 

أعظم الأخطاء على مر التاريخ 

 

الخطأ الأول :

باع المزارع جورج هاريشن الجنوب أفريقي مزرعته

 إلى شركة تنقيب بعشرة جنيه فقط لعدم صلاحيتها للزراعة ،

تخيل يا مؤمن عشرة جنيه بس !

 ولما بدأت الشركة في استغلالها ،

 اكتشفت بها أكبر منجم للذهب في جنوب افريقيا بس ؟

لا في العالم كله ، وكل ده العشرة جنيه

 واللي بعدها بقى المنجم ده مسؤول عن 70% 

من إنتاج الذهب في العالم

طبعاً مش هقولك بقى على حالة جورج هاريش بعد

ما اكتشف إن كل الدهب ده كان تحت أرضه ..

بس هخليك تتخيل اللي حصله لوحدك 

الخطأ الثاني :

في إحدى ليالي سنة 1696م في لندن عاصمة إنجلترا

دخل ينام زي كل ليلة عادي جدًا ، الخباز البريطاني جوفينز ، 

ولكنه نسي شعلة صغيرة في فرنه مشتعلة ، طول الليل 

شعلة صغيرة جدًا جدًا ، اتنست لليلة واحدة بس 

غلطة وناس كتير بتقع فيها ولكن أدت 

 الغلطة الصغيرة دي إلى اشتعال منزله ثم منزل جيرانه

 ثم الحارات المجاورة ، وبس كده ؟! … لأ 

الشعلة دي كانت سبب في حرق نص مدينة لندن

وأدت لموت الآلاف من سكانها ، 

والحادث ده اللي اتسمى بعد كده “بالحريق الكبير” 

الغريب في الأمر بقى إن جوفينز نفسه اللي ولع في نص لندن

ما حصلوش أي حاجة ، وطلع منها زي الشعرة م العجين 

 

الخطأ الثالث :

في عام 1347م في الصين

دخلت بعض الفئران إلى ثلاث سفن إيطالية كانت راسية في الصين ،

وسافروا مع السفينة من الصين لايطاليا

 ولما وصلت إلى ميناء مسينا الإيطالي خرجت منها ، 

وعاشت حياتها عادي بين البشر زي أي فيران عادي يعني .. 

بس الفيران دول ما كانوش فيران عادية 

لأن الفيران دول كانوا السبب في نشر مرض الطاعون 

واللي كان مخلص بالفعل على خُمس سكان الصين

واللي خلال أيام قليلة إنتشر في المدينة كلها ومنها لكامل إيطاليا .

 ومن إيطاليا لقارة أوروبا بالكامل ومنها لباقي العالم

ووصلت ضحاياه من ٧٥ مليون ل ٢٠٠ مليون بني آدم 

كل ده بسبب شوية فيران 

 

الخطأ الرابع :

في ربيع 1168 دخل هنري الثاني ملك إنجلترا

 في نقاش حاد مع البابا ألكسندر الثالث ، بسبب الخلاف بينهما بخصوص

 توماس بيكيت اللي عينته الكنيسة في روما رئيس أساقفة في بريطانيا

واللي كانت في الوقت ده كاثوليكية 

وكرد انتقامي حرّم البابا تزاوج البريطانيين

 الأمر ده اللي وقع الملك في حرج قدام شعبه ، 

وللخروج من المأزق ده طلب هنري الثاني 

من ملوك الطوائف في الأندلس إرسال بعض المشايخ

 علشان تتحول بريطانيا للإسلام نكاية بالفاتيكان !

وهدد بقبول الدعوات المتكررة اللي كان بيبعتها له الأمير نور الدين زنكي

 أمير حلب واللي كان بيتواصل مع هنري الثاني ويدعوه للإسلام

إلاّ أن جماعتنا تقاعسوا عن تنفيذ الطلب وحسوا انه مجرد دعابة مش أكتر

لعند ما وصل الخبر إلى البابا ، فأصلح الخلاف ورفع قرار التحريم

 ( ولك أن تتصور إسلام بريطانيا، ثم ظهورها كإمبراطورية لا تغيب عنها الشمس ) !!

الخطأ الخامس :

وفي فرصة مشابهة سنحت للمسلمين ،

في أكتوبر ٧٣٢ خلال معركة بلاط الشهداء (قرب بواتييه في فرنسا) 

ففي هذه المعركة كرر المسلمون نفس الخطأ اللي عملوا أوائل المسلمين

 في معركة أحد ؛ وقبل سيطرتهم التامة على المعركة

 تراجعوا لحماية غنائمهم من جيش شارلمان ، 

وده اللي عرضهم للهزيمة ، والخطأ ده كان السبب

 في توقف الزحف الإسلامي على كامل أوروبا .

 يقول أحد المؤرخين الإنجليز :

“لو لم يهزم العرب في بواتييه ، لرأيتم القرآن يُتلى ويُفسر في كامبريدج وأكسفورد” 

بعد ما سمعت أعظم أخطاء التاريخ ، تفتكر بقى لو خطأ واحد 

بس من دول كان أخد طريق مختلف 

كان شكل العالم هيتغير بشكل كبير جدًا 

وبكده تكون انتهت حكايتنا النهارده

ولو تعرف عن أخطاء مشابهة ياريت تسيبها في الكومنتات 

واستنونا في حكاية جديدة