"  أغرب العبادات في العالم !  "

العبادة كلمة قديمة جدًا ، وعمرها من عمر البشرية نفسها 

 والعبادات والأديان رابط بيربط بين البشر 

وبين قوة إلهية أكبر مننا بندين ليها بوجودنا 

والدين والعبادة دايمًا مرتبطين بالأخلاق 

وعلاقة البشر بعضهم ببعض وبالكون نفسه 

والديانات بتختلف حول العالم بشكل كبير ومتنوع 

واللي أغلبه بيعتنق الديانات السماوية 

اليهودية والمسيحية والإسلام ، لكن على النقيض 

فيه ديانات تانية كتير مختلفة وغريبة 

ومن غرابتها مش هتصدق إنها موجودة 

ومش هتتخيل إن ممكن يكون فيه انسان عاقل 

يرتبط بيها ويقدسها .. ولكن دي الحقيقة 

من أغرب الديانات والعبادات في العالم ، عبادة الفئران 

أيوه الفيران دي اللي احنا رايحين جايين 

نعملها في مصايد ونضرب فيها بالشبشب 

فيه بشر بيعبدوها ومش بس كده .. لأ 

دول عاملين ليها معبد مخصوص كمان  

والكلام ده حاصل فين بقى ؟ في الهند بلد الألف دين 

وتحديدًا في مدينة بيكانير بولاية راجستان 

واللي عندهم معبد لعبادة الفئران اسمه (كارني ماتا) 

على إسم واحدة ست عاشت من ٥٠٠ سنة 

ويقال انها كانت بتحاول ترجع أرواح الاطفال الموتى 

و بيعتقد معتنقي الديانة دي ان الفيران بتتجسد فيهم 

المعبد ده فيه ٢٠ ألف فار بيقدسوهم ويحترموهم ويقدمولهم القرابين 

وبيأكلوهم أحلى أكل ومدلعينهم آخر دلع

والغريبة انه على بعد كام كيلو بس في مدينة (آسام)

الفيران تعتبر أكلة رسمية وبتتباع في الأسواق 

تاني أغرب عبادة موجودة على الأرض

عبادة سكان الفضاء اللي البشر كلهم مختلفين 

إن كانوا موجودين ولا لأ .. فيه ناس متأكدة 

انهم موجودين وبيعبدوهم وعدد الناس دي 

70 ألف بني آدم ، عبادة سكان الفضاء 

أو العبادة الرايلية اتأسست سنة 74 على يد فرنسي 

اسمه رايل واللي قال انه شاف الكائنات الفضائية

وتواصلوا معاه وشرحوله أصل الإنسان ومصيره 

وقعدوا معاه 6 جلسات في نهايتهم

عينوه رسول ليهم ووسيط بينهم وبين البشر 

وقال في مؤتمر عقده سنة 74 في باريس 

إن الكائنات الفضائية هتنزل فلسطين سنة 2025

وهيوصلوا البشر للسلام ، والمؤتمر ده حضره 2000 فرد

العبادة الثالثة الأغرب في العالم 

عبادة الموت الرحيم أو (الوثاناسيا) 

واللي أسسها أمريكي اسمه كريس كوردا 

والديانة دي بتهدف لقتل النفس للحفاظ على كوكب الأرض 

وتوازنه بسبب الزيادة السكانية الكبيرة 

ومعتنقي الديانة دي بيشجعوا الناس 

اللي مالهومش تأثير كبير في الحياة 

إنهم ينتحروا لمصلحة البشرية وكمان بيشجعوا على الإجهاض 

وبيدعوا للزواج بدون انجاب .. آدي أخرة الحريات 

كمان من العبادات الأغرب في العالم 

عبادة الفودو أو عبادة الثعابين ، اللهم احفظنا 

والعبادة دي بتنتشر بكثرة في مدينة بينين في نيجيريا

وبيقصدوا بيها تمجيد أحد أجداد بينين ومؤسس المدينة 

وبيدّعوا ان الثعابين بتحمل البركة 

وإن المياه اللي في أجسامها هي نفسها اللي موجودة في المعابد

والغريب إنك كمعتنق للديانة دي 

تقدر تجمع بينها وبين أي ديانة تانية بسهولة 

سواء سماوية أو وثنية أو اللي انت شايفه حضرتك

العبادة سر كبير ورابط بين البشر وبين الله 

خالق كل شيء .. والهدف دايمًا من العبادات 

الوصول للسلام النفسي والاجتماعي وتقنين المعاملات 

بينا وبين بعض بالاحسان واللين ، 

وكمان تحسين رؤيتنا للعالم وأي حاجة موجودة فيه 

من أشجار لأنهار لحيوانات وغيرها .. 

والغرض منه اننا نعيش حياة أفضل 

وتقديس بعض الفئات لكائنات مختلفة 

مع احترامنا لكل الحريات ولكن هو شيء غير منطقي تمامًا 

وغير عقلاني .. انت بقى بعد ما سمعت عن أغرب العبادات في العالم

تفتكر عبادات زي الجنيه والمصلحة والسبوبة 

نقدر نحطها في قايمة أغرب العبادات ؟