" يوم الأخ العالمي - مشاهير اخوات حبيناهم "

صدق اللي قال .. اللي له ضهر ما ينضربش على بطنه 

والنهارده يوم الضهر والسند العالمي 

يوم الأخ ٢٤ / ٥ 

أنا اتربيت على كتافك و لحم كتافي من خيرك 

يا ابن دمي .. يا ابن أمي .. يا اللي يا ما شلت همي 

انت ابويا .. وانت اخويا .. وانت اغلى حاجة عندي

ودور الأخ في حياتنا مش محتاج كلام 

ومهما نحاول نتكلم عنه كتير ما يكفيش 

ومهما نعمل عنه تقارير .. هنرجع ونقول الأخ محتاج التقدير 

وعلشان كده لازم نحتفل بيوم الأخ العالمي 

على طريقتنا الخاصة ..

 وأشهر أخوات في تاريخ السينما المصرية

طبعًا ما نقدرش ننسى الثنائي الجميل 

أستاذنا الكبير سمير غانم ومراته دلال عبد العزيز

واللي راحوا بس سابولنا أحلى أختين في الدنيا 

دنيا وإيمي سمير غانم ، واللي بمجرد ما بيطلوا علينا

بأعمالهم بنحس إن الدنيا بتضحك لينا 

وفعلاً .. اللي خلف ما ماتش  

كمان ما نقدرش نفوت الفرصة دي من غير ما نذكر

أوسم أخين في تاريخ السينما المصرية

حسين ومصطفى فهمي ..

برنسات وچانات السينما المصرية 

واللي قدمولنا أدوار كتير عايشة معانا وهتعيش لسنين كتير 

كمان لو رجعنا لورا شوية .. هنلاقي أختين 

واحدة فيهم تربعت على قمة النجومية في السينما 

والتانية ياما حركت احساسنا بصوتها الدافي .. 

سعاد حسني ونجاة الصغيرة 

كمان ما نقدرش ننسى موهبتين كبار جدًا 

أثروا في حياة كل مصري وعربي 

ليلى مراد اللي صوتها وصل للعالمية 

وأخوها منير مراد الفنان الشامل والملحن العبقري

كمان من الأخوات اللي كان ليهم بصمة كبيرة 

بأعمال فرقت مع الجمهور .. بوسي ونورا 

وغيرهم كتير ..

زي النجم أحمد مكي وأخته إيناس مكي 

والجميلة مريم فخر الدين وأخوها يوسف فخر الدين 

ونجوم كتير جدًا يمكن كان سبب في تألقهم 

إنهم ما كانوش لوحدهم .. كانوا اخوات 

كمان من دور الأخوات اللي ما نقدرش ننكره 

لما نلاقي نجم مكسر الدنيا ، لازم تعرف إن وراه إدارة 

بتخاف عليه وبتدير مشروعه الفني بشكل صحيح

زي النجم تامر حسني ومدير أعماله حسام حسني 

كمان النجم محمد رمضان ومدير أعماله محمود رمضان 

وغيرهم كتير جدًا .. نجحوا واستمروا على النجاح ده

بسبب وجود أخواتهم جنبهم .. ربنا يديمها عليهم نعمة    

كمان من أبرز قصص الوفاء بين الأخوات 

مسيرة توأم الكرة المصرية .. حسام حسن وإبراهيم حسن 

واللي كان من المعروف عنهم إنهم ما بيقبلوش أي عروض

لأي نادي إلا لو كانوا مع بعض

وكان ده شرط أساسي في عقودهم 

كلنا متأكدين من أهمية دور الأخ في حياتنا 

بس أحيانًا مناسبة زي اليوم العالمي للأخ 

بتخلينا نفكر في وجوده في حياتنا 

ونفتكرله كل الحلو .. وننسى الوحش 

علشان مفيش حاجة وحشة بين الاخوات .. 

دلوقت ، ياريت تعمل مينشن لأخوك في الكومنتات 

وتقوله قد إيه هو مهم في حياتك