" دراكولا طلع حقيقي ! "

كام مرة ما عرفتش تنام بسبب فيلم مصاصين دماء 

وخفت وانت راجع بليل في شارعكوا الضلمة 

حد منهم يطلع عليك يثبتك ويمص دمك 

وخصوصاً زعيمهم دراكولا ده اللي ما ببيتفاهمش 

بس دايمًا كنت بتطمن نفسك وتقول ده فيلم ومفيش حاجة من الحاجات دي 

بس في الحقيقة إنت غلطان ، لأن العلم رصد حالات كتير لبشر مصاصين دماء 

ودراكولا نفسه طلع شخص حقيقي 

كلنا نسمع عن شخصية دراكولا .. مصاص الدماء 

اللي بيعيش في قصر كبير وبينام بالنهار جوه تابوت 

بعيد عن الشمس ، وبيصحى بليل يصطاد ضحاياه 

وبيتغذى على دمهم .. دراكولا شخصية برزت في أفلام كتير جدًا 

بس هل وراها شخص حقيقي ؟ 

شخصية دراكولا هي لمصاص دماء أسطوري،

 اختلقها مؤلف إسمه برام ستوكر في روايته اللي نشرت عام 1897

و اللي بتحمل الاسم نفسه (دراكولا)، وشكلت الرواية دي

 مصدر إلهام لعدد كبير من أفلام الرعب، والعروض التلفزيونية،

 وحكايات مرعبة كتيرة ، عن مصاصين الدماء.

وعلى الرغم من أن دراكولا هو مجرد شخصية خيالية ، 

إلا أن الكاتب ستوكر استوحى الشخصية دي من إنسان حقيقي 

وهي شخصية فلاد الثالث أمير والاشيا ، 

واللي اتشهر بإسم فلاد المخوزِق .

ولد فلاد الثالث عام 1431 ، في مدينة ترانسيلفانيا 

وهي مركز رومانيا واللي لو لاحظنا هنلاقي إن شخصية دراكولا 

بتعيش في مدينة ترانسيلفانيا في قلعة بران ، واللي بيسموها (قلعة دراكولا) 

 واللي بتقع فوق قمة جبل في منطقة ضبابية وشكلها مخيف جدًا

وقصة إسم دراكولا بترجع في الأساس للقب إكتسبه أبو فلاد الثالث

فلاد الثاني واللي تم تعيينه قائد لفرسان أخوية التنين

وأخوية التنين دي فصيل سري

 إتعمل للدفاع عن الديانة المسيحية واتعين والد فلاد قائد لها

في نفس سنة ميلاد فلاد الثالث سنة ١٤٣١ 

واللي بعد تعيينه كقائد لأخوية التنين بقى لقبه (دراكول)

  واللقب ده جه من الكلمة الرومانية دراك، واللي معناها تنين،

وطبعًا ده خلى إبنه فلاد الثالث يُعرف بـ (ابن دراكول)، أو بـ (دراكوليا)

 في اليونانية القديمة ، واللي بعد كده بقى دراكولا 

والهدف من أخوية التنين كان واضح

 من البداية وهو هزيمة الإمبراطورية العثمانية

واللي كانت مسيطرة في الوقت ده على أراضي كبيرة

تابعة للدولة الرومانية ، وبتنتشر في العالم بسرعة تخوف

وكانوا خايفين انها ممكن تقضي على الديانة المسيحية

فكانوا دايمًا في حالة من التفاوض 

على الأراضي اللي بتملكها الدولة الرومانية 

والأراضي اللي عايزة تقتحمها الدولة العثمانية 

وفي ليلة تم استدعاء فلاد الأب إلى اجتماع دبلوماسي

مع السلطان العثماني مراد الثاني سنة  1442 م

 وخد فلاد الأب معاه أولاده الاتنين فلاد الثالث ، ورادو 

 إلا إن الاجتماع ده كان في الحقيقة فخ ،

 واعتقلوا رجال السلطان مراد الثاني فلاد وأولاده 

 وبعد كده أطلقوا سراح فلاد الأب، بشرط أنه يترك أولاده 

عند العثمانيين يتربوا في قصر السلطان مراد

علشان يضمن السلطان العثماني ولاء فلاد الثاني 

وانه يساعد العثمانيين في حربهم ضد هنغاريا

وطوال فترة الأسر اللي طالت أكتر من ١٠ سنين 

علم العثمانيين فلاد الفروسية والتاريخ والعلوم 

وأصبح بعدها فارس ومحارب محترف 

وفي الوقت اللي كان فلاد وأخوه رادو في الأسر، 

كان والدهم فلاد الأب بيناضل علشان

 يفضل في منصبه كقائد الجيش، وحاكم ولاشيا

وكان بيدخل حروب كتير ضد هنغاريا 

لعند ما تلقى هزيمة و اتخلع على يد النبلاء المحليين سنة 1447 م 

وبعد كده تم قتله في المستنقعات بالقرب من منطقة بالتيني 

وكان في الوقت ده فلاد الثالث بقى فارس وشاب قوي 

بدأ فلاد بحملة لاستعادة منصب والده،

 من الحاكم الجديد فلاديسلاف الثاني، 

واعتمد في حملته دي لاستعادة العرش 

على الدعم العسكري للحكام العثمانيين 

اللي كان كون معاهم صلة صداقة قوية بعد ما عاش وسطهم مدة طويلة

ونجح بالفعل بإستعادة العرش ورجع يحكم من تاني ولاشيا

ولكن لمدة صغيرة جدًا تقريبًا شهرين

بعدهم رجع فلاديسلاف الثاني لغزو ولاشيا واخد حكمها

وهرب فلاد الثالث .. وفضل مختفي ومقطوعة أخباره 

من سنة ١٤٤٨ لسنة ١٤٥٦ ومحدش يعرف هو طول الوقت ده 

قابل مين وعمل ايه 

بعد هروب فلاد الثالث لمدة سبع سنين تقريبًا 

رجع تاني بجيش كبير ولكن المرة دي مش متحالف مع العثمانيين 

لا ده تحالف مع حاكم هنغاريا نفسه .. 

وبالفعل قدر يسيطر على الحكم في ولاشيا

بس الأمير فلاد اللي هرب وهو أمير ومتربي تربية نبلاء

رجع شخص مختلف تمامًا.. شخص بيعشق الدم والقتل 

وبدأ بقتل النبلاء المحليين اللي كانوا السبب في عزل والده 

وكانت طريقة القتل اللي بيتبعها يمكن يكون أول واحد نفذها 

وهي الخوزقة .. وعرف عن فلاد في الفترة دي إنه كان بيشرب من دم 

ضحاياه واللي خانوا والده .. 

وأول حدث يكسبه لقب المخوزق لما قام فلاد بدعوة المئات من النبلاء

 إلى مأدبة طعام و أمر بطعن ضيوفه، وخزق أجسادهم، بوضعها فوق المسامير

في الوقت ده وبعد فتح القسطنطينية على يد محمد الفاتح

واللي كان متربي مع فلاد .. بقى عند الدولة العثمانية الفرصة 

انها تجتاح أوروبا بالكامل .. 

ولما سمعوا عن ظلم فلاد وانه ماشي يقتل في خلق الله

وعاداته الغريبة زي شرب الدم وغيره .. 

بعت محمد الفاتح له جيش علشان يدعوه للإسلام وإلا يُقتل

واللي للأسف الجيش ده بالكامل فلاد خوزقه ..

 جيش بالكامل لما محمد الفاتح راح بجيش أكبر 

لما عرف اللي حصل لجيشه لقى كل أغصان شجر والاشيا 

بتحمل جثث جيش المسلمين اللي راحوا قبله 

في أغسطس عام 1462م، تم نفي فلاد إلى هنغاريا

 بعد هزيمته على يد محمد الفاتح 

وولى محمد الفاتح رادو أخو فلاد أمير لولاشيا 

ولكن بعد وفاة رادو قدر فلاد يرجع تاني بجيش ويغزو والاشيا

ولكن المرة دي قُتل بنفس الطريقة اللي كان بيقتل بيها الناس 

ولعند النهارده فيه جدل كبير حول مكان قبره ،

اتقال بأنه تم دفنه في دير في سناغوف ، في الطرف الشمالي لمدينة بوخاريست

واتقال انه قد دفن في دير كومانا بين بوخاريست ودانوب

المهم إنه مات واندفن .. ولا لأ ؟ مش متأكدين 

يقال إن فلاد أو دراكولا كان متعاهد مع الشيطان نفسه 

وسبب كل العادات دي من شرب الدم وغيره كانت مجرد طقوس بيأديها لعبادة الشيطان 

وبرضه احنا مش متأكدين وخصوصاً إنه اختفى مدة ٧ سنين 

ومحدش يعرف كان فين ولا بيعمل ايه ؟ 

دلوقت بعد ما عرفت إن دراكولا طلع حقيقي .. تفتكر هتتفرج تاني

على أفلام مصاصين دماء ؟ ياريت تقولنا رأيك في الكومنتات

وما تنساش تاخدلك لفة في المقالات اللي فاتت

هتنبسط