" سيكولوجية مشجع كرة القدم "

 

"  سيكولوجية مشجع كرة القدم  "

جوزك قاعد بفانلة الأهلي في الصالة بقاله ساعتين 

ومركز مع الاستديو التحليلي .. ده معناه 

إنه مستني ماتش مهم للنادي اللي بيحبه 

فقبل ما تبدأي تحضري شنطتك علشان تسيبي البيت 

بدل ما تقفي على الطلاق إنتي وجوزك 

بسبب الماتش ده والماتشات الكتير الجاية ؟ 

فأنا جاي اقولك اتفرجي على الحلقة دي 

علشان جهزنالك انتي وجوزك أهم النصايح 

الواجب اتباعها وقت الماتشات 

شهر يونيو الحالي فيه ماتشات مهمة جدًا 

من ضمنهم نهائي أبطال أفريقيا بين الأهلي المصري والوداد المغربي 

يعني لو جوزك أهلاوي وبيشجع أي فرقة تانية

من الفرق الاوروبية اللي هتلعب خلال الشهر ده 

فهيفضل طول الشهر ده متوتر والجو هيبقى مكهرب في البيت

طبعًا هتسألي سؤال مهم .. وليه كل ده ؟ دي مجرد كورة 

صح بس ده بالنسبة لك .. بالنسبة له الموضوع مختلف تمامًا

بسبب ما يسمى بالإنتماء والضغط العاطفي 

ودي حالة بتحصل للناس المهتمين بالكورة وبيشجعوا نادي بعينه 

ومتابعين ماتشاته طول الوقت لعند ما بقى النادي ده جزء 

من تكوينه النفسي وبيدافع عنه أكنه بيدافع عن حد من عيلته 

وده السبب اللي بيخلي أعمال شغب وعنف كتير

تظهر وقت الماتشات ، وحالة الضغط العاطفي دي 

بتسبب زيادة ضربات القلب وارتفاع ضغط الدم 

بسبب التوتر وتضارب المشاعر اللي بيستمر لمدة ٩٠ دقيقة 

بين حزن وفرح وحب وكره وتعصب وحسرة 

فبالتالي الموضوع مش صغير أبدًا 

الموضوع راجع لحالة طبية معروفة

لدرجة إن حالات الأزمات القلبية زادت الضعف

وقت ماتشات كاس العالم 

فانتي كزوجة بتحبي جوزك قدامك حل من اتنين ، يا إما تسيبيه ينزل 

يتفرج على الماتش في القهوة .. وتقصري الشر 

وتتابعي الاخبار من بعيد علشان تعرفي النتايج 

ففي حالة الفوز اعملي فرح في البيت 

وفي حالة الهزيمة لا قدر الله اقطعي النفس وشوفي حتة تداري فيها 

يا إما توفريله الجو المناسب في البيت 

علشان يفضل قاعد معاكي ويتفرج على الماتشات دي تحت عينك 

ولازم تعرفي إن الرجالة بتلجأ لمشاهدة كرة القدم 

بالحماس والاهتمام ده بسبب إن الماتشات 

بتحققلهم الإحساس بالنشوة والقوة 

اللي بيحس بيها اللاعب نفسه .. بيشوف حلمه فيه 

وبيحس انه مكانه .. وإنه ممكن يكون قادر يأدي أفضل منه كمان 

والحاجات دي بيفتقدها في الواقع 

وده بيساعده على القضاء على حالة الفراغ 

وسبيل يهرب بيه من العالم الواقعي بمشاكله 

وهمومه مسؤولياته .. وبيصل اهتمامه 

بالماتشات انه يضحي بوقته وأحيانًا علاقاته الإجتماعية 

في سبيل الحصول على سعادة افتراضية 

وشوية دوبامين مفتقدهم في حياته اليومية 

ده غير انه كمشجع كورة عنده رغبة في تكوين 

صداقات جديدة وانه يلاقي حياة اجتماعية 

صحاب بيشجعوا نفس النادي وعندهم نفس الانتماء 

وما تنسيش إن حالة التوتر العاطفي دي 

بتسبب اضطراب في النوم واحيانًا بتؤدي للإكتئاب 

فمش هنبقى احنا والزمن عليه ..  

لازم نراعي إن حبك لجوزك معناه تحبي كل حاجة بيحبها 

وإن كورة القدم ممكن تكون المتنفس الوحيد له من كل مشاكل الحياة 

ففرجيه معاكي على الحلقة دي