" كيف تصبح مليونير بدون معلم ؟ "

مليونير .. مليونير .. بكره هبقى مليونير 

هو مش بكره بكره يعني .. بس ربنا 

يدينا ويديك طولة العمر ، وخلي أملك فيه كبير 

وبما إن المليون رقم زيه زي أي رقم 

فخليك معانا لآخر الحلقة علشان تعرف 

إزاي تبقى مليونير ومحتاج وقت قد إيه ؟

لو انت مواطن قطري فبمعدلات الرواتب هناك 

موضوعك بسيط خالص .. بالحسابات والأرقام

تقدر تحوش مليون دولار .. دولار ؟

داهية لا تكونوا فاكريني بتكلم عن المليون جنيه ؟

تقدر تحوش مليون دولار خلال ٢١ سنة و ٣ شهور 

ودي مسألة بسيطة ، حتى أقل من عقوبة المؤبد 

ومفيش اسرع من الأيام .. اللي كده كده هتعدي 

أما بقى لو انت مواطن إماراتي فما بعدناش كتير

انت محتاج ٢٣ سنة و ٩ شهور بس 

يعني لو انت متخرج حالاً في سن ٢١ سنة 

فبنصحك تبدأ تحويش من دلوقت 

لعند ما يبقى عندك ٤٤ .. ٤٥ سنة بالكتير 

وده معقول .. يعني تقدر تتمتع بفلوسك وبشبابك مع بعض

إنما بقى لو انت من سلطنة عمان 

أيوه البلد دي اللي ما نعرفش عنها حاجة 

وعايشين في حالهم .. فأنت محتاج ٣٨ سنة ونص

فأنا بنصحك تبدأ تحويش بدري بدري علشان تلحق 

تصرف حاجة من اللي حوشته على حياة عينك 

إنما لو انت مواطن كويتي أو سعودي 

فتقريبًا هتحتاج ٤١ سنة .. زادوا شهر

قلوا شهر ، مش مشكلة الاحسن علشان تكون في السيف سايد

تحوش من وانت في ابتدائي .. وما تكسرش حصالتك 

أيًا كانت الظروف .. إنما بقى لو حضرتك مواطن أردني 

فمحتاج علشان تحوش مليون دولار ١٣٤ سنة 

وده رقم مش كبير بالنسبة لمتوسط عمر السلاحف

إنما لو إنت مواطن عراقي ، فهتحتاج ١٥٤ سنة وشهر

ااخ .. هي المشكلة في الشهر ده 

أما بقى لو سعادتك مواطن لبناني فهتحتاج ١٦٤ سنة

بس أنا رأيي تفكس وترضى بنصيبك 

محدش بياخد كل حاجة.. يعني جمال ودلال وطبيعة خلابة

ولهجة بتدوب في البوق زي الغريبة

وعايز كمان تبقى مليونير .. ده انت طماع بقى 

أما لو حضرتك من المغرب فهتحتاج إنك تعلم حفيدك 

انه يعلم حفيده التحويش علشان لما يطلع معاش 

يلاقي معاه المليون دولار .. لأنكوا هتحتاجوا 

٢١٥ سنة … بس 

أما لو إنت مواطن جزائري فأحب اقولك 

ما تحاولش لأن الحسبة صعبة ، لأنك هتحتاج 

٣١٢ سنة وكام شهر ، فالأفضل إنك تزهد في الدنيا

وما تشيلش هم ولا فلوس .. واتبع المقولة اللي بتقول

الكفن ملوش جيوب.. 

عارف إنك مش قاعد على بعضك ومستني دورك في الكشف

وعايز تعرف ترتيبك ومستنيني أنده إسمك 

طبعاً.. حقك ..حلم المليون دولار مزغلل عينيك 

بالنسبة لأخويا المصري .. إبن بلدي 

أحب أقولك .. ما تقلقش .. إنت محتاج بس 

فقط .. أونلي .. ٦٠٣ سنة علشان تحوش من راتبك 

لكن تفتكر أنا هسيبك كده محبط 

ومش هديك حلول .. ولا أقعد أحط معاك خطة 

لا عيب عليك .. ما استنتهاش منك بصراحة 

قدامك طرق كتير جدًا تقدر تحوش بيهم مليون دولار 

بس للأسف كلهم شمال .. وممكن ما تظبطش 

وتقضي باقي عمرك في السجن .. 

لكن الطريقة الأمثل لتحويش مليون دولار 

إنك تشيل الفكرة من دماغك .. واتكل على الله 

محدش بينام من غير عشا .. 

قال مليون دولار قال ..