أنواع العرسان (جزء ثاني) !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن أصحاب علب الجاتوه ، اللي كلامهم بيبدأ بكسوف 

وبينتهي بمفيش نصيب .. موضوع مقالنا النهارده

عن أنواع العرسان الجزء الثاني ، واللي اتكلمنا 

في الجزء الأول عن العريس المستعجل ، اللي عايز 

يحمل ويجري لأنه معندوش وقت .. 

والعريس النص سوا .. اللي كل حاجة عنده موجودة

بس محتاجة وقت علشان تكمل ، وهو شخصيًا عايز يستوي 

والعريس المفاجئ اللي بيلمحك في الشارع تروحي تلاقيه في الصالون

وعريس الإتش آر .. ملك الأسئلة ، اللي جاي يمتحنك مش يتقدملك 

في المقال ده بقى .. هنتكلم عن أنواع تانية خالص ، 

الأخير سيبهرك .. لا تخرج قبل أن تقول سبحان الله

النوع الأول : المتجاوز 

والعريس المتجاوز مش المقصود بيه أبدًا اللي بيتعدى حدوده

أو بيعمل تصرفات تتخطى الأدب ، لأن العريس لو هو 

زعيم قلالات الأدب ، هيكون على كنبة الصالون 

إمام مسجد ، وإلا هيتهزا وينطرد ويخسر على الأقل علبة الجاتوه

فمحدش يقدر يتجاوز حدود الأدب في مقابلة الخطوبة 

لكن إحنا هنا بنتكلم عن نوع تاني من التجاوز .. 

حاجة أشبه بالسفر عبر الزمن .. يعني نقصد 

بالعريس المتجاوز .. العريس اللي بينط بالأحداث لقدام 

زمان واحنا عيال لما كنا نتفرج على فيلم 

ويبقى البطل عنده ٣ سنين وفجأة بقى عنده ٣٠ سنة 

كنا نستغرب ونقول هو لحق .. ده ما فاتش إلا عشر دقايق بس 

وطبعاً ده سؤال متخلف ، يليق بعقليتنا كأطفال 

العريس ده بقى فضل عقله في النقطة دي وما كبرش مع جسمه 

فتلاقيه قاعد مع الحاج وكل ما يطلب منه طلب يقوله

قدام في المستقبل هنعمل ونسوي .. يعني تجيبلها شبكة بكذا

يقول بكره في المستقبل هصيغها من ساسها لراسها 

يا عم احنا مش عايزين بكره في المستقبل

ولا عايزينك تصيغها من ساسها لراسها .. 

احنا عايزين دبلتين ومحبس دلوقت ع الأقل 

يقوله يا عمي انت بتطلب حاجة بسيطة 

بكره في المستقبل أنا هخليها تزهق من الدهب 

يا سيدي هي حاجة صغيرة هاتها دلوقت 

وبعدين بكره في المستقبل ده مصطلح واسع قوي 

يعني في المستقبل القريب … يعني ١٠ ولا ٢٠ سنة ؟

ولا قبل نهاية العالم بتلات دقايق يكون الدهب رطرط في السوق 

ولا امتى يعني ؟ يقولك بكره إن شاء الله 

تجيبه كده توديه كده .. هو أمه حفظته الكلمتين زي ما هما كده

تقوله شقة ٣ أوض .. يقولك نقعد دلوقت في الشقة مع أمي

وبكره هجيبلها قصر يرمح فيه الخيل 

انت يا عم الخيال ، احنا مش في نزلة السمان هنا

احنا بنتكلم عن دلوقت .. مفيش فايدة .. وده يا إما حاجة من تلاتة

يا شايف الدنيا وردي وإنه بعد الجواز هيبقى مليونير

وده وارد يحصل بس ده معناه انه مغيب 

يا إما واقع على حتتين أثار ومستني حد أمين يصرفهم 

وده هيبعت رسايل لمصر كلها ومحدش هيصدقه 

وهيموت بأثاره أو بحسرته مش متأكد 

يا إما الحاجة التالتة إنه يكون بياكل بعقلكوا حلاوة 

وده أقرب إحتمال .. والغريب في العريس ده 

انكوا لو تخطيتوا المرحلة دي وقعد مع العروسة خمس دقايق لوحدهم 

هتلاقيه بيتكلم بنفس الاستراتيجية برضه

يعني تلاقيه بيسأل أسئلة سابقة لأوانها تمامًا 

يعني يقولك لو خلفنا ولد هنسميه ايه ؟ 

طب لو خلفنا بنت هندخلها أمريكان ولا بريتيش ؟

طب لو توأم هنجوزهم في ليلة واحدة ؟ 

يا عم مش لما نتنيل نقرا الفاتحة الأول .. 

يقولك تفائلي بالخير هنقراها .. طب بلاش دي 

لما نطلع معاش هنفتح مشروع ايه نكمل فيه حياتنا 

هناخد مقابرنا فين ؟ ولو مت قبلك هتتجوزي بعدي ؟

مش لما اتجوزك انت الأول .. يا عم قولي دلوقت هتعمل ايه 

مفيش .. مش هيقول ، هو عامل زي اللي بيبيع سمك في ماية

زي بتوع كيونت كده .. ادفع انت بس فلوس الاشتراك 

وبكره هتشتري فيلا عربية .. يا عم مش لما استلف فلوس الاشتراك الأول

والنوع ده من العرسان مش هتاخدي منه لا حق ولا باطل 

ولو وافقتي عليه واتجوزتوا كفى الله الشر 

هتلاقيه قاعد في البيت مستني يبقى مليونير بحجة بكره أحسن

وهيطلع عينك علشان يغير لمبة الحمام وكل يوم هيقولك بكره 

وبعد ما تموتي هيحلف انه عمره ما خلاكي عايزة حاجة 

والعريس ده الرد المناسب عليه .. بكره تلاقي أحسن مني

بكره امتى ؟ في المستقبل .. 

النوع الثاني : اللزقة 

والنوع ده بسبب الأحوال الإقتصادية بقى منتشر قوي

يعني هو شاب بيحسبها صح ، يقولك 

أنا لو ارتبطت بواحدة دلوقت ، هخرج معاها كام مرة في الشهر

وهدفع في كل مرة كام في الكافيه ولا المطعم 

وهجيبلها هدايا .. ده غير المشاكل بقى اللي هتعملهالي

ماما سمعتني وانا بكلمك .. اخويا شاف الرسايل

أبويا عايز يقابك .. بس .. هو ياخد طرف الخيط ده 

ويمسك ورقة وقلم ويعمل دراسة جدوى ويحسبها كويس

يقسم الصفحة بالنص ، ويكتب ع اليمين لو ارتبطت 

و ع الشمال لو خطبت .. ويحسب بقى هدفع شبكة كام 

وهجيب هدايا بكام واخرجها بكام .. وكل ما سبق 

ويلاقي انه هيبقى كسبان لو اتقدم لواحدة وجابلها دبلة وخاتم

وقعدوا مخطوبين سنتين تلاتة ، ولمدة السنتين 

 كل يوم يخلص شغله ويطلع عليها .. يقعد بقى 

نت ببلاش .. شاهد ونتفليكس ببلاش .. غدا ماشي 

عشا مفيش مانع .. حلو ما يضرش .. فاكهة .. مفيدة 

ده غير الشاي والقهوة والعصاير ، كل ده بالدبلة والخاتم 

فتلاقيه بقى من أول يوم قاعدلكوا في البيت .. 

مش هيتعتع .. ما هي طبعاً فرصة العمر 

لأنه لو قاعد في كافيه القاعدة دي هيصرف كل يوم

٢٠٠ ولا ٣٠٠ جنيه ، وهيقعد يكلم نفسه 

لا ده قاعد واكل شارب .. فاتح نت .. ماسك ايدين 

مسبل ، محلي ، متفرج على ماتشات .. 

متفرج على مسلسلات وأفلام .. نايم قايم ما دفعش جنيه 

ويا سلام بقى لو أمه داعياله .. وهي بالفعل داعياله لأن ده عرض ما يتفوتش 

لا لو داعياله على جبل عرفات .. لو أخو العروسة عنده بلاي ستيشن

كده خلاص يا معلم ، هتلاقيه بعد كام يوم داخل عليكوا بشنطة هدومه 

ايه ده يا صاحبي انت مسافر ؟ لأ .. أصل العمال شغالين في الشقة 

في عش الزوجية بقى ، فقررت اجي اقضي معاكوا شهرين الصيف 

لعند ما يخلصوا تشطيب ، ومن هنا بقى .. تلاقيه أول واحد 

قاعد مع ابوكي على ترابيزة السفرة مستني الفطار

وأول واحد بيبعتلك على الواتس آب هو عايز يتغدا ايه 

وأول واحد في البيت بيلاحظ ان النت خلص ولازم يتجدد 

ومش بعيد تلاقيه نازل الصبح بيطلب مصروفه يتساوى بمصروف أخوكي

ولو حد عاتبه يقوله العدل حبيب الله 

لازقة ، قرادة ومش هتطلع إلا بالدم 

والعريس ده احتاروا فيه العلما والأطبا 

يعني يا إما تعزلوا فجأة ، تخلوه ينزل شغله 

يرجع يلاقيكوا رامينله حاجته قدام الباب 

وقافلين موبايلاتكوا ومغيرين أساميكوا 

واللي شعره أسود صبغه أصفر وركب عدسات 

واللي بشنب لبس شنب فوقه زي أستاذ أحمد عبد العزيز

وتضربوا بطايق جديدة بأسامي مختلفة 

وتعيشوا بين الناس في مكان جديد بشخصيات جديدة 

أو تمشوا كلكوا في اجراءات هجرة من وراه 

ويعرف وانتوا في الطيارة .. هتقولي طب ما نفسخ الخطوبة 

لا طبعاً .. النوع ده مادام لقى مكان وبيئة بالشكل ده 

مش هيمشي .. ولو حاولتوا تفسخوا الخطوبة معاه

هيهدد بالانتحار في لقاء تلفزيوني وهيحملكوا المسؤولية كاملةً

هتقولي طب ما احنا ممكن نبعتله شبكته على البيت 

ونجوزها تاني يوم لأقرب عريس 

ساعتها هيخرس ومش هيفتح بوقه .. دي اتجوزت 

أولاً هتبعتله الشبكة فين إذا كان هو عايش معاكوا في البيت

ثانيًا البيت اللي يدخله عريس بالنوع ده 

مش هيدخله عرسان إلا بعد تلاتين سنة 

لأن مصر كلها افتكرت انه مشارككوا في البيت 

أو كاتب كتابه على البت ، ولا كاسر عين حد فيكوا 

هو حل من الاتنين اللي قولتلكوا عليهم 

يا إما تعزلوا و تغيروا هويتكم تمامًا وتدوبوا بين الناس 

يا إما تهاجروا للأبد ، لدولة صعب يوصلها 

يا إما تحسبوا المدة اللي باقية من الخطوبة 

وتحسبوا المصاريف اللي كانت هتتصرف عليه 

وتراضوه بعشرين ولا تلاتين ألف وتفسخوا الخطوبة دي 

النوع الثالث : المبالغ

النوع ده بقى من العرسان ما نقدرش نقول عليه كداب 

ولو سألته انت بتكدب هيقولك .. أنا لا أكذب ولكني أتجمل

وده اللي مجرد ما يدخل البيت عليكوا 

تلاقيه جايب معاه دستة جاتوه عادية جدًا 

بس بيقول لاصحابه انا داخل عليهم بعربية جاتوه 

وده مجرد ما تقعدوا تتفقوا .. الشقة يقولك هعيشها 

في أحلى شقة في الدنيا .. فين يعني ؟ 

في ميلانو ؟ طب الشبكة يقولك هجيبلها 

اللي ما جاش لحد قبل كده ؟ ليه يعني ؟ 

هتطليها دهب ؟ وفي الآخر تلاقيه مقعدها في شقة

اوضة وعفشة مياة ، مش حمام .. لا عفشة 

وجايبلها الشبكة ومعاها عدسة مكبرة 

علشان تعرفوا تشوفوا تفاصيل الدبل بيها

والراجل ده بيكون متربي على كده من صغره

يعني هو واخد الموضوع ده وراثة .. غصب عنه

عارف إنت الأهالي اللي تسألها إنتوا ابنكوا شغال ايه 

يقولولك ابننا محاسب قد الدنيا .. قد الدنيا ازاي يعني ؟

ماسك حسابات ايلون ماسك ؟ وهو محاسب عمال 

بيقبض باليومية ويوميته ٣٠ جنيه ورغيف فول بايت

أهو الراجل ده بقى أخد على انه قد الدنيا واللي بيجيبه 

وبيعمله محدش لا بيجيبه ولا بيعمله في الدنيا 

والنوع ده من العرسان تلاقيه كل يوم الفجر مصحيك من النوم

انت وبنتك .. خير ؟ يقولك أنا بلطتلك الشقة النهارده

بلاطة دهب وبلاطة فضة .. مبدأيًا دي مش شقة 

غير كده ان بلاطة واحدة تكفيها من كتر ما هي صغيرة 

تاني يوم يصحيك علشان ركب جرس على باب الشقة

وأكنه مركب جرس من اجراس الكنايس على باب زويلة

وهكذا بقى يستلمك انت وبنتك مبالغات وفشر 

ده انا هعيشك أحلى عيشة ، وهو عامل حسابه 

انها هتنزل تلم كانزات وبلاستيك بعد الجواز 

هركب أحلى عربيات .. كارو .. ولو يوم جاب عجلة 

هيشتريلها انذار علشان محدش يسرقها .. 

والنوع ده من العرسان اللي ينطبق عليه مثل 

قطته جمل .. هو شايف إن أقل حاجة عنده كبيرة

هتقولي ما هي دي حاجة كويسة .. لا ده لو احنا

يعني بنتكلم عن الكرامة .. عن الضمير 

لما تبقى مثلاً عامل معاه خدمة صغيرة يشكرك عليها سنة 

لكن في حالته دي .. هو شايف قطته جمل حرفيًا

يعني لو عزمك على هياكل ورجول فراخ 

هيقولك ايه رأيك في الرومي .. ولو انطس في نظره 

في يوم و جابلك سلسلة باتنين ونص

هيقولك ملبسها الغالي ، ومصيغها 

والحل مع العريس ده حاجة من اتنين 

يا إما تفسخوا الخطوبة معاه وتمضوه تعهد ما يجيبش سيرتكوا

لأنه بمجرد ما تفسخوا الخطوبة ، هيلف على خلق الله كلهم 

ويقولهم قد ايه كان كل يوم داخل عليكوا بفاكهة 

موز وتفاح ، هي مرة نتش صباع من على عربية يعني 

 وإنه كان داخل خارج شايل هدايا .. أطقم كوبايات

و وورد بلاستيك .. وإنه عمرها ما هتلاقي زيه في الدنيا

والحقيقة إنه عنده حق في دي .. لأنها لو لفت الدنيا 

مش هتلاقي حد بالنتانة دي .. وعلى فكرة النتانة في حد ذاتها

مش هي مشكلته الوحيدة ، يعني لو واحد نتن أو بخيل فمعروف خلاص

لكن ده بخيل والجنيه بيخرج من جيبه بيعملوله صوان

بس متخيل إنه أكرم حد على وجه الأرض 

ومن ضمن الحلول اللي ممكن تعملوها مع العريس ده

ده في حالة انكوا شربتوه وادبتسوا فيه خلاص 

انكوا تحاولوا تبتزوه على قد ما تقدروا 

يعني ما هو مادام انت كده كده داير تقول انه خيرك علينا 

يبقى احنا هنخلي كدبك ده حقيقة 

يعني تمضوه على كمبيالات مثلاً.. 

تمسكوا عليه مقاطع ساخنة ، وتهددوه بيها 

ولو ملكوش في العوق وعايزين اللعب ع الهادي 

تلمي أهلك والجيرة وجيرة الجيرة ، ويلاقيكوا 

طابين عليه ساعة غدا مثلاً .. مش انت مضياف 

وجب معانا بقى يا عم ، اثبت ان كلامك صح

وساعتها هيكون قدامه حاجة من اتنين .. 

يا إما يطلع كداب قدام كل الناس دي .. 

ومش هيقدملهم ماية ساقعة علشان بيخاف يشغل التلاجة

يا إما هيضطر يعمل معاهم الواجب و هتشوف صورته في الجرانين بعدها

تحت عنوان انتحار شاب بقطع شرايينه بسبب عزومة  

وفي الحالتين هتخلصوا منه .. 

النوع الرابع : الملزق

والنوع ده من العرسان على قد ما هو ممكن يكون كريم

ممكن يكون شيك وذوق ، ممكن يكون يشرف

وأهلك مبسوطين منه إلا إنه محدش يعرف 

كم المعاناة اللي بتعانيها معاه بليل 

وكم المحن والتلزيق اللي انتي عايشة جواه لما جالك السكر

أهلك شايفين صورته قدامهم ، انه ده عريس كويس

وهو ممكن يكون كويس فعلاً.. لقطة كمان 

بس مش واخدين بالهم إيه السبب ورا انك قاطعة الأكل 

بقالك أسبوع ، وعندك قرفة .. ومش عارفة تقولي مالك

هو الصبح راجل وشه مليان شعر 

وعنده كمية عضلات ولا البيج رامي

يخلص النهار والقمر يبقى بدر ، يتحول بقى ولا المستذئب

ويبدأ يتصل بيكي .. بحبك ، بموت فيكي 

مش عارف أعيش من غيرك ، يا بطة يا قطة 

يا كلبة .. وحيوانات ليس لها حصر ، ومهما تقوليله

وتحاولي تفهميه .. إني يا إبني يا حبيبي أنا مليش في الكلام ده 

أنا حاسة إني أنشف وأخشن منك .. هو مفيش .. مُصر 

وخياله واسع بقى بشكل مش طبيعي .. 

عارفة قعدت أعد اللحظات اللي غيبتي عني لحظة لحظة 

يا إبني انت مش وراك مصلحة .. مفيش شغلانة تعملها 

مفيش حاجة تتسحل فيها وتنساني .. ياكل ودانك بقى 

بمكالمات يندى لها الجبين لساعات طويلة 

وما بيقفلش ولا رصيده بيخلص ولا كلامه بينتهي 

ولا طاقته بتقل .. هو بالنسبة خطوبة يعني 

هااااح واحدة أحب فيها ليل نهار لعند ما اخليها تكره نفسها 

على النعمة أخليها تترهبن وتوهب نفسها للعزوبية مدى الأمد 

تقفلي معاه بمعجزة ، بعد ما خلصت كل الحجج 

عايزة أنام .. نامي وانتي معايا في المكالمة 

عايزة أدخل الحمام ، خليكي معايا واعملي ميوت 

عايزة أطفح ، أكل لقمة .. كلي وانتي معايا 

يا إبني كرهتني في النعمة بتاعت ربنا 

مش عارفة أعيش .. هرمي نفسي من الدور العاشر وأخلص 

المهم تقفلي بعد ما تكوني خلاص مش شايفة قدامك 

من قلة النوم ، وهيغمي عليكي من قلة الأكل 

وهو ما تفهمش جايب الطاقة دي منين .. 

ده ولا اكنه معلق جلوكوز وهو بيكلمك .. تقفلي من هنا

تلاقيه ناططلك على الواتس اب .. رسايل وايموشنات 

ما تفهمش بيجيبها منين .. عنده مخزون بقى كان مستني 

يفرغه لما يخطب .. فويسات الفويس ٤٥ دقيقة 

هو شوط كورة يا حبيبي .. ما انا لو عندي طاقة أسمع كل الفويسات دي 

كان زماني بسمع محاضراتي وبذاكر بدل ما اسقط 

تقفلي الداتا يبعتلك رسايل نصية .. تن تن تن 

تقفلي الموبايل خالص ولا تحطيه في عين الحمام وتخلصي 

تلاقيه بيرن على موبايلك أمك ، لأ أختك ، لأ عم محمد البواب

شوفوها مالها قافلة موبايلها بقالها عشر دقايق 

انا مش هسامح نفسي أبدًا لو حصلها حاجة ، 

يعني انت عارف انك انت اللي جايبلها الجلطة أهوه 

تدوري على البيت تقفلي موبايلات كل الناس 

تلاقيه باعتلك حد ع البيت ، مُحضر بقى 

دليفري ، ساعي بريد .. حمام زاجل 

مش هيعتقك ، إزاي تنامي وتسيبيه ولا تقفلي موبايلك 

بعد ما اتكلمتوا ١٥ ساعة بس ، يا قلبك الحجر 

الغريب في الأمر إنه منين يا صاحبي بتجيب محتوى

 علشان تملى كل الساعات دي ؟ انت لو معد برنامج أسامة منير

ممكن تعطل ليلة ، تهنج .. تمل .. لكن هو ايه ده ؟

انت رافع ايه ؟ ده تامول ده ولا ايه نوع المخدر ؟

والمشكلة في العريس ده مش فترة خطوبته

 قد ما هتنهي الموضوع ده إزاي ؟

ده ممكن يعمل مصيبة ، يعني واحد زي ده 

لو قولتيله احنا لازم نسيب بعض 

خدي بقى كام ساعة عياط و شحتفة 

هتلاقي مصر كلها بتكلمك تصالحك

 وتحاول ترجعك عن اللي في دماغك

لأنه مش قادر يعيش ولا بياكل ولا بيشرب 

ولو مات هيبقى ذنبه في رقبتك .. 

تخرجي من البيت تلاقي البلد مليانة يفط 

من نوعية ارجعيلي أما مش قادر أتنفس 

 والمشكلة الأكبر في أهلك نفسهم 

اللي عايزين يسمعوا سبب حقيقي للفركشة

ما هي حاجة زي دي ما تتحكيش لحد ..

 يعني هتقوليلهم ملزق ، طب والحل ايه ؟

لا الحل بسيط خالص .. حاجة من اتنين

يا إما تدبري موتك بشكل مزيف ، زي ما بيعملوا في الأفلام كده 

وتقنعيه وتقنعي كل الناس انك موتي 

وتختفي من الوجود تمامًا

يا إما تتجوزيه .. معقول ؟ طبعاً

لا تكوني فاكرة أنه هيفضل كده بعد الجواز 

هو انتي بس استحمليه أول أسبوع ومن بعدها 

هيتحول تمامًا ، للراجل بقى اللي نفسك فيه 

أيوه اللي بيضرب وبيزعق وبيسففك التراب ده 

أنواع العرسان كتير جدًا وموضوع محتاج

١٠٠ مقال ، فمنهم اللي بياكل وينكر

واللي مهما عملتي معاه وتجاوزتي عيوبه يقول ما حصلش

ومنهم النساي واللي بينسى كل التواريخ 

عيد ميلادك عيد ميلاد ماما ، عيد الحب 

العيد الصغير .. هو بينسى تواريخ الأعياد بس 

ومنهم الصريح بزيادة ، واللي يديكي في وشك كده 

بدون تفكير ، ولا مراعاة لمشاعر حد 

أنواعهم كتير جدًا ، بس الأيام دي وجودهم نادر 

 لا حد لاقي يتجوز ولا حد ناوي يتجوز 

فلو وقعتي في عريس من دول اتجوزيه 

وبعد كده دخليه مصحة تأهيل نفسي ما يجراش حاجة 

وألف ألف مبروك ..