معايير تحكم المجتمع برغم انها .. معايير فستك

 

معايير تحكم المجتمع برغم انها .. معايير فستك 

 

وأنا مربي دقني في فترة من الفترات 

الناس اللي ما تعرفنيش كويس 

كانوا بيتعاملوا معايا بمعيارين 

بعضهم بيقلق مني 

والبعض الآخر بيرحب بيا جداً 

وبيقولي يا شيخ 

عمر ما حد سألني .. إنت مربي دقنك ليه ؟

كل واحد افترض إفتراض وبنى عليه حكاية 

وصدقها .. وأصدر عليا الحكم بحاجة من اتنين 

يا إما انه حابب يتعامل معايا تاني 

إعتقاداً منه اني بنفس أفكاره 

يا إما خايف من التعامل معايا ورفضه 

بسبب اعتقاده إني ضد أفكاره 

عمر ما حد سألني .. إنت مربي دقنك ليه ؟

لحد ما في حد سألني 

والحقيقة كان لازم أجاوب 

قاللي إنت مربي دقنك ليه ؟ 

قولتله ستايل ..  فعم الضحك الأرجاء 

 وده خلاه يعرف 

إني لا إرهابي .. ولا شيخ 

إحنا بنعيش أحداث فيلم ملئ بالتويستات 

أكثر من أفلام كريستوفر نولان 

كمان اكتشفنا إننا قادرين على التنكر .. والموهبة فينا كلنا 

الناس هنا بتعامل بعضها بناءاً على بعض المعايير الفستك

وده بيخليهم ياخدوا قرار يا إما يقفوا في صفك 

أو ضدك لمجرد حكمهم إنك في صف أفكارهم أو لأ

إنت شبههم أو لأ .. إنت من نفس الطبقة أو لأ  

وكل ده بناءاً على بعض المعايير الفستك

المعيار الأول : السن

السن هو من المعيار الفستك الأول 

واللي بيخلينا نحكم ع الأشخاص اللي حوالينا 

ونرسم عنهم حكايات ترتبط بقدرتهم على النجاح 

أو قدرة تحملهم .. أو ملائمتهم لعمل ما بناءاً على سنهم 

سواء كان كبير أو صغير 

مش كده وبس .. كمان قدر مساعدتنا اللي بنقدمه للناس بيتم بناءاً على المعيار ده 

قدر إحترامنا للناس بيتغير بناءاً على المعيار ده 

 وده من رأيي الشخصي غلط تماماً .. كتير من قادة كان سنهم صغير

هارون الرشيد

تولى قيادة الجيش العباسي في سن 15 سنة

تولى الخلافة في سن العشرين 

توت عنخ آمون 

تولى الحكم في سن الحادية عشر

كتير من علماء غيروا التاريخ وسنهم كان صغير 

 

جاك أندراكا

في سن 15 عاما 

اخترع الجهاز الأقل تكلفة لتشخيص سرطان البنكرياس.

وكتير من دكاترة ومفكرين عاقلين غلطوا غلطات كبيرة زي سنهم الكبير

المعيار التاني : الجمال  

الجمال .. طبعاً الجمال من أهم تلك المعايير الفستك 

اللي دايماً حكمنا على الناس من خلال المعيار ده خطأ كبير 

والدليل كان واضح جداً من خلال قضية 

الأمريكي كاميرون هيرين

كاميرون هيرين الملقب بالمجرم الوسيم 

واللي أجرم في قتل لسيدة وطفلتها في حادث سرعة

وطبعاً شفنا كم التعاطف معاه بسبب انه وسيم 

واللي كان إستحالة يحصل لو كاميرون كان تخين شوية مثلاً 

أو غير وسيم بناءاً على المعايير المعروفة للجمال في الوقت الحالي

المعيار الثالث : المستوى التعليمي 

المستوى التعليمي .. طبعاً ده من المعايير الفستك اللي بيتبني عليها حاجات كتير 

منهم رغبتنا او عدمها في ضم الشخص ده لمعارفنا أو لأ 

أو حتى الجواز منه 

والأمثلة كتير جداً على ناس فرقوا في حياة كل مرتادي كوكب الأرض 

برغم إنهم عانوا كتير في حياتهم الدراسية 

 زي مايكل فارادي

واللي كان بليدا لدرجة عدم النطق خلال سنواته الدراسية كلها.

أو بيل غيتس واللي ما كملش دراسته الجامعية بجامعة هارفارد  

بس ابتكر نظام ويندوز 

ومعايير تانية مختلفة كلها من النوع الفستك زي 

الجنس : ده راجل .. دي ست 

الجنسية : ده مصري .. هو انت فاكرني هندي يا عم ؟!

وحاجات تانية كتير .. بنحطهم بينا علشان يفرقونا 

زي الإنتماء الكروي .. مبرر لبعد الناس عن بعض 

بعد ما كان هو المتنفس عند ناس كتير 

وصلت مبرراتنا للتفرقه بيننا لنوع المزيكا اللي بنفضلها 

اتخذنا كل الطرق والسبل علشان نكون مختلفين 

ولتعبئة الحقد جوانا لكوننا مش شبه بعض 

مع ان المقصود من الحياة اننا نكون مش شبه بعض 

في النهاية .. رأيي الشخصي ما تحكمش على حد من غير ما تعرفه 

أو حتى بعد ما تعرفه .. مش مسئوليتك الحكم عليه 

ما تعاملش حد بناءاً على حاجة أو شرط 

عامله فقط بإنسانيتك 

 .. أشوفكم على خير