أغرب 5 حالات تهريب مخدرات في العالم كلهم فشلوا !
فاكر وانت صغير لما كانت أمك تبعتك
تشتري حاجة ساقعة للضيوف ؟! وتوصيك
إياك حد منهم يشوفك ، كنت بتحس ساعتها
نفسك مهرب دولي وعديت من أمن المطار بنجاح
ده لو يعني ماحصلش واتفضحت ووقعت قدام الضيوف
بقزازة الحاجة الساقعة وفارت عليهم لما غرقتهم
وقضيت ليلة من أسود ليالي حياتك
بسبب غلطة زي دي .. يا مهرب يا فاشل
تعالى بقى أقولك عن أغرب حالات تهريب المخدرات في العالم
الطريقة الأولى من نوعها والأغرب
تهريب المخدرات عن طريق زراعة الثدي
في مطار فرانكفورت في ألمانيا
واحدة ست كولومبية بعد ما اكتشفوا انها مخبية
كيلو من مادة الكوكايين في صدرها ..
وكانت في طريقها لإسبانيا لتهريبهم
و هتحقق من ده ربح ٢٠٠ ألف دولار
وأمن المطار صرحوا إن دي أغرب حاجة حصلتلهم
وأول حالة تهريب من نوعها بالشكل ده
ده انتي ولية قادرة .. ده عندنا لما واحدة ست
تطلع البوك من صدرها بنقول عليها ساحرة
الطريقة التانية .. داخل صغار الكلاب أو الجراء ..
برضه في فبراير ٢٠٠٦ قبضت وكالة مكافحة المخدرات الأمريكية
على ٢٢ مواطن كولومبي برضه ،
لمحاولتهم تهريب الهيروين في الكلاب
ده غير انهم قدروا يهربوا اكتر من ٢٠ كيلو لأمريكا..
واللي كشفهم موت تلات كلاب بسبب المضاعفات
وبعيدًا عن انهم معندهومش قلب ..
فأنا بنصح الكولومبيين بتجنب التهريب في شهر فبراير
بما انكوا بتتمسكوا فيه
الطريقة التالتة .. جبس بالكوكايين ..
في مارس ٢٠٠٩ مسك الأمن الاسباني رجل تشيلي
في مطار برشلونة وهو بيهرب كوكايين
ودخل الحزين على مطار برشلونة
متسند على عكازين وأكنه قال ايه مكسور ومتجبس
وبعد ما كشفوا على رجله المتجبسة بالآشعة السينية
اكتشفوا ان الجبيرة بتاعته مصنوعة من الكوكايين
تقريبًا كده علشان الجرح يلم ..
الطريقة الرابعة .. الحمام الزاجل
في مايو ٢٠١٧ مسئولين كويتيين بيقبضوا على حمامة
شايلة على ضهرها شنطة صغيرة وفيها
١٧٨ حباية من مادة الكيتامين المخدرة
وألقوا القبض على الحمامة في منطقة العبدلي
بالقرب من الحدود العراقية
الطريقة الخامسة .. في البقلاوة
في شهر ديسمبر ٢٠٢١ قبضت هيئة مكافحة المخدرات
في الأردن على شخص بيهرب عدد ضخم
من الحبوب المخدرة في علب البقلاوة
والظاهر كده إن المُهرب كان بيحاول يقدم خدمة كاملة لزباينه
و ماشي بمبدأ هنحلي ونعلي .. كتر ألف خيره
دلوقت بعد ما سمعت عن أغرب حالات تهريب المخدرات في العالم
تفتكر ايه هي اكبر جريمة عملتها في حياتك
لو عندك الجرأة لده .. قولنا في الكومنتات ..
ولف لفة في المقالات .. هتتبسط
المشاركات
ليست هناك تعليقات:
إرسال تعليق
أتشرف بتعليقك ونقدك دائمًا ..