أنواع الناس في الغربة .. وكيفية التعامل معهم ..

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن فترة بيمر بيها أغلب الشباب في الوطن العربي

وفي مصر تحديداً .. فترة ما بعد الجيش 

وما بعد انتهاء كل الحلول .. بعد ما عملت مليون مقابلة شغل 

ووزعت السي ڤي بتاعك على مصر بحالها 

وبقى منتشر في محلات الفول والطعمية بيتعمل قراطيس 

بيكون الحل الوحيد قدامك هو الغربة .. 

واحنا في المقال ده مش هنتكلم عن الغربة تحديداً 

قد ما هنتكلم عن أنواع الناس اللي بنقابلهم في الغربة 

وأنواع الناس في الغربة كتير جدًا 

فيه منهم اللي بيساعدك لمجرد انك ابن بلده 

ومنهم اللي بينصحك ازاي تعيش في المجتمع ده 

اللي بيكون جديد عليك ، لكن احنا النهارده هنتكلم عن أنواع تانية مختلفة تمامًا 

أنواع ينضرب بيها المثل .. 

النوع الاول : اللي بيجيب لأهله اللعنة

وده نوع من المغتربين واجب عليك لما تشوفه 

تحمد ربنا على حاجتين ، أولهم إنه مش صاحبك وما تعرفوش

وثانيهم إن ربنا ميزك وأهلك ربوك وما طلعتش زيه 

وهو نوع من المغتربين ينطبق عليهم 

المثل اللي بيقول ، الفلاح لما بيتمدن بيجيب لأهله اللعنة

والنوع ده تقدر تعرفه من الوهلة الأولى 

ماشي تايه .. لابس نضارة شمس سودا صبح وليل 

أو فجر حتى .. لابس ألوان زاهية غير متناسقة مع بعض 

ولو عينك ما جاتش عليه تقدر تميزه في أي مكان من صوته 

صوته عالي ، وكلامه دايمًا مختلط بين تلات لكنات أو لهجات 

زي ميكس كده ، أولهم لهجة بلده اللي جاي منها 

سواء من الأرياف ولا الصعيد ولا أي حتة 

زائد بعض الكلمات اللي باللهجة القاهرية 

زائد بعض اللهجات اللي بلهجة البلد اللي هو متغرب فيها 

ميكس غريب جدًا .. تحس انك حاطط شريط كاسيت 

فيه أغاني خليجي على صعيدي على مصري .. ما تفهمش 

فتلاقيه مثلاً بيقول لو سمحت جزازة الشامبو دي لإلي بكام 

الله الوكيل انت ما إلك حل .. طال عمرك 

طبعاً جملة زي دي تقدر تكشفلك عن شخصيته على طول 

وتقدر تعرفه من وسط ألف واحد 

وبمجرد ما تدخل كافيه ولا مول تلاقيه بيفاصل مع الكاشير 

واكنه صاحب المصلحة ، والأهم ان النوع ده من المغتربين 

كلامكوا ما يتعداش مع بعض أكتر من السلام عليكم 

عليكم السلام ، أكتر من كده يشبهك 

النوع الثاني : الفُضحي 

والمغترب الفُضحي ده مغترب عنده عقدة نقص 

يعني بيكون وهو في بلده مش عارف ياخد راحته 

لأن كلها عارفة بعضها زي ما بيقولوا

فيخاف يغلط أو يقول كلمة ملهاش لازمة 

ولا يعمل تصرف مش مظبوط 

وده أول ما يركب الطيارة من هنا بقى 

تلاقيه بيتلفت حواليه كده .. إيه ده .. محدش يعرفه في الطيارة

مش يفعل وضع الطيران بقى .. لأ

ده يفعل وضع البلد اللي مالكش حد فيها 

شلح واجري فيها .. شوفوا التعبير عامل ازاي 

تعبير بيعبر عن الحرية ومش الحرية اللي احنا نعرفها 

اللي هو كل واحد حر بس ما يأذيش اللي جنبه 

لا .. دي حرية مطلقة ، البلد ..ما قالكش الشارع 

لا البلد .. يعني ممكن تكون محافظة كاملة 

لو مالكش حد واحد فيها .. يعني متأكد من عدم وجود

حد من جيرانه ولا قرايبه ولا زمايله ولا معارفه في البلد دي كلها

مش قالك اقلع .. مش قالك البس شورت مثلا 

ما قالكش ارقص في الشارع ولا في الديسكو 

لا ده اختار أكتر لفظ جارح في الدنيا 

وملحوظ من أي حد على بعد اتنين كيلو منك 

شلح .. يعني لا مؤاخذة تجيب هدومك من تحت لفوق 

وبعدين ما قالكش شلح واقف واللي معدي يشوف .. لأ 

ده لم مشاهدات بقى على قد ما تقدر

شلح واجري فيها .. لم لايكات 

اعمل دوشة وافضح الدنيا ، عرف الناس انك معدي 

وبوظ سمعة بلدك وأهلك وناسك على قد ما تقدر 

فتلاقيه سايب سمعة وراه كفيلة تقطع العلاقات الدولية 

بين الدولة اللي خارج منها والدولة اللي متغرب لها 

وده سبب كبير يخليك تحمد ربنا انك مش شبهه 

بس بيخليك تعبان في غربتك جامد .. لأن مجرد 

انكوا من دولة واحدة بيخلي الناس خايفة منك 

وخايفة تعتمد عليك لا تطلع زي اللي بيشلح هناك ده 

وده الحل معاه انه مش تقطع علاقتك بيه .. لأ 

ده يترحل ويتمنع من السفر هو ونسله مدى الأمد 

النوع الثالث : المغترب الحصالة 

وده نوع من المغتربين عنده هدف واضح وصريح 

أنا مسافر أجيب فلوس .. إذن ما ينفعش أصرف جنيه واحد

فتلاقيه من أول يوم بيستغل كل لحظة قاعد فيها في البلد الجديدة 

أولاً فجأة بعد ما كان بينام في بلدهم ٨ ساعات وأحياناً ١٠ 

قلب .. بقى بينام ٤ ساعات بس .. واتكيف على كده

بحيث انه ياخد شيفتين شغل .. وتلاقيه بعد الشيفتين 

مش مكتفي .. لأ ده اتعلم مهارات جديدة يقدر يعمل منها فلوس 

عندك مشكلة في الكهربا .. يعملهالك 

في السباكة ما يضرش .. في النجارة .. هو أصلا نجار

ويوم الخميس بليل يحلق لزمايله في السكن 

ويوم الجمعة يطبخلهم وكله بحسابه 

ومهما عينك تيجي عليه سواء في برد 

في صهد في ليل في نهار في شغل في السكن 

تلاقيه لابس نفس التي شيرت .. ما بيغيروش 

ولا هو بيدبل .. ولا بيتغير لونه .. ما تفهمش تي شيرت خشب ده ولا ايه 

ومشكلة المغترب ده إنه ممكن يتوه في أي لحظة 

لأنه ما بيخرجش الا للشغل ، فتلاقيه ما يعرفش 

اسم الشارع اللي وراه أساسًا .. أصله هيخرج يعمل ايه 

خروج يعني مصاريف ..مواصلات .. ممكن يجوع 

ممكن يعطش .. يعني هيصرف ، وده يزعله جامد 

ولو زعل ممكن يتعب ، ولو تعب هيحتاج دكتور 

ودوا وده هيصرف اكتر .. وده ممكن يدخله في اكتئاب 

ومشكلة المغترب الحصالة ده .. انه أحيانا بينسى مبادئه 

ويبيع أي حد علشان الجنيه .. لأن الجنيه هو هدفه الوحيد 

مش جاي هو يعمل صحاب .. هو جاي يعمل فلوس 

حتى لو هيخسر صحاب قصاد الفلوس دي 

والمشكلة الأكبر لما يرجع مصر 

لأنه بعد الوقت الطويل اللي قضاه في الغربة 

على وتيرة واحدة بيكون نسي معنى انه يصرف فلوس 

فتلاقيه مكمل حياته كلها بنفس الطريقة 

وموضوع الفلوس ده بيجيبله حساسية 

وطبعا المغترب ده ما تصاحبوش .. انت ممكن أخرك 

ترزقه .. يعني تجيبه يعملك شغلانة هو أولى من الغريب 

بس تصاحبه ، هيشلك ويخليك تدفع لاتنين في كل حتة هتروحوها 

النوع الرابع : المغترب الحقنة 

وده نوع مشهور قوي بين المغتربين وهتلاقيه في كل بلد 

وفي كل سكن .. وهو مغترب بيكره أي مغترب جديد 

يجي البلد عليه .. وأكنه جاي بلده اللي متسجلة بإسمه 

اكنها عزبة أبوه .. أو جاي ياكل من خيره هو 

ولا هيقلل فرصه في العمل .. أو هياخد رزقه 

ولو انت مغترب جديد هتلاقيه بيبصلك كده بصات 

معناها .. انت جاي هنا تعمل ايه ؟ 

وأول حاجة يقولهالك مش حمد الله ع السلامة 

لأ يقولك ايه اللي جابك هنا .. ده الوضع وحش

ده احنا مش لاقيين ناكل .. طب لما مش لاقيين تاكلوا 

ايه اللي مقعدك هنا ؟ ولما هو الوضع وحش 

امال مين اللي كل شهر بيحول ١٠٠٠ دولار 

وحسابه في البنك رقم بعده ٦ أصفار 

وهو غرضه معروف .. هو بس كل اللي عايزه 

ينغص عليك غربتك ويكرهك في الشغل 

والعيشة ويخليك مكتأب وعايز ترجع ومتلكك 

ولما يلاقيك مكمل ولو عرف لو شم بس 

خبر انك بتاخد راتب كويس ممكن جدا 

يجي يزاحمك في مكان أكل عيشك عادي 

وأول حاجة يعملها إنه ينطرك من شغلك وياخد مكانك 

وعايش على كده بقى ، كل يوم يعرف مين جاي جديد 

ويحاول يخليه يكره حياته ويرجع 

ونفسه يقوم من النوم يلاقي عدد المصريين واحد 

هو لوحده ، فيشتغل كل الشغل ، وتجيله كل المصالح 

حتى لو مش هيعرف ووقته مش هيسمح بس يعيش لوحده هيكون مبسوط 

والغريب بقى انه لما يرجع مصر 

يبدأ يقول لكل الناس قد ايه كان بيساعد المغتربين 

وقد ايه كان هو الأب الروحي ليهم 

وده أول ما تشوفه تعمل نفسك قرفان لوحدك 

ولما تنزل شغل تحاول يكون بعيد عنه 

وتحسسه دايما انك قرفان في شغلك ومش مكفيك 

هينفضلك ويعرف انك كده كده راجع 

والمغتربين أشكال وألوان .. منهم المتطبع اللي أول ما يسافر 

تلاقيه بيتكلم بلهجة البلد اللي متغرب لها

وينسى لهجة بلده .. منهم اللي رايح جاي 

شهر هناك وشهر هنا .. ومنهم اللي عايز يروح يجيب 

مبلغ خلال سنة ولا اتنين ويرجع .. وغيرهم كتير 

لو تعرف حد فيه صفة من الصفات اللي اتكلمنا عنها في حلقة النهارده

قولنا في الكومنتات وما تنساش  

وتشترك في المدونة علشان يوصلك كل جديد

وبكده تكون انتهت مقالنا النهارده أشوفكم على خير