جرائم لا يعاقب عليها القانون "الجزء أول"

 

جرائم لا يعاقب عليها القانون "الجزء أول" 

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكوا ، وموضوع مقالنا النهارده

عن نوع مختلف من الجرايم ، المجرم فيها 

يعرف بكل سهولة يفلت من العقاب 

ولا تعرف تشتكيه في نيابة ، ولا توديه قسم 

ولا هتاخد منه حقك حتى في قاعدة عرفية 

لأن النوع ده من الجرايم أصحابها صفتهم الأساسية

الجُبن ، وبيحركهم الغل .. فيبقى عايز يأذيك 

بأي شكل من الأشكال بس مفيش بإيده حاجة 

ونفسه ينغص عليك عيشتك بأي طريقة 

ولكن ما يقدرش يجي في وشك ويضايقك 

لأ .. ده لازم يلف من وراك ويعمل عملته 

ولما تواجهه يقولك ، والنعمة ما انا دي اختي منى

وكل صفة أو جريمة من اللي هنتكلم عنهم 

لا تمت للرجولة بصلة ، وكلها صفات حريمي

مع احترامنا الشديد للحريم .. والجرايم من النوع ده 

كتير جدًا مش كفاية عليها حلقة ولا اتنين 

دول عايزين مجلد.. ولكن احنا صنفناهم 

لكذا نوع .. مع جرايم لا يعاقب عليها القانون

ويلا نبدأ على طول.. 

الجريمة الأولى : المعايرة 

والمعايرة نوع من الجرايم يخلو من أي شرف 

ليه بقى ؟ لأن المعايرة ما تحصلش إلا على مصيبة 

يعني لازم يكون الواحد عنده مشكلة 

فلس مثلاً .. شقته ولعت لا قدر الله 

خسر شغله .. فشكل خطوبته .. رجع من الغربة 

معهوش جنيه .. كده يعني .. فده شرط أساسي

علشان الواحد يتعاير .. تقوم تلاقي بقى 

المجرم عديم الضمير والملة بيعايرك وشمتان فيك 

بقى يا راجل يا عديم الرجولة يا اللي العشرة منك بصافينار 

تفرح في مصيبة حد حتى لو بينك وبينه عداوة 

والله وارد .. أهوه انت بتفرح بينك وبين نفسك 

ومش عارف تمسك نفسك الدنيئة .. 

إنما كمان تشمت فيه وتلقح عليه بالكلام هنا وهناك 

ده انت جبلة يا اخي .. طب بص لخيبتك التقيلة الأول

وبعدين دور ورا مصايب الناس ، والغريبة 

إنك تلاقي النوع ده من الناس 

قبل ما يعاير حد ولا يشمت فيه يبدأ كلامه 

بجملة مشهورة جدًا (اللهم لا شماتة) 

امال ده اسمه ايه يا ابني لما هو مش شماته ؟

ذم ولا هجاء ؟ انت فاكر نفسك الفرزدق 

الجريمة الثانية : تكسير المقاديف 

وتكسير المقاديف جريمة ناس كتير بتعملها بسبب جبنهم 

وخوفهم الدايم من المخاطرة ، ودي جريمة حريمي قوي 

يعني تلاقي صاحبتها مجرد ما تعرف إنك ناوي تفتح مشروع جديد مثلاً

عايز تسافر .. عايز تعمل جمعية .. 

تشتري عربية .. تتعلم لغة جديدة 

أي حاجة .. عايز تعمل أي حاجة 

هي ما تعرفش تاخد فيها خطوة أو تخاف 

هي شخصيًا تخاطر بيها .. فتقعد مع نفسها 

تجهز مساوئ الموضوع ده في كشكول 

وتفضل مطبقة باليومين مش عارفة تنام الليل 

لعند ما تقابلك بقى علشان تخلص ضميرها 

تبدأ كلامها معاك بإن أنا سمعت إنك ناوي تفتح مشروع جديد

واخدلي بالك انت .. سمعت مش اتطقست ودرست وذاكرت 

لا .. ده انا وانا معدية كده سمعت الكلام غصب عني 

الكلام جه في ودني وانت عارف اني ما بدخلش في حياة حد 

أنا بصلي العشا واتفرج على المسلسل التركي وأنام 

بس علشان خايفة عليك وعلى مصلحتك قولت اسألك

فانت بكل طيبة وسذاجة تحكيلها عن مشروعك 

على اساس إن الست فعلاً ما تعرفش حاجة 

وسمعت طراطيش كلام ، فتفضل تحكيلها 

وتعدلها في مميزات المشروع وأرباحهو

وكلك حماس يا عيني .. وبعد ما تخلص كل كلامك 

تلاقيها سكتت ومصمصت شفايفها كده واستلمتك بقى 

كل ميزة قولتهالها تبدلها بعيب وترميه في وشك 

أيًا كان مشروعك ده ايه .. هفتح محل جزم 

وهي الناس ناقصة جزم ؟ .. الله امال هيمشوا حافيين ؟

هفتح محل عصير .. ما الناس بتعمل العصير في البيت 

ده احنا عمرنا ما اشترينا العصير ده من بره 

طب انتوا بخلا .. فيه ناس حرانين بيشتروه 

هفتح مطعم .. هتخسر فلوسك والصحة مش هتسيبك 

وهيشمعوا المحل .. ليه بس الفال الأسود ده ؟

طب هشتغل شحات .. أهو مش محتاجة لا راس مال 

ولا مكان وايجار .. تقولك وهي الناس معاها فلوس 

شحات هيشحت من شحات .. كل ما تطلعلها مخرج 

تسده في وشك ، مش تقعد معاك كده تدرس تكسب ازاي 

لأ .. هي تدور على الوحش والكوارث اللي ممكن تحصل 

وتقولك عليها بس .. لعند ما تقوم من عندها

وانت فاقد الأمل في الحياة ومقرر ترجع البضاعة اللي اشتريتها 

وتقطع عقد الايجار اللي لسه ماضيه 

وتصرف فلوس المشروع على الكلام الفاضي 

وتقعد جنبها .. تتبسط قوي بيك 

الجريمة الثالثة : النميمة 

والنميمة من الجرايم اللي ما تعرفش تاخد 

فيها لا حق ولا باطل طول ما هي مش متسجلة

في مكالمة ولا متصورة فيديو مثلاً

والحقيقة أنا بستغرب من الموضوع ده جدًا

وانت كمان لو فكرت فيه دقيقة واحدة

هتستغرب زيي بالظبط .. يعني تخيل معايا

اتنين يقعدوا مع بعض ، كل واحد فيهم 

عنده مشاكله وحواراته وقصصه 

ومش لاحق يشوف قدامه من الهم 

والديون والمسؤوليات اللي عنده 

يقوموا يسيبوا كل اللي عندهم ده 

من غير علاج ولا تفكير في حلول فيه 

ويقرروا يتكلموا على واحد تالت خالص 

حد ملوش علاقة بيهم ولا بمشاكلهم ولا هو سبب فيها حتى

طب كلامكوا ده هيحل حاجة ؟ .. لأ

هيغير حياتكوا ؟ .. لأ .. طب هيخلي الشخص ده يبقى أحسن لو هو وحش ؟

لأ .. طب هيخليه يفلس لو هو معاه قرشين ؟ برضه لأ 

طب إمال إيه الهري ده كله ؟ يعني مش انتوا أولى 

بالطاقة المهدرة دي كلها .. حتى كنتوا قعدتوا 

عملتوا في الوقت ده مصلحة .. يقولك أدينا بنتسلى 

والحقيقة إن النميمة أرخص أنواع المسليات 

ولا بتحتاج فلوس ، ولا كيس ترمي فيه القشر 

حاجة ببلاش كده .. والنمامين الأصليين دول 

كانت مساكنهم المصاطب ، ولكن بعد تطور السوشيال ميديا

بقت لقاءاتهم في جروبات واتس آب 

جروبات لو اتاخد منها اسكرين شوت 

الدنيا تقوم وما تقعدش ، ودايماً كلام الناس دي بينتهي

بالجملة المشهورة .. (ملناش دعوة .. دع الخلق للخالق)

الجريمة الرابعة : نكران الجميل 

تبقى عامل فوق الصح مع حد وينكر انك عديت في حياته أصلاً

ينكر انه يعرفك ودي مش ندالة 

قد ما هو نفسه يعرف الناس انه عمل كل حاجة 

في حياته بنفسه وبتعبه وشقاه ومحدش له عنده حاجة 

ولا حد له عليه جميلة .. عايز يثبت بس انه شاطر

مش أكتر .. وتلاقيه حافظ كام مصطلح كده 

زي ، اللي له شورت ياخده بنطلون .. 

طب ما تتكلمش وبوقك مليان أكل كده 

إبلع الأول الأكل اللي انا جايبهولك ده 

وبعدين اشرب شوية ماية وخد نفس 

وبعدين نبقى نشوف هناخد الشورت بنطلون 

ولا هتضطر تقلع الشورت نفسه وتقعد سلبوتة 

والنوع ده من المجرمين بيكون عقابهم متأجل

لما يتساب لوحده وفجأة يغرق ومش عارف يعمل حاجة 

من غير اللي بينكر جميله ده .. 

فتبدأ الناس تقوله نتصلك بيه يجي يسندك 

ولا نعمل ايه ؟ وناكرين الجميل الحقيقة مش العيب فيهم خالص

افتكر اننا بدأنا كلامنا عنهم بجملة ، لما تبقى عامل فوق الصح مع حد

وده مش صح .. لأنك بتطمع الناس فيك 

انت كل المطلوب منك تعمل الصح بس .. 

لو بيتعمل معاك .. انما لو الصح بيترد بغلط 

بطل تعمله وريح دماغك ..

والحقيقة إن الجرايم دي صحيح لا يعاقب عليها القانون 

بس أهلها دايمًا قاعدين في خنقة 

بيراقبوا الناس ومركزين معاهم 

ومش عارفين يتحركوا خطوة واحدة لقدام 

وبكده تكون انتهت حلقتنا النهارده

ياريت لو مريت بتجربة مشابهة للي اتكلمنا عنه

تقولنا في الكومنتات وما تنساش

تشترك في المدونة علشان يوصلك كل جديد