جروب العيلة

 جروب العيلة

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في برنامجكم ، ربنا خلق الناس شعوب 

وقبائل علشان يتعرفوا ويكونوا مجموعات 

يكون بينهم عوامل مشتركة ، واهتمامات مشتركة 

أو أحيانًا بيتجمعوا لأسباب تانية مختلفة 

فيه منهم مجموعات بتجمع بينهم المصلحة 

زي زمايل الشغل مثلاً وجروباتهم 

وفيه منهم بيتجمعوا في مجموعات بسبب الشغف 

أو بسبب الهواية اللي بيحبوها .. زي مجموعات 

العملات القديمة ، وجمع الطوابع مثلاً

وفيه منهم مجموعات بتجمعهم غصب واقتدار 

زي جروبات الدفعة والامتحانات ومشاريع التخرج 

واللي بيطغى عليها الغلب والهم والنكد .. 

وغيرها وغيرها من المجموعات أو الجروبات 

اللي بتجمع الناس لأغراض كتير مختلفة

ومن أغرب الجروبات اللي كانت سبب 

في اختلاط الأجيال والثقافات وهدفها تقرب البعيد

وأحيانًا بتبعد القريب ، هي جروبات العيلة 

وجروب العيلة نوع من التجمعات البشرية موقعها الواتس آب

وهدفها انها تجمع كل افراد العيلة في مكان واحد 

علشان تقرب بينهم ، وأكنهم عايشين مع بعض

بين اللي مسافر واللي ما بيخرجش واللي مقاطع العيلة 

واللي مش فاضي .. وغيرهم وغيرهم .. وده موضوع مقالنا النهارده

وأنواع الناس في جروب العيلة .. وأنواع الناس في جروب العيلة 

كتير جدًا ، احنا قسمناه لكذا نوع .. يلا نبدأ على طول

النوع الأول : انترنت اكسبلورر

وده شخص على الأغلب سنه كبير ، طالع معاش أو على وشك

كان مشغول جدًا في حياته وشغله ومعندوش وقت 

ولا متابع أي حاجة في الدنيا من أول ما اتعين 

في وظيفته من ٣٠ سنة ، ولما بيشتري الجرنان 

بيستخدمه في حاجتين ، حل الكلمات المتقاطعة

وبيفرشه تحت أطباق الأكل ، لما يكون عندهم عزومة 

ولا له أي علاقة لا بالتكنولوجيا ولا السوشيال ميديا 

وفجأة طلع معاش وفضي تمامًا وبدأ يعرف 

يعني إيه موبايل ونت وفيس بوك وغيره 

فبيتفاجئ بقى بكم الحاجات المهولة اللي فاتته

خلال السنين اللي فاتت ، وبيتصدم من كم 

المعلومات اللي عدت من تحت ايده في آخر ٢٠ سنة على الأقل 

ولا يعرف منها إيه القديم وإيه الجديد 

ولا الحقيقي من المزيف .. ولا يعرف يعني ايه كلمة تريند

فتلاقيه بقى بمجرد ما مسك موبايل 

وعمل واتس آب وانضم لجروب العيلة 

قاعد يشير في أخبار ورسايل بالنسبة له مذهلة 

وجديدة لانج ، أخبار من نوعية ، انتقال نجم مانشستر يونايتد

كريستيانو رونالدو .. أيوه لفين بقى ؟ ها ؟ 

لنادي ريال مدريد .. يا لهوي .. ده من ١٠ سنين 

ده فيه ناس عاشت وناس ماتت يا عم الحاج 

الدهب يتخطى حاجز ال ١٠٠ جنيه .. 

فيه صفر ناقص .. أكيد قصدك ١٠٠٠ جنيه 

الدولار يكسر حاجز ال ٧ جنيه .. يااه 

زمن .. تحسه لسه عايش في الزمن الجميل

تحسه أسعاره مرتاحة ، ومليانة بركة 

تنحي محمد حسني مبارك عن رئاسة الجمهورية 

ده خبر مش محتاج نت يا عم الحاج 

إنت كنت متعين في قبر .. مش في مكان فوق سطح الأرض أكيد

وهكذا من أخبار عفى عليها الزمن .. 

والغريبة إنه بيكون متخيل إن أخباره دي حصرية ١٠٠٪ 

وبيشيل على كتافه حمل كشف المستور لكل أعضاء الجروب 

وإنه خلاص بقى مراسل الجروب ، اللي بيكشف الحقايق

ومش مستوعب إنه مر على الكلام ده سنين 

والأغرب بقى .. إنه بيكون مستني رد فعل 

من أعضاء الجروب وإنبهارهم ، ولما ده ما بيحصلش 

بيزعل ويشيل في نفسه .. وأكن تعبه بيروح على الأرض 

وإنه محدش مقدر حاجة ولا حد يستاهل كلمة من اللي بيكتبهم 

يا عم الحاج ، إنت لو متجمد من ثورة ٥٢ مش هتعمل كده 

ما تفهمش بقى ، هو كان في غيبوبة طويلة 

ولا مر بثقب دودي فقده الإحساس بالزمن

ولا سافر من سنة ٩٠ لقى نفسه في ٢٠٢٣ ولا إيه بالظبط 

وده طبعًا ما بيفضلش كده على طول 

هي كلها حسبة سنة بالكتير ، وتلاقيه اتطور 

وعرف يعني ايه تريند .. وبمجرد ما بقى عنده أكاونت تيك توك

تبدأ تخاف منه لأنه بقى مصدر حصري لأخبار الجروب 

و قاعد للسقطة واللقطة 

النوع الثاني : الشيف

ودي على الأغلب بتكون واحدة ست 

كان حلمها ومنى عينها تفتح مطعم 

أو تعمل قناة طبخ على اليوتيوب

بس للأسف ما لقتش حد يدعمها ويشجعها 

فلقت نفسها جوه جروب العيلة 

وتلاقي الست دي من أول طلعة النهار

عاملة كوباية شاي العروسة عادية خالص

وشارية بسكوت شاي سادة ، ومصورة 

كوباية الشاي والبسكوتة جنب بعض كده بفلتر 

ومنزلة الصورة على الجروب وتحتها كلمتين من نوعية 

طيبون النفوس لا يخشون الشاي بالبسكوت 

أو صباحكم أمل وسعادة .. وقلوب كتير .. قوي .. قوي 

ومع الضهر تلاقيها منزلة صور الفطار 

واللي بيكون يوم فول وطعمية من أي حد تحت البيت

ويوم لانشون وجبنة من أي بقال 

وكاتبة تحت الصور خطوات تحضير الفطار لحظة بلحظة

اللي هي شارياه عادي خالص ، وكلمتين عمق كده 

من نوعية الفطور وجبة الصباح .. والنبي ؟ 

بعد كام ساعة تلاقيها منزلة مقادير الغدا 

وطريقة تحضيره خطوة خطوة 

بالصور والأدلة وتلاقي الغدا رز و بسلة عادي جدًا

اللي أي بيت مصري بيعملها ، والشيف بتكون 

مستنية تقدير من الناس اللي في الجروب على تعبها 

وبتعتبر أعضاء الجروب دول جمهورها الأساسي 

أو زباين المطعم بتاعها ، واللي لازم كلهم

فرد فرد يدخلوا يقولولها تسلم إيدك 

وإلا تعتبر ده جحود ونكران للجميل وتقليل من تعبها 

تعب إيه يا ست الكل .. انتي عملتي فطارك وغداكي 

وكلتيه بالهنا والشفا ، أنا استفدت ايه ؟ 

امال لو عزمتينا على الأكل ده بقى المفروض نعمل ايه ؟

نقدملك قرابين .. ده محدش شاف منك حاجة غير شوية الصور 

وكلها لحاجات عادية أي ست بيت خايبة 

أو أي راجل مغترب في السعودية يعرف يعملها 

مش اختراع يعني .. والموضوع ما بيقفش لعند هنا 

عند الأكل اللي ليل نهار بتصوره وتبعته 

لأ .. كمات هتلاقيها عندها كمية نصايح طبية 

مهولة لفوايد الأعشاب والخضار والماء والهواء 

وأي حاجة خلقها ربنا .. وتلاقيها بقى بتشير على الجروب

بوستات من نوعية فوائد قشر الموز الخمسون 

خمسون ..؟ من اليوم لن ترمي قشرة الموز ..

إمال هعمل فيها إيه لا مؤاخذة ؟

ولو اتفتح أي نقاش هتلاقيها بترد ردود متخصصين

كلها بتبدأ بجملة ، أنا من خلال خبرتي في مجال التغذية

خبرة إيه يا حاجة بس ؟ هو الرز والبسلة محتاج خبرة

ما ينفعش تفطري وتتغدي من غير ما الكوكب يعرف ؟

النوع الثالث : صاحب المعجزات 

زمان درسنا في علم النفس ، إن فيه بعض الناس 

عندهم حاجة ودرجة معينة من درجات المرض النفسي 

إسمها القابلية للإستهواء ، وده معناه إنهم بيصدقوا 

أي حاجة تتقال لهم ، وأي حاجة تتعرض عليهم 

ودول لما كبروا بقول النوع ده من أعضاء جروب العيلة

ودول اللي تلاقيهم كل المحتوى اللي بينشروه على الجروب

هو عبارة عن صور وفيديوهات ملعوب فيها بالفوتوشوب

بجودة حقيرة ، وكلها بتبدأ بجملة 

لا تخرج قبل أن تقول سبحان الله 

قطة براس كلب .. ولدت في كوالالمبور

لأب إنسان وأم حداية ، وتقعد بقى تعقب على كلامها

بسبحان الله .. سبحان الله .. دي القيامة هتقوم 

تدخل تشوف الصورة وتكتم الضحك 

علشان ما تجرحش مشاعرها ، عمتك برضه عيب 

وده بالنسبة للستات .. إنما بقى لو كان العضو ده راجل 

فهتلاقي له توجهات تانية خالص .. 

وفكره مختلف حبتين ، ولكن ما روحناش بعيد

فتلاقيه بينشر فيديوهات عنواينها كالتالي 

عشر أسباب تؤكد أن ميسي من نزلة السمان 

أو وصول الفضائيين لبني سويف .. 

أو قام بعد الموت بخمس سنوات ، فتسبب في دمار

الهيئة العامة للتشجير ، وهدم الخطة الخمسية 

وحاجات من هذا القبيل ، لا تعد ولا تحصى 

والناس من النوع ده يفضل إنك تتجاهل رسايلهم تمامًا

وإلا هتدخل في نوبة من الضحك 

وساعتها هتخسرهم للأبد ، وهتكون سبب في هدم العيلة

أو هتكون بالنسبة لهم العيل المتني 

اللي على آخر الزمن خسر تربية أهله وألحد 

النوع الرابع : حمادة سلطان 

وده مش إسم بني آدم ، لا ده صنف كامل من البشر 

كان حابس نفسه من فترة طويلة وما بيتابعش 

ولا بيسمع نكت من ساعة ما عزب شو 

كان بيعمل فقرة في ليالي التلفزيون 

فتلاقيه طول الوقت بيشير نكت من نوعية 

واحد بلدينا عدى على بقال قاله عندك جبنة 

قاله ما عنديش وهو عنده جوه ..

 أو النكت اللي من نوعية .. واحد صعيدي وواحد أمريكاني 

وواحد فرنساوي ، والنوع ده من أعضاء الجروب

فعلى عكس تعاملك مع النوع اللي قبله (صاحب المعجزات)

اللي ما ينفعش تضحك على رسايله ، ده بقى 

ما ينفعش ما تضحكش على رسايله لأن ده معناه 

إنك متهم بحاجة من اتنين ، أولهم إنك دمك تقيل 

وما بتفهمش النكت بتاعته ، ووارد يدخلك على الخاص

يفهمك ويشرحلك النكتة اللي قالها ، وده اسوأ وأصعب 

من النكتة بكتير ، وتانيهم إنك مستتقل دمه هو شخصياً

وده معناه إنك جاحد وملكش خير في أهلك 

واللي ما يضحكش على نكت أهله ما يستحقش يعيش 

فده تكتفي بالرد عليه بإيموچي ضحك 

مرة بعد كل نكتة ، وتخلص من كل المشاكل دي 

وتخلص نفسك من المسائلة القانونية 

وأهو حتى تجبر بخاطر الراجل ، بس فيه هنا مشكلة صغيرة

إن ضحكك على نكته معناه إنك بتشجعه 

وده معناه إنك بتطلب مزيد ومزيد من النكت السخيفة

وده هيخليه يضاعف مجهوده .. بقى له جمهور بقى 

طب أعمل إيه ؟ .. معلش تعالى على نفسك 

استحملع اليومين اللي عايشهم ، يا إما توز عليه

حد يسرق موبايله ويخلصك من الحدوتة دي 

النوع الخامس : أذكار الصباح والمساء

وده نوع من أعضاء جروب العيلة روتيني 

وتحس إنه موظف في نفسه وبالنسباله الجروب 

زيه زي الشغل بالظبط ، ومن كتر التزامه بوظيفته 

بقى ده طبعه مع الناس في الجروب .. 

وده اللي تلاقيه الصبح بدري باعت صباح الخير

مع صورة وردة أو عصفور أو فنجان قهوة 

وبعدها في ديلها على طول ، دعاء 

أكنه كده مضى حضور مثلاً.. وبعدها 

يختفي لمدة ١٠ ولا ١٢ ساعة أو أكتر 

وطول وقت اختفاءه مهما حصل ومهما اتقال في الجروب 

ما بينطقش ولا بيعلق .. وفي نهاية اليوم 

تلاقيه باعت رسالة واحدة بدعاء برضه 

مع نفس صورة العصفور أو الوردة ومعاهم جملة

وتصبحوا على خير .. وأكنه كده مضى انصراف 

موظف حكومي ..  والنوع ده من الناس 

وظيفته في الجروب إنه يصبح ويمسي على الناس

لا أكتر ولا اقل صحيح ، ولكن دي مهمة 

ومهمة جدًا كمان ، فيه ناس ما بتاخدش بالها 

من الأيام وتقولك الأيام بتسرقنا ، وفيه ناس تانية 

ما بتبصش في التاريخ ودايمًا مش عارفين الحد من الخميس 

هو بقى بيفكرهم ببداية ونهاية كل يوم 

وبيشتغل نفس شغلانة النتيجة اللي في البيت دي بالظبط

عارفين النتيجة اللي كل ورقة فيها 

بيبقى مكتوب عليها التاريخ وتحتها حكمة اليوم 

هو بيعمل وظيفتها بالظبط .. يمكن أحسن 

١٧/٤/٢٠٢٣ ، صباح الخير ، لا تؤجل عمل اليوم إلى الغد

وده الحلو فيه إنه مش محتاج رد من حد 

هو بس بيأكد للناس اللي موجودة في الجروب

إنه عايش وبخير وموجود معاهم 

النوع السادس : الأدمن 

والأدمن في جروب العيلة تحسه زيه 

زي رئيس اتحاد ملاك العمارة بالظبط 

عنده سلطة وهمية كده غير مبررة 

زيه زي الشرطة المدرسية ، فتلاقيه بمجرد 

ما حد جديد يدخل الجروب يبدأ بقى يعرفه 

القواعد والأحكام اللي ماشي عليها الجروب ده 

والشروط اللي تخليه مستمر معاهم فيه 

تلاقيه هو الوحيد اللي عنده سلطة إنه يضيف حد جديد

وهو برضه الوحيد اللي عنده سلطة 

تخليه يعاقب أي حد بطرده من الجروب 

لمجرد إنه استهزأ برسالة أو ضحك في مكان 

غير مخصص للضحك ، أو ما ضحكش على حاجة 

كان لازم يضحك عليها .. وتحس الراجل ده ، لو اتخيلته 

إنه قاعد ورا مكتب كبير وقدامه دفتر فيه كل الأعضاء 

وبيتابع نشاطهم وسلوكهم لحظة بلحظة 

وهل هما كفء وعلى قدر كبير من الاحترام

اللي يخليهم في جروب العيلة أو لأ 

وعنده قايمة من الجزاءات وقايمة تانية من الترقيات 

الأولى بتبدأ بالميوت من مدة يوم لمدة أسبوع 

وتصل لأقصى عقوبة وهي الطرد 

والتانية مقسمة الأعضاء لعضو جديد (في اللفة)

عضو نشط ، مخضرم ، خبير ، عظيم ، وأدمن

طبعاً هو على رأس القايمة دي 

النوع السابع : الميوت 

وده البرنس بتاع الجروب كله .. وده على الأغلب

بيكون شاب عشريني أهله أجبروه على الدخول للجروب 

أو نام وقام لقى نفسه في الجروب فجأة

ومن بعد أول ٢٤ ساعة في الجروب 

لقى إن موبايله إتملى بصور عصافير وورد

وفناجين قهوة ، وأكل ونكت قديمة 

وأخبار من ٢٠ سنة فاتوا ، ومعجزات غريبة 

وقطط بروس كلاب أو العكس .. وكلام من ده 

فقبل ما مرارته تتفقع أخد قرار إنه يعمل ميوت 

للجروب تمامًا واللي عايزني في حاجة شخصية 

أو لو فيه مناسبة مهمة أو كارثة يدخلي خاص

وأهو الباب اللي يجيلك منه الريح سده واستريح 

بس ما يقدرش طبعاً يخرج من الجروب ، لأن ده معناه 

إنه خرج من العيلة نفسها واتبرى من أصله 

أنواع الناس في جروب العيلة كتير جدًا

منهم اللي أول ما تبقى في مشكلة يلحقوك 

ومنهم اللي لو زعلان يفرحوك .. ياريت لو

مريت بتجربة مشابهة للي اتكلمنا عنه

تقولنا في الكومنتات ، وما تنساش

تشترك في المدونة علشان يوصلك كل جديد

وبكده تكون انتهت مقالتنا النهارده عن

أنواع الناس في جروب العيلة

واستنونا في مقال جديد .. اشوفكم على خير