أنواع الزوجات (جزء أول) !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكوا ، وموضوع مقالنا النهارده

عن رفيقات الدرب .. العشرة ، اللي ما تهونش إلا على ولاد الحرام

الناس اللي بيربوا اولادنا وبيربونا معاهم بالمرة 

اللي مخلصين فلوسنا ، ومنتفين ريشنا أول بأول 

اللي واجعين روسنا ، ومنشفين ريقنا أول بأول 

الناس اللي لبسنا بسببهم في حيطان .. قروض وجمعيات

الناس اللي دخلنا بسببهم أماكن عمرنا ما دخلناها 

من أقسام لمحاكم أسرة ، لسجون … 

موضوع حلقتنا النهارده عن الزوجات وأنواعهم 

في حكيم زمان قال حكمة إن الجواز ده عامل زي البطيخة 

يا تطلع حمرا ومسكرة ، يا تطلع قرعة وملهاش طعم 

ومهما حاولت تضرب على البطيخة ، وتحاول تعرف أصلها وفصلها 

مش هتعرف إلا أما تشقها ، وتدوقها .. وساعتها يا ولداه 

بيكون فات الأوان ، لأنك خلاص اشتريت .. 

والراجل بتاع البطيخ ما بيعرجش 

ولو رجع البطيخة ، ما أعتقدش انك معاك تمن بطيخة تانية 

والزوجات أنواع كتير فيه منهم اللي تصونك وتكبرك 

ومنهم اللي تخونك وتكرهك في عيشتك .. يلا نبدأ على طول 

النوع الأول : ٤*١ 

أربعة في واحد هي الزوجة المفضلة لكل زوج مصري 

ودي الزوجة اللي بتصحى من الفجر تطبخ 

وتصحي العيال تلبسهم وتفطرهم وتوديهم المدرسة 

وتجهزلك الفطار تنزل تروح شغلها .. 

تقعد في شغلها ٨ ساعات وترجع شايلة طلبات البيت 

تجهز الغدا وتغديك إنت وعيالك وتبدأ تنضف البيت 

وتذاكر للعيال ، وتعمل حاجة حلوة ليهم 

وبليل تنيمهم وتفوقلك إنت بقى .. شوية شمع 

مزيكا ، عشوة حلوة .. تدلعك .. 

الست من النوع ده تحسها مش ست واحدة 

دي أربع ستات في بعض .. تحس يومها

٨٠ ساعة مش زينا أبدًا .. ما تفهمش بقى 

بتاخد منشطات ، ولا عندها كهربا زيادة 

بس بعد بحث وتدوير اكتشفنا إن ده مش لله 

الزوجة من النوع ده بتكون زكية جداً وعارفة هي بتعمل ايه كويس

دي واحدة عارفة إن جوزها لسه فيه الطمع

يعني راجل مقتدر ماديًا ولسه شاب .. 

فوارد إنه في أي لحظة يتجوز عليها 

فلذلك بتكون مركزة قوي انها تسد الفراغات كلها 

فبتشتغل علشان تساعد في البيت مع انه مش محتاج

ولا طلب منها مساعدة ، ومن ناحية تانية 

علشان لو اتجوز عليها وشردها يبقى عندها دخل 

وبتشتغل في البيت ولا أجدعها ست بيت 

علشان عارفة إنه تطعم الفم تستحي العين 

وعارفة إن قلب الراجل في معدته .. 

وبتربي العيال كويس وبتدرسلهم .. ولا أجدعها مدرسة 

وكمان بليل بتلاقيها في مظهر حلو .. 

علشان تقفل على الراجل كل الثغرات 

م الآخر كده ملوش حجة يبص بيها بره

زي ما بيقولوا قايدة صوابعها العشرة شمع 

لكن الزوجة دي مابتفضلش طول عمرها كده 

كل ده بيتغير بمجرد ما الراجل يا إما يفلس 

أو يعجز .. تبدأ بقى تطلع عليه القديم والجديد 

ما هو خلاص لا هيعرف يتجوز لأنه معهوش 

ولا هيقدر يتجوز لأنه ما يلزموش .. تبيع وتشتري فيه براحتها

تلاقيها سابت شغلها وقعدت في البيت 

بدأت تطلب شغالة وواحدة تساعدها في شغل البيت 

ولو مفيش تطبخ اي حاجة ، فطار مفيش 

غدا من البايت بتاع الاسبوع اللي فات 

وبليل تنام قبل العيال وتسيبك إنت تنيمهم 

النوع الثاني : المرهقة 

ودي عكس كل اللي قولناه على اللي قبلها 

الزوجة المرهقة دي تحسها عندها ٧٠ سنة 

مع انها ٢٥ في البطاقة عادي .. ما تفهمش بقى 

متسننة غلط .. ولا حد مزور أوراق القيد بتاعها 

زي لاعيبة الأندية الأفريقية كده .. ولا قصتها ايه

عارف لما تبقى متجوز بفلوس قمار ؟ 

أو مثلاً كنت بتهرب مخدرات وطلعت المكسب اتجوزت بيه ؟ 

أهي الزوجة دي نتيجة زواج المال الحرام 

والزوجة دي ليل نهار بتتوجع وبتشتكي من عضمها 

ومن هضمها وعندها صداع وكساح ولين عظام 

وعندها كمية أمراض ما يعلم بيها إلا ربنا

تصحيها من النوم وانت نازل شغلك 

وتبقى هي نايمة ١٠ ساعات عادي .. تلاقيها تتوجع 

آه يا عضمي يا أنا يا أبا .. إمتى ؟

ده إنتي لسه صاحية .. يعني احنا لسه عاملين ريستارت للسيستم

ما تعرفش كانت بتجري في الحلم ولا ايه 

فين الفطار يا بنتي ؟ مفيش فطار .. أقولك

خلي زميلتك في الشغل تفطرك .. ده إنتي بايعة القضية بقى 

ترجع من شغلك تلاقي البيت زريبة كل حاجة محطوطة مش في مكانها

عارف لما يبقى فيه موقع جريمة ويدخل الظابط يلاقي 

القتيل مرسوم حواليه بطباشير كده 

تلاقيها قاعدة وسط الكراكيب والزبالة بالشكل ده 

وأكنها اترمى عليها قنبلة .. فين يا بنتي الغدا ؟

ما عملتش .. من غير ليه الرد معروف .. مش قادرة 

ولما تسألها هعمل ايه دلوقت ، ولا لو مرة زعقت لها 

تلاقيها بتقول ما هو أنا مش الشغالة اللي اشتريتها 

يا ستي انتي مش الشغالة .. بس هو انتي ايه ؟

يعني نقلوكي مع العفش بالغلط .. ما هو لا بتطبخي 

ولا بتنضفي ، ولا بتشتغلي هنقول مثلاً انك مشغولة 

ولا بتربي عيل .. لأنك مش قادرة تحملي وتخلفي 

طب نقعد مع بعض شوية بليل تقولك مش قادرة 

تعبانة طول النهار .. في ايه بقى ؟ في ايه ؟

كنتي مثلاً بتلعبي فيفا .. كنتي بتذاكري ولا بتحضري دكتوراه

تعبانة من ايه ؟ من الكنبة دي للكنبة دي .. مشوار برضه

والزوجة دي كل اللي عايزاه من الدنيا مرهم فولتارين 

وبنادول علشان الصداع اللي ما بيروحش .. وتتغطى وتنام 

النوع الثالث : سيدة الأعمال 

طبعاً لما بنقول على واحدة إنها سيدة أعمال 

ده معناه إنها عندها بيزنس وشركات وجمعيات 

وحسابها البنكي مليان ، لكن مش هو ده المقصود خالص

الزوجة سيدة الأعمال مقصود بيها 

الست اللي ماشية ليل نهار بالأعمال .. السفلية

وده مش بعد الجواز بس .. لا ده الموضوع بدأ من بدري 

يعني تلاقي نفسها عدت سن الخمسة وعشرين وما اتجوزتش 

تروح لشيخ تعمل عمل وتشربهولك .. 

تيجي على وشك وتتجوزها .. اتجوزت خلاص 

تخلف بقى .. هل هنبدع مثلاً ونخلف زي البشر 

لا طبعاً .. دي بمجرد ما عدى على الجواز ٣ ايام 

من غير خلفة .. تروح لنفس الشيخ .. تعمل عمل علشان تخلف 

خلفت وابنها ما اتكلمش بعد سن شهرين .. تروح تعمل عمل 

علشان الولد يتكلم أربع لغات .. 

الولد اتكلم عادي في السن الطبيعي .. 

تبدأ بقى تبص حواليها .. ده جوزي ممكن يتخطف مني 

تروح تعمله عمل إنه يشوف كل الستات غيرها قرود 

جوزها ما بيبصش لغيرها وملتزم وحياتها ماشية مظبوط

ده إيه الملل ده .. تروح تعمل عمل لجارتها علشان لا تخلف 

ولا تنجح في حياتها وجوزها يرميها في الشارع 

والزوجة سيدة الأعمال يتخاف منها الحقيقة 

لا انت عارف تزعقلها على حاجة غلط ..

 ولا عارف تحاسبها على تقصير .. ولو زهقت منها 

وجبت أخرك مش عارف تطلقها 

ما تستجريش أصلاً تاخد قرار زي ده 

تعملك عمل تخليك في عين الناس خنزير 

ولو واحدة عامية وافقت بيك .. تلاقي نفسها متجوزة أختها 

يعني مفيش حل معاها ..؟ لا طبعاً فيه حلول

أذكار الصباح والمساء .. أول ما تصحى من النوم 

وقبل ما تنام .. ودايمًا وانت داخل أو خارج 

تقرأ قرآن وبالذات الآية اللي بتقول

وجعلنا من بين أيديهم سدًا ومن خلفهم سدًا 

فأغشيناهم فهم لا يبصرون .. 

وتصبر وتحتسب صبرك عند الله وربنا هيعوضك 

ومسير حد فيكوا هيموت قبل التاني .. 

في الحالتين .. إنت كسبان .. ربنا يجعل كلامنا خفيف عليهم

النوع الرابع : فاقدة الأمل 

والزوجة دي لو رجعت لورا عشرين سنة 

هتلاقيها وهي طفلة لما بتتسأل السؤال المشهور 

نفسك تطلعي ايه لما تكبري ؟ تقولك عروسة .. 

بس هي طموحها تلبس فستان فرح وتتزف وتتجوز 

طيب اتجوزت ، واتجوزتك انت تحديداً يا قليل البخت 

خلاص طموحها في الدنيا انتهى .. 

مش محتاجة حاجة من الحياة تاني

هي مش حضرت فرحها .. ولبست فستان 

وانبسطت هي وأمها وأخواتها .. خلاص الحياة بالنسبة لها 

ملهاش قيمة تمامًا .. لا هي عايزة تخلف 

ولا في دماغها لو خلفت صدفة انها تربي .. 

ولا عايزة تكمل دراستها مثلاً ، ولا عايزة تعمل مشروع 

ولا عايزة تشتغل .. ولا حتى تعمل جمعية 

هو كل أملها في الحياة أخدته يوم الفرح

حنة واتحنت .. طلي بالابيض وطلت .. زفة واتزفت 

ما توجعوش دماغها بقى ، ودي على قد ما هي ما بتعملش حاجة 

لا صح ولا غلط ، هي حرفيًا ما بتعملش حاجة 

ولكنها مريحة .. تحس انها قطعة ديكور في البيت 

تجيبها هنا تحطها هنا .. هي معندهاش مشاكل في حاجة

تنام بدري تصحى بدري تطبق تنام متأخر واحد 

تطبخ ما تطبخش واحد .. مفيش حاجة لا بتزعلها 

ولا حاجة بتفرحها .. الحياة معاها سادة .. وساكتة 

لدرجة تخليك تحس إنها مش موجودة 

تعرف بنات عليها معندهاش مشاكل 

تتجوز عليها تقولك مبروك .. تسافر وتسيبها 

خمس سنين ترجع تلاقيها في نفس الكرسي اللي كانت قاعدة عليه 

بس زي ما قولنا على قد ما الزوجة دي مملة 

ولكنها مسالمة .. يعني عمرها ما تدخل معاك في نقاش 

ولا تخلق مشكلة .. عايز انت تعمل أكشن ومشاكل 

تزعق عادي .. عايز تطلقها .. برضه كويس 

هي اتجوزت خلاص .. لو اتطلقت يبقى كتر خير الدنيا

والزوجة فاقدة الأمل ، هي مجرد إنها سبب تتحسد عليه

وبتتحسب عليك إنك متجوز .. لكن مفيش أي حاجة تدل على كده 

لا مرة مثلاً تديها فلوس كتير فتغير في نوع الأكل 

ولا مرة تديها فلوس قليل فتعترض 

ولا فارقلها حياة من موت .. 

النوع الخامس : مش ملزمة 

والنوع ده من الزوجات انتشر في الفترة الأخيرة 

بعد ما دقت طبول الحرب بين جمهور المذيعة رضوى الشربيني

وفي الناحية التانية جمهور المذيعة ياسمين عز 

وبدأ يظهر مصطلح على السوشيال ميديا

مش ملزمة .. ودي واحدة ست .. إكتشفت بعد آلاف السنين

إنها كست أو كزوجة مش ملزمة بأي حاجة 

لا هي ملزمة تحمل عايز عيال قدامك طريق التبني مفتوح 

 ولا ملزمة تولد ما هي ما حملتش أصلاً علشان تولد

وبالتالي مش ملزمة ترضع ولا ملزمة تربي 

ولا ملزمة تطبخ ولا ملزمة تنضف البيت هاتلك شغالة

ولا هي ملزمة بأي حاجة في الدنيا 

طب يا ستي يا اللي مش ملزمة 

أنا كراجل ملزم إني أنزل أشتغل وأجيب فلوس 

وأصرف على البيت أكل وشرب ولبس 

وما أخليش البيت محتاج حاجة .. لما هجيب شغالة 

تشتغل شغل البيت وتطبخ ، ولما أعوز أخلف أتبنى طفل

يبقى أنا دفعت دم قلبي في جواز ليه من الأول

ولا ايه اللي جابرني أني أصرف على البيت بقى 

ما أنا كمان مش ملزم .. ولا انتي ماسكة عليا زلة

ولما تيجي تعترض تقولك طلقني لو مش عاجبك 

وطبعاً دي حيطة سد .. هي عارفة هي بتعمل ايه 

طلقني يعني نفقة وتسيب الشقة اللي انت دفعت فيها دم قلبك

وتروح تعيش جنب أمك بقى .. 

وبعد ما تديها كل قرش حوشته تحبسك عادي 

فعلى ايه يا عم .. خلاص خليكي مش ملزمة 

وانا هتجوز واحدة ملزمة تفطرني وتخليني عايش في مكان نضيف 

وتخلفلي حتة عيل يلحق معايا اليومين 

اللي باقيين من عمري ، ما هي العيشة معاكي تقصر العمر 

والزوجة الغير ملزمة ، حاجة من اتنين 

يا إما ما كانش عندها رغبة في جواز 

واتجوزت علشان تخلص من الزن عليها

يا إما كان نفسها تطلع راجل ، بس مجموعها ما جابش

ولو وقعت في يوم في النوع ده .. اعرف انك عامل ذنب كبير جدًا

وده تكفير ذنوب .. معلش اهي حاجة تخفف عنك حساب الآخرة برضه 

النوع السادس : البلوجر 

ودي زوجة بقى ما بيتبلش في بوقها فولة 

يعني تتخانق معاها خناقة عادية خالص 

تلاقيها فاتحة لايف وبتفضحك بين الخلايق 

عاملتها كويس وجيبتلها هدية تلاقيها فاتحة لايف 

بتحكي إنك أحسن راجل في الدنيا

علشان الهدية أم اتنين ونص وسايبة لينك المحل في الكومنتات

تبقى ماليلها التلاجة والفريزر لحمة وفراخ 

تلاقيها عاملا فيديو موضوعه 

جوزي سابلي ٣٠ جنيه وقاللي هعزم أهلي على الغدا 

عايز أجي ألاقيكي محضرة سفرة ل ٢٠٠ فرد

وعنوان الفيديو عزمت أهل جوزي ب ٣٠ جنيه 

تابعوا لآخر الفيديو علشان تعرفوا رد فعل حماتي 

تبقى ما عندكش وقت تبص حواليك ، ودي علشان الريتش

عاملة فيديو عنوانه جوزي عايز يتجوز عليا 

مش هتصدقوا عملت فيه إيه .. وتدخل الفيديو تلاقيها 

جايبة موزة بتلو وأكياس بلاستيك وبتقطع وتكيس وتحط في الفريزر

ده غير بقى يومياتها الثابتة .. سلفتي وحماتي 

والزوجة من النوع ده من كتر ما هي أونلاين 

وقاعدة تعمل في يوميات وحوارات على اليوتيوب 

مجرد ما النت يقطع عليها تلاقيها بتتعامل معاك كأنك مشاهد 

أو واحد من الفولورز .. يعني تدخل عليك 

في ايدها بخمسة جنيه طعمية عادي جدًا 

وبتقولك تعالى شوف أحلى طريقة لعمايل الطعمية في البيت 

ضعف الكمية اللي بنشتريها من بره 

مش هتصدق فضلنا ناكل فيها قد إيه 

يا ولية ده أنا اللي شاريه من تحت حالاً

ولو عجبتك الطريقة اعمل لايك .. 

والزوجة البلوجر ، ما ينفعش أبدًا إنك تعيش معاها مستور

كل حاجة بتحصل في البيت بالنسبة لها محتوى 

كل كلمة بتقولها أو عايز تقولها 

تأكد إن هيشوفها ويسمعها ملايين البشر على اليوتيوب

كل حركة محسوبة عليك .. ما تتخيلش الكاميرا محطوطة فين

في الدولاب .. في الحمام .. في بنطلونك 

انت أونلاين .. ولايف طول الوقت يا معلم 

فدي ما ينفعش معاها المثل اللي بيقول 

داري على شمعتك تقيد .. 

النوع السابع : تاكل وتنكر 

وده نوع من الستات أو الزوجات تبقى عايشة في نعيم 

بقالها عشر سنين معاك وأول ما صوباعها يخبط 

في رجل الكنبة مثلاً ولا يجيلها برد ولا حاجة إنت ملكش ذنب فيها 

تلاقيها بتقولك أنا عمري ما شوفت معاك دقيقة حلوة 

مش يوم حلو .. لا دقيقة .. ده أنا وأنا في بيت أبويا 

عمر ما جالي برد .. ليه بتتغدوا بنادول 

تبقى قاعدة في البيت لا بتشتغل ولا تعرف شكل الشارع 

وبتلبس أحلى لبس وتاكل أحلى أكل 

وكل أسبوع بتخرجوا في حتة ويحصل مرة 

إنك مثلاً اتنرفزت عليها بسبب جريمة عملتها 

ولعت في الشقة مثلاً بدون قصد .. حاجة تنرفز برضه

تروح واخدة جنب ، وتقولك عمرك ما قولتلي كلمة حلوة 

يا بنت الناس .. ما هو انتي ولعتي في الشقة 

ده مش وقت كلام حلو أبدًا .. هقولك ايه حلو 

برافو .. ايه النار الحلوة دي تسلم ايدك 

تبقى انت طالع عينك في الشغل وجايبلها 

أكل الشهر كله تحطه في الفريزر وتنساه بره

ولا تفصل عنه الكهربا .. فيبوظ .. شقا شهر 

بتبقى عايز تضرب نفسك بالنار زي حسين فهمي 

في فيلم العار .. فتزعقلها بدل ما تتجنن زي محمود عبد العزيز

في نفس الفيلم وتدور في السقة تغني الملاحة .. الملاحة وحبيبتي ملو الطراحة

تلاقيها تقولك عمرك ما جيبتلي حاجة .. 

ما انا جيبتلك أهوه ياستي وانتي اللي بوظتيه

النوع ده من الستات ، مهما تعمل معاها من خير 

أو من حلو تحسسك إنك ما بتعملش حاجة 

وده ذكاء في حد ذاته . لأن فكرة إنك تكون دايمًا

مطالب إنك تعمل حاجة لأنك مقصر 

هتخليك دايمًا بتجري وبتعمل علشان حد يقولك برافو

حاجة كده شبه التارجت في شركات القطاع الخاص 

لو قالولك عاش هتريح .. لازم يحسسوك بالتقصير طول الوقت

والحل مع الزوجة دي تريح دماغك وما تعملش بجد 

 مادام الحلو عندها زي الوحش .. 

الزوجات أنواع كتير جدًا .. ياريت لو مريت بتجربة مشابهة

للي اتكلمنا عنه في المقال النهارده تقولنا في الكومنتات 

أو لو بتمر تعرف حد عنده صفة من الصفات دي 

جمد قلبك واعمله منشن .. وما تنساش تشترك في المدونة

علشان يوصلك كل جديد

وبكده تكون انتهى مقالنا النهارده عن 

أنواع الزوجات الجزء الأول .. استنونا في مقال جديد