أوقات فراغ - كيف يقضي الرجل العربي وقت فراغه ؟!

 

أوقات فراغ - كيف يقضي الرجل العربي وقت فراغه ؟!

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا ..  

أهلاً بيكوا مرة تانية في مدونتكم ، وموضوع مقالنا النهارده

الاوقات اللي بنفضى فيها الاوقات اللي المفروض تكون سبب في سعادتنا

 او تطويرنا او اننا نتعلم فيها مهاره جديده 

ولكنها على العكس تماما بتكون اوقات كافيه اننا 

يا اما نبوظ صحتنا وندمرها 

يا اما نبوظ علاقاتنا وتخسرنا كل الناس اللي حوالينا

 حلقتنا النهارده عن اوقات الفراغ والناس في اوقات الفراغ 

وبالنسبه للناس في اوقات الفراغ بيتقسموا لأنواع كتير

 منهم اللي بيمارس هواية بيحبها ومنهم اللي بيتعلم حاجه جديده 

منهم اللي بيقرا ولا يلعب رياضه ولا مزيكا 

وكل دي حاجات حلوة بس مش موضوعنا خالص

 احنا موضوعنا النهارده عن انواع الناس

 في وقت الفراغ اللي بيستغلوه اسوء استغلال

النوع الأول : حارس الثلاجة

وده الراجل اللي بيكون طول اليوم طالع عينه في الشغل

 ولا عنده اصحاب ولا عنده هوايات ولا حاجه يعملها في حياته

 قد ما كل نشاطه في الدنيا 

انه يرجع من الشغل ينام له ساعتين

 يصحى يفتح التلفزيون ويشد كرسي ويقعد قدام باب التلاجه

 اللي مخلص عليها مرتبه يقلب في التلفزيون على قد ما يقلب

 لقى فيلم كويس ولا ماتش كوره يبدأ ينقنق بقى 

صوباعين محشي بايتين .. حتتين فاكهه .. شوية سلطه أي حاجة

 المهم انه ما يعطلش وأكنه في شيفت مسائي زيه زي الشغل بالظبط

 له احترامه وتقديره وعنده تارجت مهم

 انه يخلص كل اكل امبارح علشان يملى التلاجه مرة تانيه أولا

 قبل ما الاكل القديم يبوظ ويترمي لانه ممكن يموت فيها 

وثانيا علشان يلاقي مساحة يحط فيها جديد

 والراجل ده صعب تخرجه من البيت لأي سبب من الاسباب

 مش حباً في البيت قد ما هو بيعز التلاجه

 واستحاله حد ياخذ من التلاجه حاجه طول ما هو موجود 

لذلك اغلب الناس دي بيكونوا عايشين لوحدهم

 وفي الوقت اللي هيدخل ينام فيه بيجهز ستيك نوتس

 ويبدأ يكتب على كل صنف ده سايب منه في التلاجه

 هو سايب كام واكنه بيعمل جرد

 علشان لو عايش مع حد تاني 

يعرف مين بياخد من وراه ايه

 وده ما تعيش معاه في مكان واحد يا صاحبي

 يا اما تشتري ثلاجتك وتسيبه هو وتلاجته في حالهم

النوع الثاني : صاحب الريموت 

والنوع ده من الناس وقت فراغه كله سواء بقى

الكام ساعة اللي بعد الشغل دول 

أو حتى الويك إند قائم كله على التلفزيون 

وعنده جدول ملتزم بيه على حسب 

مواعيد عرض المسلسلات والأفلام اللي بيتفرج عليها 

وبناءًا على الجدول ده .. حياته كلها بتترتب 

يعني مواعيد أكله .. لازم تبقي قدام التلفزيون 

فنجان القهوة ، كوباية الشاي بتاعت العصر 

كل حاجة بيعملها في حياته مرتبطة بالتلفزيون 

وهتلاقيه دايمًا على أكتر كنبة مريحة في البيت 

واخد زاوية وأكنه حاجز تذكرة درجة أولى 

في الاستاد .. ومن كتر قاعدته على الكنبة

فتحس انه بقى شبهها بقى هو وهي حاجة واحدة 

ما تعرفش تفصلهم عن بعض إلا لو قطعت اللحم عن قماش الكنبة كده 

ماسك الريموت بقى طول الوقت ومعاه الجدول جنبه 

من الساعة كذا للساعة كذا المسلسل الفلاني

من الساعة كذا للساعة كذا الفيلم العلاني 

وهكذا .. ما بيعملش أي حاجة في اجازته

إلا أنه بيقلب من قناة لقناة 

وبين كل فاصل والتاني بيعمل حاجاته الضرورية 

يعني يدخل الحمام .. يسخن الأكل .. 

ينزل يشتري حاجة ويرجع جري 

وطبعاً راجل بالشكل ده ملوش أي احتكاك بحد 

ولا بشيء عموما غير ريموته 

ولا له اصحاب ولا بيخرج من البيت 

إلا للشغل اللي للأسف مضطر يروحه 

والمشكلة مع النوع ده .. إنه أي حد يقدر ينرفزه بكل سهولة 

يعني خليه يسخن الأكل كده بس 

وخبي الريموت منه في اي حتة 

ممكن يقطع الأكل فيها ولا يعمل جريمة 

وهتبقى ليلة مش فايتة .. 

النوع الثالث : فاقد الوعي

وده النوع الاشهر بين الناس كلها في وقت الفراغ

 ده اللي بيقضي وقت فراغه كله 

واجازاته على السرير ، بياكل ويشرب ويسهر 

ويتفرج ويلعب وهو على السرير 

ما بيقومش منه الا للشديد القوي

 ولو حد سأله انت هتفضل في سريرك طول اليوم

 يقوله برتاح من الشغل ولو قام يلاقي جسمه مكسر

 فيرجع يرتاح تاني ، وده مجرد ما تدخل عليه اوضته 

تلاقيها مكمكمه ما شافتش شمس من سنين

 وتلاقي جواها كل حاجه وأي حاجه تقريبا 

بلاي ستيشن .. جيتار .. ورق ساندوتشات 

مناديل مبللة .. اتاري من لما كان صغير .. مجلات ميكي

 كتب أحمد خالد توفيق ، والرجل المستحيل 

ازايز بيبسي فاضية كتير .. كل أنواع الألعاب اللي في الدنيا 

كوتشينه .. بنك الحظ .. اونو .. لودو .. 

شطرنج .. دومنه .. طاوله .. وأي حاجه تايهة في الدنيا

 تلاقيها في اوضته وكأنك دخلت ثقب دودي 

عالم كامل جوه الاوضه ، المهم انه ما يضطرش يقوم من على السرير 

لأي غرض ايًا كان 

كل حاجه حواليه .. والراجل ده كل حاجه بتحصل وهو في سريره

 يعني صحابه يكبروا يتجوزوا يخلفوا 

 وأولادهم يتجوزوا ويخلفوا وهو لسه موجود في مكانه

 نايم ..يا اما بيرتاح من الشغل .. يا اما بيرتاح من تكسير ضهره

 من نومته على السرير .. وده صعب جدا تلاقيه في شارع

 ولو لاقيته في شارع هتلاقيه مستعجل جدا 

وبيعمل حاجتين اثنين بس .. يا بيتاوب يا بيبص في الساعة

 علشان يلحق ينط على البيت على سريره

 المكان الوحيد اللي بيرتاح فيه في حياته

النوع الرابع : المرازي

وده الراجل اللي بيستنى الاجازه 

من الأسبوع للاسبوع علشان يرازي في الناس بس 

فاكرين زمان الناس اللي حضرت التليفون الارضي

 كان في معاكسات .. تلاقي حد بيرن على تليفون البيت

 يصحي البيت كله من النوم جري على التليفون

 وفي الاخر يقول لك انا الميلامين جامد ومتين 

او يقول لك شركه المياه معايا اي مرازيه وخلاص واي قله مزاج 

اهو الراجل ده نفسه لما كبر بقى في وقت فراغه

 ومع تطور السوشيال ميديا بيدور على طرق جديده 

يدخل يرازي الناس بيها .. يعمل اكاونت بنت 

ويرتبط بابن خالته لمدة خمس سنين ويتفقوا على الخطوبه 

وهيسموا ولادهم ايه .. يدخل يعمل كومنتات من نوعية 

اللي مش متابعني فايته كتير .. يدخل للفنانين على الخاص

 يقلش عليهم .. يتصل ببرامج التلفزيون اللي بتستضيف شيوخ

 ويألف مشكله تحسسك ان المسيخ الدجال عايش بينا 

وهكذا .. ربنا مش هاديه ولا حاجه هداه الا الشغل

 اللي بيجي رحمه له وللناس اللي حواليه

 وهي دي بالنسبه له الاجازه ووقت الفراغ

 كل ما يرازي ناس اكثر ينبسط ويعمل دماغ اكثر 

وده ما تصاحبوش لان طول ما انت في دايرة علاقاته 

سواء انت حبيبه او عدوه هيرازيك وهيقلقك وهيعمل لك خرم في دماغك

 فلما تلاقي النوع ده من البشر 

تقطع علاقتك بيه تماما ولا تعرفه رقمك علشان ما يعاكسكش 

ولا الفيس بوك بتاعك علشان ما يشتغلكش 

واقولك ولا عنوانك .. لأنه ممكن يبعتلك جوابات يخيلك 

بص اقطع علاقتك بيه تماماً 

النوع الخامس : أبو شنطة بلاستيك 

وده اللي مجرد ما يلاقي عنده ساعه فاضيه

 ينزل على السوبر ماركت يبضع 

بسكوتات .. كنزات .. حلويات ، وهكذا 

طالع نازل ، الاسانسير شغال لمزاج مزاجه 

والبقال اللي تحت البيت شغال على حسه 

وقبضه رايح على التفاهات دي

 ودايمًا شايل شنطه بلاستيك سودا

 علشان لا جارته تعرف هو جايب ايه

 ولا البقال اللي جنبه يعرف انه شاري حاجه من بره

 ومش شاري من عنده .. تيجي الاجازه من هنا 

يخلص راتب الاسبوع كله على الكلام ده 

وينزل الشغل شحات مش لاقي ثمن المواصلات 

لعند نهايه الاسبوع اللي بعده ، وهكذا 

وطبعا النوع ده من الناس له خصومات في كل حته

 وفي ناس كتير معتمدة عليه في دخلهم الشهري 

وعايشين على مصاريفه دي

 زي البواب اللي كل مشوار بيبعتوا يجيب له اللي هو عايزه

 بياخد فلوس .. زي الدليفري بتاع السوبر ماركت وغيرهم كتير 

وجود الناس دي مهم جدا علشان العالم يكمل والحياه تستمر 

فمن غيرهم هيحصل تضخم وكساد .. والبضاعه اللي في المحلات 

مش هتتباع لعند ما صلاحيتها تعدي وتعفن

 فالناس دي بتشارك بشكل اساسي  ومهم في اقتصاد البلد

 فلو في حياتك حد من النوعيه دي .. اهتم بيه

 وامسك فيه بايديك واسنانك لأنه في أي وقت

 هتحس ان مزاجك مش مظبوط وقاعد في البيت مفلس

 خد بعضك واطلع عليه هيعدل لك مزاجك

 وهتلاقي عنده من كل فيلم حدوته .. بسكوتات جايز

 شوكولاتات ماشي .. شيبسي ما فيش مشاكل

 بيبسي ما يضرش .. آيس كريم ما يسيحش وهكذا 

وعمره ما هيسالك على حساب 

ولا هيستنى منك ترد له العزومه

 لانه ما بيفضاش و دايمًا كيسته البلاستيك مليانه

دلوقت بعد ما اتعرفتوا على أنواع الناس في وقت الفراغ 

ياريت لو تعرف حد شبه نوع من الأنواع دي 

او لو عندك تجربة زي حاجة من الحاجات اللي حاكيناها

قولنا في الكومنتات

وما تنساش تشترك في المدونة

علشان يوصلك كل جديد .. وبكده تكون انتهت مقالتنا النهارده

أشوفكم على خير