العائدون من الخارج ، ماذا يتغير في طباعنا بعد الغربة ؟!

 

العائدون من الخارج ، ماذا يتغير في طباعنا بعد الغربة ؟!

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن الناس اللي واحشانا .. اللي لسه راجعين أرض الوطن

بعد غياب سنين .. الناس اللي بقى كلامهم مكسر 

الناس اللي كل واحد فيهم راجع معاه مروحة وكاسيت 

قبل ما يلغوا الكاسيت .. حلقتنا النهارده عن العائدون من الخارج 

الناس اللي جاية من الغربة .. صحابنا اللي عشرة سنين 

قرروا يلعبوها صح . ويشوفوا مكان السنة فيه 

بحسبة عشرة من عندنا .. الناس اللي مستعجلين 

على الجواز ، قبل ما يخلصوا تحويشة العمر

أصحاب الإقامة والفيزا .. 

والعائدون من الخارج أنواع كتير .. 

النوع الأول : الخليجي 

وده صاحبك اللي قضى معاك ٢٠ سنة من عمره 

وبعد ما اتخرج وخلص جيش بيقرر انه يسافر 

اي دولة عربية .. يشتغل علشان يكون مستقبله 

وده الشخص اللي بيكون عنده القدرة على التكيف 

مع اي مكان يسافرله .. لدرجة بتخليه يغير جلده 

مش لبسه بس .. يعني يبقى خارج من مصر 

من سنة واحدة بس ١٢ شهر 

وراجع زيارة لأهله ، وطول السنة اللي مسافرها 

كنتوا بتتكلموا وتتواصلوا وكان بيتكلم عادي 

زي م سابك من كام شهر .. ينزل من السفر 

وبمجرد ما رجله تحط في ارض المطار 

تلاقيه واحد تاني .. مسخ .. بيتكلم خليجي 

مكسر على مصري مكسر .. وبدل ما كان بيقول فلوس 

بقى بيقول مصاري .. وبدل ما كان بيقول اخبارك 

بقى بيقول علومك .. وايش تسوي وكيف حالك 

وده راجع علشان يثبت للناس إن السفر غيره 

أيوه هي ممكن الغربة تغير فيك صحيح 

بس تغير في طباعك .. يعني تخليك ملتزم 

واخد بالك من مصاريفك .. مواعيدك .. مظهرك 

لكن مش لدرجة تخليك تغير لسانك وتعوجه 

وبعدين ده حصل إزاي وامتى ؟ 

ما احنا متكلمين امبارح على الماسنجر 

وكنت بتتكلم مصري عادي ولا لازم أي حد 

يحط ايده في ايدك يعرف انك كنت مسافر 

ده بالنسبة للكلام بس .. غير طباع تانية اتغيرت 

زي طريقة اللبس اللي اتبدلت من التي شيرت والدلع ده 

لجلاليب بيضا والسبحة اللي ما بتفارقش ايده 

مع انه لا بيصلي ولا بيسبح ..غير بقى العربية 

اللي راكبها اللي نمرها جمرك علشان الناس تقول عليه 

ده راجع معاه ومليان ، ده غير بقى القعدات اللي بقت 

تتقلب كلها كلام عن الغربة والعادات هناك 

وفجأة تلاقيه بعد ما كان انطوائي ومحدش يعرفه 

تلاقي ترابيزته على القهوة بقت مزار 

لكل راغب في السفر وأكنه القنصل 

والناس داخلة عليه بورق وخارجين بورق 

أكنه مكتب تساهيل .. وده تديله مجاله تماماً 

ما تحرجوش .. هو الراجل جاي اجازة شهر وراجع 

اديله مساحته ، وخليه ياخد راحته .. 

ولما تبقوا لوحدكوا هزقه عادي براحتك 

علشان ما يبقاش ينسى أصله بعد كده 

لأنك مش هتقعد طول الاجازة تفكره بعمك فلان 

يفضل ساعة يفتكر .. وهو عمه اخو ابوه 

يا ابني انت سافرت سنة واحدة

مش فقدت الذاكرة .. فبلاش ادعاء بقى 

النوع الثاني : السحيل 

وده صاحبك اللي متغرب بقاله سنين طويلة 

وراجع بقى معاه قرشين عايز يعمل كل حاجة

فاتته في عشر سنين الغربة في اسبوع واحد بس 

عايز يسافر ويصيف ويشتري شقة ويخطب 

ويشتري لبس ويجرب كل مطاعم الدنيا 

ويعمل وديعة في البنك علشان الزمن 

ويلعب بلاي ستيشن ويحجز حجز كورة ويجيب جون 

وكل حاجة ممكن يعملها شاب مصري 

بس وقته محدود .. محدود .. كل ده في أسبوع 

وطبعاً هيعمل الكلام ده كله لوحده ؟ لا إزاي ؟ ودي تيجي ؟

مفيش غيرك صاحبه وحبيبه اللي ما افتكركش حتى بسبحة 

لازم تتسحل معاه وتشيل وتحط وتختار وتصور 

وتفاصل وتفاوض .. وتجرب وتفرغله نفسك نهائيًا 

معندوش فكرة بقى انك عندك حياة بتعيشها 

مقيم هنا مش جاي اجازة وماشي .. 

وده بقى نازل معاه جدول بأيام الأسبوع 

وحضرتك بقى معندكش من الأسبوع ده إلا يوم اجازة حزين 

بتقضيه نوم علشان تعرف تكمل باقي حياتك

وما تترفدش من شغلك وتتشرد في الشوارع

ولما تقوله أو بس تبين انك مشغول ولا مضايق ولا مرهق 

تلاقيه بيقولك بكل بجاحة .. وايه اللي فيها يعني

لما تاخدلك اسبوع اجازة ؟ علشان صاحبك يا اخي 

لا مفيهاش حاجة .. أنا لو قلت للمدير عايز يوم اجازة واحد 

مش أسبوع هيجيب مكاني عشر انفار 

اه ما انت مش حاسس بحاجة .. انت مغيب يا بيه 

فاكرنا عايشين في كاليفورنيا هنا 

المهم انه بينفض لكل أحزانك وحواراتك دي كلها 

ويستلمك بقى.. يكلمك من النجمة يلا قابلني 

تنزل تقابله تلاقيه ساحلك وراه في مليون مشوار 

يخلوا أعصابك تتلف .. ودماغك تسيح من الشمس 

ورجلك تورم من كتر المشي .. 

وما يسيباكش إلا مع أذان الفجر .. 

وتلاقيه بيصحيك بعدها بخمس دقايق علشان تبدأوا يوم جديد 

طبعاً ما هو معندوش وقت .. وعلى كده بقى طول الأسبوع 

والغريب يا اخي انه أول ما يرجع يسافر 

ينساك تمامًا ويسقطك من حساباته وما يفتكركش الا في اجازته الجاية بقى 

وده بقى أول ما ينزل في الاجازة الجاية 

وتعرف المخطط بتاعه ، اقفل موبايلك 

لأن الشخص ده هيخسرك صحتك وشغلك 

ومش بعيد تتبتر على عيشتك كمان 

النوع الثالث : المتطور

وده صاحبك اللي كان خارج من مصر معندوش فكرة عن حاجة 

لا يفقه شيء عن شيء حرفيًا 

لا مؤاخذة زي التور ما يعرفش عن الحياة

إلا انه لازم يجيب فلوس ياكل بيها

ويحوش منها علشان يتجوز ويخلف 

يسافر علشان هدفه المنشود وهو على وضعه ده 

ويرجع بعد كام سنة تلاقيه اتحول ..

 أكنه اتخرج من الاعدادية ودخل طب على طول

اكنه اتعمله غسيل مخ .. فجأة بقى بيتكلم بذوق وأدب 

بيلبس كويس .. فاهم حاجات كتير عن حاجات كتير 

فاهم في احدث الموبايلات والعربيات 

ومتابع التقنيات الحديثة .. ومتابع سوق الانتقالات 

في الدوري الانجليزي .. وبيتكلم لغات بعد ما كان بيتكلم عربي بالعافية 

وداري بكل حاجة .. ثقافة .. سياسة .. فن .. مسرح

ما تفهمش هو نفسه اللي سافر ولا اللي سافر ده 

جمدوه واستنسخوه وبعتولنا نسخة محدثة ولا ايه

وبعد ما كانت خطته في الدنيا اكل ايه واشرب ايه 

وأخلف كام جوز منهم كام دكر وكام نتاية 

بقى عنده خطة واضحة ومحددة لكل يوم في حياته اللي جاية

والعينة دي من الناس السفر والغربة فيهم حلال 

ولولا السفر .. كان زمانه بيجري ورا معزتين 

في اي غيط وما يعرفش عن الدنيا غير الأكل والشرب

النوع الرابع : المقارن 

وده صاحبك اللي وهو كان بيركب الطيارة علشان يسافر 

كان مقضيها عياط ونحيب ، ومش قادر يسيب البلد 

اللي بيموت في شوارعها وحواريها 

وبينهل من ماية نيلها .. وبيعشق تكاتكها 

وبيرقص على مهرجاناتها ، وبيضرب من مخدراتها 

متشحتف .. ومش عارف هيسيب البلد ازاي

الكام سنة بتوع الغربة .. يسافر من هنا يقعد الكام سنة 

ومجرد ما ينزل من الطيارة في مطار القاهرة

يقابلك وهو مكشر ومضايق ومش عاجبه حال البلد

دي اللي كان بيعشق حواريها من كام سنة بس 

يستلمك بقى يكرهك في عيشتك .. 

ويفضل يعملك في مقارنات بين هنا وهناك 

شايف الشوارع عاملة ازاي ؟ .. هناك الشوارع 

بتترصف بالكريم شانتيه .. شوفت الجو هنا عامل ازاي ؟

هناك الناس عايشة في تكييف 

شوفت الناس هنا ماشية ازاي ؟ 

هناك بيمشوا بالكهربا .. وشوفت شوفت 

وهنا وهناك ويطلع عين أهلك ويكرهك في طوب الأرض 

وده أول ما يشغل اسطوانته دي بقى 

يا اما تنفضله وتعمل نفسك مش سامعه والا هتتنقط 

يا إما إنك توقفه عند حده ، وتفكره بالسيجارتين الفرط 

اللي ما كانش لاقي تمنهم والعيال اللي كان بيقعد معاهم ع الناصية 

وانه لو لف ودار .. كلها عارفة بعضها

وبكده تكون انتهت مقالتنا النهارده عن العائدون من الخارج

لو مريت بموقف شبه اللي اتكلمنا عليه في مقالنا النهارده

ياريت تقولنا في الكومنتات

وما تنساش تشترك في المدونة علشان يوصلك كل جديد