أنواع القرايب "الجزء الثاني" 

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا ..  

أهلاً بيكوا مرة تانية في مدونتكم ، وموضوع مقالنا النهارده

عن الناس اللي من لحمنا ودمنا ، الناس اللي يصيبهم يصيبنا 

واللي يفرحنا يفرحهم واللي ينكد عليهم يزعلنا 

حلقتنا النهارده عن أنواع القرايب الجزء الثاني

طبعاً في المقال اللي فاتت أثبتنا بالدليل القاطع

إن أنواع القرايب كتير ما يتعدوش 

واتكلمنا عن أربع أنواع منهم .. الناصح الأمين 

اللي عارف مصلحتك فين .. والمراقب

اللي بينطلك في حتة وفي كل خرابة 

والمسخناتي اللي دوره في الحياة يسخن أهلك عليك 

والنوع الرابع كان لأصحاب الدم عمره ما يبقى ماية

واللي يبقوا مطلعين عينك وموقعين العيلة 

كلها في بعضها بس الدم عمره ما يبقى ماية.. معروفة 

وفي حلقتنا النهارده هنتكلم عن أنواع تانية خالص 

هنلاقيها في كل عيلة عربية أو مصرية .. 

يلا نبدأ على طول

النوع الأول : أصحاب الظهور المفاجئ

والنوع ده من القرايب ما نعرفش عنهم حاجة 

إلا إسمهم .. ويمكن ده كمان ما نعرفوش .. 

يعني دول قرايبك اللي لا عمرك شوفتهم 

ولا قابلتهم في حياتك ، وبعد ما يكون عندك ٣٠ سنة 

تحصل مناسبة .. فرح ولا عزا ولا أي حاجة 

تلاقي ابوك واخدك من إيدك وبيعرفك عليهم

وبيقولك بكل ثقة .. سلم على عمك 

أخوك يا بابا ؟ .. لا يا ابني عمك يبقى ابن عمة خالة ابوك 

من فرع العيلة في جنوب الوادي 

طب يا بابا هو انا ملاحق على خوازيق اللي أنا عارفهم 

ولا قادر أفلت من حواراتهم لما تجيبلي حوارات استيراد

من جنوب الوادي .. عموماً ازيك يا عمو 

وطبعاً عمو هنا ما بيسكتش .. مش يقطم كده 

يقولك مش تسأل على أهلك .. يا عمو 

ربنا يعينك على المشوار اللي انت جاي منه 

يدوب تريح ساعتين وتمسك طريق علشان توصل 

السنة الجاية .. وده النوع الاسهل والأسلك بينهم 

إنما منهم اللي تلاقيه في فرح مثلا

جاي متارجتك من بعيد .. تقريباً حد مديله صورتك 

ويسألك السؤال المعروف .. هو انت مش عارفني ؟

هو حضرتك تايه ؟ طب فيه علامة في جسمك مميزة ؟

نبلغ عنك ونعمل بيها نشرة .. طب هو قالك فين ؟

وطبعاً علشان ما تطلعش قليل الذوق

لازم ترد عليه بالرد المعروف برضه 

لا ازاي .. يا خبر يا عمو .. طبعاً عارفك 

مش يتبط بقى ويقطم .. لأ تلاقيه بيقولك 

طب أنا مين ؟ لا ما هو لو حضرتك فقدت الذاكرة 

أنا مفيش بإيدي حاجة اقدمهالك .. أخبطك على دماغك 

يمكن ترجعلك الذاكرة .. نجرب يعني 

يعني لو حضرتك حاسس بفقدان هوية 

هتحتاج لدكتور نفسي .. وده مش تخصصي والله 

أنا خريج زراعة قسم دود قز 

والنوع ده مع انه مراوغ بس تقدر تتعامل معاه برضه 

مش معضلة يعني شوية احراج ويعدوا

والصراحة مفيش أحسن منها .. قوله على طول ما اعرفكش والله 

اتقمص سهلة برضه .. يخبط دماغه في الحيط 

ما هو مش عبد الحليم يعني لازم أعرفه 

إنما بقى أصعب أنواع القرايب أصحاب الظهور المفاجئ

وممكن يسبب صدمة عصبية لعيلة كاملة 

ودول بيظهروا في وقت واحد بس 

وقت توزيع التركة .. تلاقي كبير العيلة 

راجل متدين ومرتاح ماديًا واتكل على الله مات 

بعد عمر مديد .. تقعدوا توزعوا التركة 

تلاقي الباب بيخبط وداخل عليكوا واحدة 

بتقول انها مرات جدك الله يرحمه بقى ويسامحه 

وعندها منه ١٢ ولد وبنت وشايب .. وأصغرهم 

قدك انت شخصياً.. ضاعت التركة

ربنا يعوض عليكوا .. 

النوع الثاني : كدابين الزفة 

ودول قرايبك اللي الفراغ قاتلهم 

ومعندهمش حاجة شغلاهم ، وتقريباً بيكونوا أغلبهم على المعاش 

ودول مجموعة من الناس أماكن تواجدهم المجالس العرفية 

تعرفهم من النظرة الأولى من عبايتهم الفلاحي 

وبياكلوا على كل الموائد وده مصطلح بيقال 

على الشخص المنافق .. اللي معاهم معاهم عليهم عليهم 

بس احنا هنا نقصد انهم بياكلوا على كل الموائد حرفيًا 

يعني أي مناسبة لأي حد من العيلة إسمهم مرتبط بإسمه 

من بعيد من بداية الخلق مثلا 

تلاقيهم حاضرين وقاعدين على السفرة أول حد 

ودول قرايبك اللي طول ما الدنيا ماشية كويس 

هما مختفيين ، محدش يعرف عنهم حاجة 

حابسين نفسهم ، تحصل حكاية أو مشكلة

تلاقي العبايات طلعت واتكوت .. وشدوا الرحال 

وجايين بربطة المعلم والمعلم بيكون يا إما أكبر واحد فيهم 

يا إما الوحيد اللي معاه عربية فيهم 

يعدوا عليك ياخدوك من إيدك علشان انت أصغر عيل في العيلة

وانت عندك ٤٠ سنة بس طبعاً مهما كبرت 

انت عيل بالنسبالهم علشان يغلطوك في القاعدة 

لو ما لقيوش حد يغلطوه .. 

والناس دول بيتغذوا على المشاكل 

ودايمًا بيدعوا انهم بيسعوا للصلح بين الناس 

لكن في الحقيقة هما بيجمعهم حاجتين 

أولاً الغدوة الحلوة ، ما هو مادام فيه مشاكل

يبقى لازم الطرفين ياكلوا عيش وملح 

وده مجازاً طبعًا .. والحقيقة انه بط وفراخ 

وحمام ومحاشي .. وثانيًا بيتغذوا على ألقابهم 

الحاج فلان اللي بيقعد في قعدات ومجالس عرفية 

ويقابل أي حد في الشارع يضربه بالكرباج 

والتاني ما يقدرش يحط عينه في عين عمك الحاج

لان ده لقب في بعض الأماكن سلطته ما ممرتش على لوا 

النوع الثالث : المتعشمين 

والنوع ده من القرايب بيتغذوا على العشم 

وطبعاً زي ما كلنا عارفين إنه لما حد من العيلة 

بيفتح مشروع جديد فالطبيعي إنه أول حد يدعمه 

ويشجعه هما قرايبه .. وأول حد يقف جنبه 

هما عيلته .. مش كده ولا ايه ؟ 

لكن اللي بيحصل غير كده تمامًا 

وإن القرايب من النوع ده بيكونوا هما السبب الرئيسي

انك تفلس وتقفل مشروعك بسبب العشم 

والعشم بيتلخص عند الناس دي في الحالة دي 

في حاجة واحدة بس .. وهي الشكك 

ومعروف عن الشكك انه بيتقيد في نوتة 

بس دول قرايبك يا اخي .. يعني مش هيتأخروا عنك أكيد

وطبعاً انت ما ينفعش تتأخر عنهم

ولا تحوش عنهم حاجة .. حتى لو الحاجة اللي هياخدوها دي 

ممكن تخرب بيتك .. وده بالنسبة للمتعشمين من الدرجة الأولى 

فيه بقى نوع من المتعشمين تاني خالص .. 

ودول بينحصروا في الستات ، يعني خالتك 

أو عمتك .. أو بنت خالة أبوك بالكتير  

والنوع ده بيظهر وينضج في الوقت اللي بتكون خلصت فيه 

جامعة وجيش واتوظفت في أي شغلانة 

تبدأ العزايم تظهر وتكتر ، وتبدأ الترتيبات 

والتخطيطات لأنك لازم تاخد بنت خالتك 

لأنها فجأة كبرت وادورت واحلوت وهي اللي عاملة الأكل ده 

بإيديها ليك مخصوص .. طبعاً تسلم ايديها 

مع انك انت اللي محاسب الدليفري بس مش مشكلة 

والنوع ده من المتعشمين بيكون عشمهم سبب 

في فركشة العيلة وانهاء كل العلاقات اللي بين أفرادها 

لو طاوعتهمش وطلعتلهم شكك واتجوزت كل بناتهم 

تبقى دون وواطي .. وما تستاهلش انك تبقى قريبهم 

واسمك مرتبط بإسمهم .. ودي الحقيقة مصلحة 

النوع الرابع : الشمتانين 

وده قريبك اللي بيكون إبنه خريج معهد علاج طبيعي

قسم حجامة وتبقى انت في طب 

وتلاقي كل العيلة بتحبك وبتكبر بيك 

وبيقولولك يا دكتور مع انك ما تعرفش عن الطب حاجة 

غير إنه سبع سنين .. بس بيكبروا بيك 

ولكن هو على عكس كل الناس مُصر يقل بيك 

ويختار أكبر تجمع عائلي ويقولك ياد 

ويذكر كل مساوئك وعيوبك .. قدام كل الناس 

ده كان بيشخ على نفسه .. ما هو مش لوحدي 

ما هو انت كمان كنت بتعمل وانت صغير يا عمو 

ولا انت كنت بتعرق مسك ولا ايه 

ده كان بيما بيعرفش يتكلم وهو صغير 

ما هو انت برضه كنت أكيد بتتهته 

والدغ في ٢٦ حرف من اصل ٢٨ وانت صغير 

ولا انت اتولدت مترجم فوري ولا ايه ؟ 

وده كان وده كان .. كل ده علشان غيران 

من إنك بيتقال عليك دكتور وابنه تمرجي 

والغريب بقى انه عمره ما باركلك على حاجة 

بس بمجرد ما حاجة وحشة تحصلك تلاقيه أول الحاضرين

وبيمثل انه زعلان .. وعلى وشه ابتشامة صفرا 

مش قادر يخفيها .. 

وزي ما قولنا ان القرايب انواع كتير .. 

مش بس اللي ذكرناهم وعلى قد ما اللي ذكرناه

ممكن يكون وحش ولكنه موجود في كل عيلة 

ولو مش موجود ما كانش طلع مثل الاقارب عقارب 

ربنا يحميك منهم ومن لدغتهم

وبكده تكون انتهت مقالتنا النهارده

ياريت لو عندك تجربة مشابهة للي اتكلمنا عنه النهارده

تقولنا في الكومنتات

وما تنساش تشترك في المدونة

علشان يوصلك كل جديد

وأشوفكم على خير في مقال جديدة