أنواع الزوجات (جزء ثاني) !

 

أنواع الزوجات (جزء ثاني) !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

تكملة لموضوع المقال اللي فات عن أنواع الزوجات الجزء الثاني 

وأنواع الزوجات زي ما اتفقنا كتير جدًا وزي ما قولنا في المقال اللي فاتت

فيه منهم اللي نشاطها وباورها عالي وتلاقيها بتعمل كل حاجة 

ومنهم المرهقة اللي مش قادرة تعمل حاجة 

ومنهم سيدة الأعمال اللي ممشية حياتها بالسحر والأعمال

ومنهم فاقدة الأمل اللي بمجرد ما اتجوزت مش عايزة حاجة من الدنيا 

ومنهم اللي رافعة شعار أنا مش ملزمة 

ومنهم البلوجر اللي فاضحاك علشان تعمل محتوى

ومنهم اللي بتاكل وتنكر ومهما تعملها تقول ما شوفتش منك حاجة عدلة 

وفي المقال ده هنتكلم عن أنواع تانية مختلفة تمامًا 

النوع الأول : المستثمرة 

والنوع ده من الزوجات .. تاخد منك الراتب أول الشهر

تيجي في نص الشهر تلاقيها بتقولك عايزة وعايزة 

يا بنتي احنا مش جايبين كل طلبات الشهر 

تقولك الفلوس ما بتكفيش زودلي المصروف 

وكل شهر على كده .. شهر ورا التاني 

وسنة ورا التانية وإنت بتدفع وواثق فيها 

ولا بتعمل جرد ولا بتحاسبها ولا بتاخد فواتير 

وسايب الحبل ع الغارب .. والمال السايب بيعلم السرقة

و لأن الكدب ملوش رجلين ولا ايدين حضرتك 

فبعد سنين تكتشف إنها محوشة من وراك 

وبتعمل كمية جمعيات مهولة .. وبتشغل الفلوس 

في العقارات والبورصة والأسهم وعاملة بيزنس 

السازجين أمثالك ما يعلموش عنه حاجة 

والزوجة المستثمرة ، اتربت جواها العادة دي منذ الصغر 

يعني من وهي طفلة كانت متعودة تاخد مصروفها مرتين 

مرة تصرفه والتانية تحوشه .. وتيجي اخر السنة 

تسلف البيت كله بالربا .. الجنيه باتنين 

تخيل طفلة زي دي استحالة تكون بتشتري سابلايز عادية 

زي الأطفال في سنها .. يعني أقلام رصاص وكشاكيل 

وبراية واستيكة ، لا هي أول حاجة بتشتريها 

دفتر إيصالات أمانة وختامة ، علشان محدش ضامن عمره 

طفلة زي دي لما جات تحفظ قرآن ما بدأتش بجزء عم 

زي بقية الأطفال في سنها .. لا دي اول ما بدأت 

بدأت بالآية اللي بتقول (يا أيها الذين آمنوا إذا تداينتم بدين 

إلى أجل مسمى فاكتبوه) علشان تستخدمها كحجة 

لو أبوها مثلاً حاول يستعطفها ، ويقولها هتمضي أبوكي 

أبويا ده في البطاقة .. إنما طفلة زي دي 

في البيزنس ما تعرفش أبوها حتى .. 

والطفلة دي لما كبرت شوية بقت من أوائل 

الناس اللي طبقوا نظام السيلف ستادي .. 

فلما كبرت شوية بدأت تاخد فلوس الدروس 

تحطها في جيبها وتذاكر وتضغط على نفسها 

وتنجح .. وتبقى ناحلة وبر أهلها في دروس 

محدش يعلم عنها حاجة .. وفي نهاية السنة

تلاقيها شارية حتتين دهب .. وفضل الموضوع معاها

وكبر لعند ما اتجوزت .. يعني مش وليد اللحظة 

والزوجة المستثمرة .. مثال على الفساد جوه أي مجتمع 

واحدة بتخلي جوزها يشتغل ضعف شغله 

في الطبيعي بحجة إن البيت محتاج مصاريف 

وهي قاعدة تربط ودايع وتفتح حسابات في بنوك 

من راتب جوزها الغلبان .. ولعند هنا ما حصلش مشكلة 

المشكلة لو بعد ما اغتنت تشغلك عندها 

وتبقى انت يا ولداه مجرد موظف ذليل 

في شركة مراتك .. اللي هي أصلاً فتحتها بفلوسك 

النوع الثاني : الزوجة القلودة 

والزوجة القلودة نوع مشهور من الزوجات

وخصوصاً في مصر والدول العربية 

عارف إنت الزوجة اللي لما يكون فيه فرح في العيلة 

فرح بنت خالتها ولا أخت جوزها مثلاً

وتلاقيها داخلة عليهم الفرح بفستان أبيض 

أحسن وأغلى من فستان العروسة نفسها 

وعاملة ميك آب عند حد أشطر وأشهر 

 من اللي العروسة عاملة عنده ميك آب

هي دي بالظبط في أبهى صورها ..

عرفت إن العرسان رايحين يقضوا شهر العسل في الساحل

عايزة تطلع معاهم ، تحجزلي جنبهم  

و الزوجة القلودة لازم تتحبس في البيت 

ويتقطع عنها النت تمامًا لأنها بمجرد ما بتعرف 

إن فلانة اشترت عباية عايزة زيها 

علانة اتوظفت عايزة تتوظف زيها 

إبن أختها دخل طب .. عايزة تخلف وتدخل إبنها طب زيها

بنت عمتها خلفت توأم .. لازم تعمل زيها

طب إزاي ؟ .. مليش فيه اتصرف 

والزوجة القلودة زيها زي اللي قبلها بالظبط 

مرت بمراحل كتير علشان توصل للحالة دي 

أولهم إنها وهي صغيرة إتربت على المقارنة 

وكانت أمها دايماً بتقارنها ببنت خالتها 

فبقت تقلدها في كل حاجة لبسها ومظهرها وطريقة كلامها 

ومع تقدمها في السن وإن علاقاتها بتزيد بدأت تقلد صحباتها

وهكذا لعند ما فقدت شخصيتها تمامًا ومابقتش عارفة هي مين 

وياريت الموضوع بيقف لعند هنا .. لأ

ده بيطور من إنها عايزة تقلد لأنها عايزة تعلي 

على كل الناس اللي تعرفهم واللي ما تعرفهمش من بلوجرز وغيرهم

يعني في أول فرح في عيلة جوزها

 كانت عايزة تطلع شهر عسل مع العرسان 

تاني فرح هتعرف العرسان رايحين فين ، وتروح مكان أنضف 

يعني طالعين الساحل احنا هنروح تركيا .. 

طالعين تركيا احنا هنروح المالديف ، 

طالعين المالديف احنا هنطلع القمر 

وتفضل كده تقلد وتعلي وتقلد وتعلي لعند ما تموت 

مش هي اللي هتموت .. لأ حضرتك ..

 تموت بجلطة .. تموت بسكتة قلبية

اختلفت الأسباب والموت واحد ولكن 

هيفضل السبب الرئيسي في موت سيادتك 

زوجتك القلودة ..  

النوع الثالث : متقلبة المزاج 

والزوجة متقلبة المزاج ما تفهمش حزنها من فرحها

حماسها من احباطها.. طموحها من قلة حيلتها .. تحسها ميكس كده 

وكل ساعة عندها بحال .. أو كل دقيقة 

يعني تبقى سايبها الصبح ونازل شغلك 

وهي مشغلة فيروز وبتشرب قهوة وقمر كده 

يدوب توصل الشغل وقبل ما توصل كمان 

وانت لسه في الطريق تلاقيها باعتللك فويس 

الحقني .. سايبني لوحدي للنكد وانت خارج

مالك بس يا حبيبتي ؟ ما انتي كنتي كويسة

مليش فيه .. تعالى حالاً.. تقول دي بتموت 

تلف وترجع على مالا وشك تلاقيها مشغلة فيروز عادي 

وبتكمل القهوة بتاعتها ومفيش أي حاجة

تطمن إنها عايشة وتتوكل على الله 

تلاقيها اتحولت تاني وتفضل ده طول اليوم 

رايح جاي لعند ما تكون سبب في رفدك 

والزوجة متقلبة المزاج أكبر مثال على الدنيا الغدارة 

وإن لا الفرح دايم ولا الحزن دايم .. وما دايم إلا وجه الله

والزوجة من النوع ده ما ينفعش تاخدها معاك أي مناسبة 

لأنها في الأفراح وأعياد الميلاد والمناسبات السعيدة 

هتعيط وتقلب الدنيا وتنكد على العروسة وأمها 

وفي المياتم والمناسبات الحزينة .. هتملى الدنيا ضحك 

وهتفرج عليك أمة لا إله إلا الله ، وهتنطرد انت وهي 

من كتر ما هي كل ساعة في حال .. 

فالمشاعر عندها دابت على بعضها 

وعايزة ضفيرة كهربا جديدة 

ولو انت متجوز زوجة متقلبة المزاج 

اياك تخلف منها لسبب بسيط خالص 

أولاً إيمانًا بالمثل اللي بيقول 

ما تخافش من الهبلة خاف من خلفتها 

وثانياً إن مصاريف جلسات العلاج النفسي 

غالية ومكلفة وبتاخد وقت طويل .. 

وانت مرتبك مش هيكفي إنك تعالجها 

ولا تعالج ولادها ولا تتعالج انت من اللي عملته فيك 

فلو انت متجوز زوجة من النوع ده 

ما تاخدش ليها على كلام ولا فعل الحقيقة 

لأن كل حاجة بتعملها بناءاً على مين مستلم الشيفت دلوقت 

الفرفوشة ولا الحزينة .. المستسلمة ولا الطموحة 

الطفلة البريئة ولا الوحش الكاسر 

النوع الرابع : الزوجة الترانزيت 

ودي بقى الزوجة اللي ما بتعرفش تقعد في حتة 

يعني تبقى خارجة من البيت تشتري طلب 

ما ياخدش تلات دقايق ، تلاقيها لمدة ساعتين 

بتجهز نفسها وتلبس العيال وتحضر الشنط 

من لبس وأكل وشرب وبامبرز ورضعتين تلاتة 

وفرش أسنان ومعجون ، وأدوية وكل اللازم 

تقرا دعاء السفر وتتوكل على الله .. وقبل ما تروح تشتري طلبها 

تعدي على أمها تقعد معاها يومين وتخرج من عند أمها 

تروح لأختها تقعد عندها يومين ومن عند أختها 

تروح لخالتها تقعد عندها يومين ، وبعدين 

تروح تشتري الطلب اللي هي عايزاه 

ترجع بقى على البيت ؟ لأ طبعاً

هترجع تكرر نفس خط السير وتعدي على العيلة 

وتزور الجيرة وجيرة الجيرة .. وبعدين ترجع على البيت 

والزوجة الترانزيت بالنسبة لبعض الأزواج 

نعمة من ربنا أهو اسمه متجوز ومخلف 

وفي نفس الوقت عايش حياة العزوبية ، يخرج براحته 

يرجع في الوقت اللي عايزه ، ومقضيها بقى 

بلاي ستيشن وقهوة وطاولة .. عايش حر 

وبالنسبة لبعض الأزواج نقمة ، يعني الراجل من دول 

بيكون متجوز علشان يرجع يلاقي حد بيستقبله 

يعيش في مكان نضيف ، ياكل أكلة حلوة 

يعني راجل صرف دم قلبه علشان يتجوز 

ولكنه في حالة العازب .. 

والزوجة الترانزيت الحل الوحيد معاها 

إنك تحطلها حرز في الشنط قبل ما تتحرك 

يعني فرش حشيش .. حتة سلاح .. أي حاجة من النوع ده 

وتبلغ عنها ، يتقبض عليها وتتحط على قوائم الممنوعين من السفر

النوع الخامس : الشكاءة البكاءة

والنوع ده من الزوجات عقاب من ربنا على أفعالك في الدنيا 

حاجة كده تخفف عنك عذاب الآخرة وتهونه شوية 

ودي زوجة ما تعرفش يعني ايه فرح ولا له مكان في حياتها 

وزي ما انتوا سمعتوا اسمها فبيدل على انها بتتصف بصفتين 

أولهم الشكاءة .. والشكاءة يعني كثيرة الشكوى .. 

والشكوى لغير الله مذلة .. لكن هي مش مقتنعة بده 

هي دايرة بين عيلتك وعيلتها تشرد فيك وتشتكي منك 

على أي حاجة وكل حاجة تقريبًا

تعيشها في شقة واسعة تقولك منه لله .. 

ده البيت من وسعه هد حيلي من التنضيف

تعيشها في شقة ضيقة .. تقولك ده معيشني في قبر 

تأكلها كل يوم لحمة وفراخ تقولك جابلي نقرس 

تعيشها على نظام غذائي صحي .. تطلع عليك سمعة انك بخيل 

تقعد معاها في البيت ، تقولك إنزل شوفلك شغلانة وحل عني 

تخرج من البيت تقولك حابسني في البيت وهو داير يتسرمح 

ما بيعجبهاش العجب .. ولا محوق فيها حاجة 

وبالنسبة لوصفها التاني ، البكاءة فده معناه انها كثيرة البكاء 

فزي ما قولنا ان الزوجة دي بتحب الحزن والبكا قد عينيها 

تفرح تعيط .. تحزن تعيط .. تشبع تعيط .. تجوع تعيط 

تحبها وتهتم بيها تعيط .. تخونها وتنشغل عنها برضه تعيط 

وعلى وشها تعيط وعلى ودنها تعيط .. وقرب قرب قرب 

ووارد انك تكون متجوز واحدة فيها صفة من الصفتين 

وساعتها هيكون حلك انك تحاول تغيرها

وتصبر عليها لعند ما تنعدل أو ربنا يفتكرها 

أما يا صاحبي لو انت متجوز واحدة فيها الصفتين مع بعض 

شكاءة وبكاءة فمفيش حل غير انك تطلقها 

طلقها وانفد بجلدك حتى لو هتخسر كل حاجة 

ابدأ من الصفر أحسن وهي كده كده

حتى لو هتشتكيك في محكمة الأسرة ..  

كده كده لا هتبطل شكوى منك ولا عياط 

النوع السادس : أم العيال 

ودي الزوجة اللي قبل ما تتجوز سمعت نصيحة أمها 

لما قالتلها إن اللي هيحافظ عليك ويربطك بيها 

ويخليك زي الخاتم في صباعها ، إنها تجيبلك دستة عيال 

يتولوك مصاريف وطلبات فلا يكون عندك وقت تبص لغيرها

ولا فلوس تتجوز عليها .. والزوجة دي عندها تارجت 

وبلان واضحين جدًا كاتباهم في النوت بوك بتاعها 

يعني هي مثلاً اتجوزت على سن ٢٥ سنة .. 

تحسب متوسط عمرها لعند ما تموت وليكن على سن ٦٥ سنة 

يعني باقيلها من الزمن ٤٠ سنة .. كل عيل بياخد فترة حمل ٩ شهور 

ولو ضغطنا عليه ينزل ابن سبعة .. وفترة رعاية 

لعند ما يشد حيله قول ٦ شهور .. يعني كل عيل عايزله بتاع سنة 

سنة وشهرين ، فتلاقيها كل سنة ونص بالكتير تخلف عيل 

على سن ال ٦٥ تلاقيها جايبالك حسبة من ٢٦ ل ٣٠ عيل 

عملت الخطة وبدأت بقى في التنفيذ .. بلان أوف أكشن 

عيل في التاني في التالت تلاقي الدنيا بتبهوق منك 

تنصحها كفاية كده يا بنت الناس علشان نعرف نعلمهم كويس 

ونربيهم كويس .. أنا بشتغل ١٢ شغلانة مع بعض 

تتهمك بالخيانة والكفر .. بالخيانة لأن كلامك معناه 

انك بتفكر تتجوز عليها ، والكفر لأنك معترض على رزق ربنا 

ولا انت اللي هترزقهم ولا انت اللي هتربيهم .. فتضطر تسكت 

ولكن بيكون عندك حل من تلاتة مفيش غيرهم 

 الأولاني انك تحطلها حبوب منع الحمل في الماية

والتاني انك تسافرلك ٢٠ سنة منها تحوش للجرمق اللي في البيت ده 

ومنها تمنع سيل الأطفال اللي ما بينتهيش .. 

والحل التالت انك تشتكيها في المجلس الأعلى للطفل 

أو جهاز تنظيم الأسرة وهما يتصرفوا معاها

والزوجة أم العيال على قد ما هي بتكسر ضهرك من المصاريف 

وبتجيبلك زهايمر وتوحد من الخلفة 

و من كتر الشخصيات والأسماء اللي بتدخل حياتك 

إلا إنها بتقدملك خدمة كبيرة مش هتحس بيها إلا بعد ٢٠ سنة 

ده إذا كنت لسه عايش وفيك الروح يعني 

وإنه بعد ما العيال دي ما تكبر بيكون عندك عزوة بجد .. 

حارة كاملة مش محتاج فيها جيران كلهم ولادك 

كومباوند تاخده من بابه كده علشان عيالك وأزواجهم وأولادهم

ولو فكرت تفتح مشروع ، شركة ولا مصنع .. 

عمرك ما هتحتاج عمال ولا هتفكر تجيب اتش آر

 ولا في يوم هتعطل على تخصص ولا هتعمل إعلان توظيف 

النوع السابع : الحكومة 

في القترة الأخيرة من بداية التسعينات للنهارده 

ظهر مصطلح بين الأزواج إنهم يسموا زوجاتهم 

الحكومة .. وده لأسباب واضحة جدًا 

عارف لما تبقى قاعد مع أصحابك على القهوة 

بتقضي أحلى ساعتين في حياتك .. مفيش حاجة 

ممكن تعكر صفو القاعدة الحلوة دي غير حاجتين اتنين 

أولهم إنك تلاقي ميكروباص الحكومة طابب عليكوا 

وفتش فتش فتش .. اركب اركب اركب 

وتانيهم انك تلاقي مراتك بتتصل عليك 

والحالتين تقريبًا واحد .. ومن هنا جه مصطلح الحكومة

والزوجة الحكومة بتكون عارفة عنك كل حاجة 

ومهما تحاول تخبي عنها أو تدارى منها هتجيبك 

شغال فين ومن الساعة كام للساعة كام 

عارفة مفردات مرتبك .. مصاحب مين 

متخانق مع مين ، بتحب مين وبتكره مين 

مين معجب بيك ، انت لا قدر الله معجب بمين 

بتحب ايه ، بتكره ايه .. كل حاجة .. كل حاجة 

والحل مع الزوجة الحكومة … انت فكرتني هقول حل

لا يا صاحبي مفيش حلول مع النوع ده بالذات 

النوع ده الحل معاه .. تسيب الأيام تمر 

زيها زي فترة السجن بالظبط هتعدي هتعدي 

وفي الآخر واحد منكوا هيموت .. 

وربنا يدينا ويديك طولة العمر 

الزوجات أنواع كتير جدًا ، وزي ما منهم أنواع بيكفروا عن ذنوبنا 

كمان فيه منهم أن أنواع هما العمل الطيب اللي في حياتنا 

فمنهم اللي تصونك وتحافظ عليك 

ومنهم اللي تصبر عليك لعند ما الدنيا تضحكلك 

ومنهم اللي تقف جنبك وتداري على عيوبك 

ياريت لو تعرف حد مر بتجربة مشابهة

 للي اتكلمنا عنه في الحلقة النهارده تقولنا في الكومنتات 

وما تنساش تعملنا لايك وتشترك في القناة علشان يوصلك كل جديد

وبكده تكون انتهى مقالنا النهارده عن أنواع الزوجات