أنواع الناس في الخروجات

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن الصحبة الحلوة اللي بنقضي معاها أحلى الأوقات 

عن اللمة وتغيير الجو .. مقالنا النهارده عن أنواع الناس في الخروجات 

والناس في الخروجات بينقسموا لأنواع كتير جدًا 

منهم النكدي ومنهم البخيل ومنهم اللي ما بيفوتش خروجة 

الا اما يعمل مشاكل وأنواع كتير غيرهم ، يلا نبدأ على طول 

النوع الأول : بلبس الكوتشي 

وده صاحبك اللي تبقى متفق معاه خروجة 

وبتحاولوا تظبطوها بقالكوا سنة فاتت 

وقبلها بيوم ولا اتنين تأكد عليه مرة واتنين وتلاتة الميعاد 

علشان ما يحصلش منه أي تأخير ويضربلك اليوم ع الفاضي 

يوعدك كل الوعود ، ويحلف على كل الكتب السماوية

اللي خلقها ربنا ، ويوم الخروجة تكلمه أول ما تصحى 

يلا يا ابني قوم إلبس وانا هاجي اخدك من تحت البيت 

يقولك يا عم ده أنا صاحي ولابس ومستنيك 

تقول ده اتغير وتنزل جري من بيتك 

خايف لا تكون انت اللي متأخر عليه 

تنزل متلهوج من غير ما تفطر ولا تعمل حاجة

وتوصل تحت بيته وتبدأ تكلمه مرة ما يردش 

التانية برضه ما يردش ، التالتة يكنسل 

تقول بس ده نازل على السلم .. ده دقيقة واحدة 

وهتلاقيه بيفتح الباب وخارج ، تفوت ربع ساعة 

نص ساعة .. تقلق عليه يكون وقع ع السلم

واتكسرت رقبته ، ترنله تاني يرد عليك 

وبكل بجاحة وأكنك جاي عليه ، ويقولك جملته الشهيرة 

يا عم في ايه ؟ أنا بلبس الكوتشي ونازل أهوه 

تقفل وتقعد تستنى وتقول لنفسك .. هيلبس الكوتشي في قد ايه يعني ؟

عشر دقايق .. تفوت العشر دقايق وترنله تاني يكنسل 

تبدأ تقلق عليه بقى .. يكون حد مثبته فوق 

ولا تكون أمه مانعاه ينزل ومكسوف يقول 

ترنله تاني تلاقيه بيرد والمفاجأة إنه بيرد عليك نفس الرد 

بنفس الصيغة .. بنفس نبرة الصوت .. 

يا عم في ايه ؟ أنا بلبس الكوتشي ونازل أهوه 

تحس انك عايش في ديچاڤو .. أو انك وقعت في ثقب دودي 

او انت في بعد وهو في بعد تاني

أو الوقت اللي فات ده معداش وأسئلة كتير 

ما انتاش فاهم هو ايه اللي بيحصل .. ده كوتشي ايه ده 

اللي بيلبسه في نص ساعة ، وأنا أحب أقولك يا صاحبي

إن صاحبك نايم وبيهلوس ، وحصلتله حاجة من اتنين 

يا اما حفظ الكلمتين دول قبل ما ينام 

ومن كتر ما كررهم مع نفسه أو حاجة قالها بعد ما صحي 

هما نفس الكلمتين .. يا إما دي رسالة مسجلة 

في الحالتين النتيجة هتكون مش تمام 

لأن الخروجة اللي انتوا بترتبولها من سنة

واليوم اللي عرفتوا تاخدوه أجازة وكان هيبقى 

سبب في رفدكوا واللي المفروض يبدأ من ٩ صباحًا 

ينتهي بإنك قاعد بتتغدى مع صاحبك في بيتهم 

الساعة ٥ العصر ، وتقعد معاه ساعة ولا ساعتين 

وتروح علشان تنام بدري علشان تلحق شغلك الصبح بدري 

النوع الثاني : البخيل وأنا 

وده صاحبك اللي يفضل مقضي معاك ٣٦٤ يوم 

من السنة مقرط على نفسه ومابيصرفش جنيه بحجة إنه 

بيحوش للخروجة اللي انتوا متفقين عليها 

تدخلوا تاكلوا في مكان ، يقولك حاسب 

مش عايز أفك وأجرح الفلوس ، تدخلوا تقعدوا في قهوة 

يقولك مش عايز أفك وأضيع فلوس الخروجة 

وانت طبعاً موافق على ده وعلى قلبك زي العسل 

وقاعد بتعشم في نفسك إنه أكيد هيخرجك خروجة العمر 

لعند اليوم ال ٣٦٥ .. يوم الخروجة 

تلاقيه بادئ اليوم برسالة كلمني شكرًا 

اللي هو أول القصيدة كفر ، دي إصطباحة طين 

وبعد تفكير تقول عادي .. وارد يكون مش معاه رصيد

لسه ما نزلش من البيت وشحن 

تكلمه واهوه خليك ورا الكداب لحد باب الدار 

ترنله وتلاقيه بيرد عليك بيقولك قابلني على الموقف 

موقف ايه يا ابني انت ؟ ما ناخد أوبر .. هنروح مواصلات ؟

تلاقيه بيقولك رد منطقي برضه 

يا عم هو احنا هنطير فلوس الخروجة في المواصلات 

كلام مظبوط ، تنزل تروح تستناه في الموقف 

تلاقيه جاي معاه كيستين واحدة سودا وواحدة بيضا 

السودا فيها ازازة ماية ماليها من الكولدير 

بتاع الجامع اللي تحت البيت 

والكيسة البيضا فيها أربع سندوتشات أمه عاملاهومله 

اتنين جبنة واتنين حلاوة .. ده ايه ده يا ابني ؟ 

يقولك أكل وشرب .. وهي الخروجات ايه غير أكل وشرب 

والله عندك حق .. بس هو احنا على سفر 

ولا هنخرج في صحرا ؟ يقولك محدش ضامن حاجة 

تركبوا أوسخها ميكروباص تلاقيه طلع السندوتشات 

وبدأ ياكل ويشرب .. الأجرة بتتلم وهو مشغول ..

معقول يعني هتقطع أكل الراجل وتقوله هات الأجرة 

ما جاتش من ٥ جنيه يعني ؟ تحاسب على نفرين 

وبعد عشر دقايق من المريوطية تلاقيه عند جنينة الدقي 

بيقول للسواق على جنب يا أسطى 

تقول بس .. هننزل بقى ناكل من شاورما الريم 

وبعدين نتوكل على الله .. ولا حتى من سمسمة 

تنزلوا من الميكروباص وتلف تكلمه تستفهم منه 

هتروحوا فين ولا يومكوا ماشي إزاي ؟ 

ما تلاقيهوش حواليك .. وبعد شوية تدوير وبحث 

تلاقيه واقف على بوابة الجنينة بيحجز تذكرتين 

التذكرة ب ٥ جنيه .. وداخل وسايبك تهاتي 

وحاطك قدام الأمر الواقع ، تدخل وراه 

انت يا حيوان .. يبدأ يهديك ويحكيلك عن فوايد الهواء النقي 

والخضرة والبراح والكلام ده .. ياكل ودانك ويصدعك عن قصد 

تلاقي تفسك تعبت من اللف في الشمس في الجنينة 

اللي حفظتها نخلة نخلة ..يقولك تعالى بقى نقعد 

تاخدوا أي جزع تسندوا عليه ضهركوا 

وتقسموا السندوتشين اللي باقيين 

والضهر يأذن عليكوا تقوموا تروحوا وتقطعوا علاقتكوا ببعض خالص 

النوع الثالث : السندريلا 

عملتوا جروب واتس آب وبقالكوا خمس سنين 

بتحددوا يوم تخرجوا فيه ويتأجل كل مرة بسبب تافه 

لحد ما أخيرًا جه اليوم اللي مناسب للكل 

اتجمعتوا وخرجتوا ويدوب الناس سلمت على بعض

وفجأة تلاقي صاحبك ده اللي بقاله سنين بيزن 

علشان يخرج ، متوتر وعرقان وبيبص في الساعة كتير 

ومفيش على لسانه إلا لازم أروح .. لازم أروح 

يا ابني هتروح تعمل إيه ؟ .. ما أعرفش بس أروح 

فيه حد مستنيك ؟ لأ .. هتعمل مصلحة ؟ .. لأ 

هتنام بدري علشان عندك حاجة بدري ؟ برضه لأ 

إمال هتروح ليه ؟ مش عارف .. بس أروح 

وهنا تكتشف فجأة إنك إخترت الصاحب الغلط 

السندريلا .. اللي بعد كل التعب والشقا في تحديد ميعاد للخروجة 

بكلمة واحدة كافية يهد اللمة كلها

ويبعتر الناس اللي لميناها بالعافية 

ولو حتى ضغطت عليهم حبتين هيقعد ساعة كمان بالكتير 

هيقضيها كلها في البص في الساعة وهز رجليه وقرقضة ضوافره من التوتر 

وأكنك خاطفه من وسط أهله ، أو منزله مكبل بالسلاسل

أو واخد عليه وصولات أمانة علشان ينزل 

طب لما انت ناوي تقعد عشر دقايق نزلت ليه ؟ 

ده ما يستاهلش شوية الچل اللي حطيتهم على شعرك 

ولا القميص اللي كويته ، الغريبة بقى 

إن الراجل ده لما يروح تلاقيه أول حد باعت على الجروب 

إنه ياريت الخروجة تتكرر تاني .. وإنه انبسط ومش عارف ايه 

يا أخي يارب ما نشوف وشك تاني .. 

وده مجرد ما تشوف منه رسالة فيها كلمة خروجة 

لازم تعمله بلوك وتطرده من الجروب ده تمامًا

النوع الرابع : جلاب المصايب 

وده صاحبك اللي أول ما تخرجوا من البيت 

يبدأ يتخانق مع كل حد يقابله .. والمشكلة إنه أول حد بيقابله كالعادة 

هو سواق الميكروباص ، ودي فئة ما ينفعش تتخانق معاها يا صاحبي 

لأنك ممكن تنضرب .. ممكن تقضي الخروجة في المستشفى

والخناقة مع فئة زي دي دايمًا من نوعية إنه بيركب المواصلة 

دي كل يوم بإتنين جنيه والسواق عايز اتنين ونص 

فالنص جنيه الفرق ده ما يستاهلش ال١٥ غرزة اللي هتاخدهم في وشك بالطول 

وبعدين بتركب المواصلة كل يوم ازاي وانت ما خرجتش 

من سنة ٢٠٠٠ من البيت والعالم اتغير من ٢٠٠٠ ل ٢٠٢٣ 

ده لو ما تعرفش يعني او مش واخد بالك 

ومش الأجرة بس اللي بيتخانق عليها 

لأ ده اليوم لسه مكمل ومطول .. يعني انتوا ربنا كرمكوا

ونزلتوا من الميكروباص بأمان ومن غير غرز ولا عمليات 

مش يتعظ بقى .. لا .. لسه الخناقات مكملة 

تدخلوا تاكلوا حاجة .. يطلع القطط الفاطسة في المطعم 

وفي الخدمة وفي السعر .. وفي كل حاجة خلقها ربنا 

ما يعرفش يقعد هادي .. وده صاحب من الاخر كده 

ملوش خروج .. يعني واحد ما خرجش من ربع قرن 

عايز تقنعه يخرج ليه ؟ انت تخليك قاعد يا حبيبي في البيت 

لعند ما تعجز ونبقى احنا نعدي عليك كل سنة كده 

نقعد معاك شوية وخلاص .. ده ملوش خروج

ده لازم يتحبس في قمقم .. واللي عايزه يروحله 

لأن الخروجات معاه ممكن تنتهي بنهايات مش لطيفة 

يا إما بحبس .. يا مستشفيات .. يا تتخطفوا .. كده يعني 

فعايز تحافظ عليه كصاحب .. ما تخرجش معاه 

خلوا علاقتكوا اونلاين .. 

والناس في الخروجات ياما وكتير .. 

ياريت لو انت حد من الانواع اللي اتكلمنا عنها

تقولنا في الكومنتات .. ولو انت تعرف حد من صحابك

فيه صفة من الصفات دي اعمله مينشن .. 

وما تنساش تقرأ المقالات اللي فاتت 

وتشترك في المدونة علشان يوصلك كل جديد .. 

أشوفكم على خير