خريطة الارتباط المصرية .. الطريق إلى محكمة الأسرة
مساء الخير على كل حد بيدور على الضحكة
في وقت الفرح بقى نادر
مساء الخير على كل متابعينا ، وعلى كل اللي لسه ما عملش فولو لينا
هناخدكوا معانا لدقايق هيعيشوا في بالكوا لساعات طويلة
في ركن بعيد لوحدينا .. بعيد عن كل النكد والقلق المرطرط حوالينا
بدون حزق وبدون حرق .. استعدوا لجرعة مكثفة من الضحك ،
ما يقدرش عليها إلا كل صاحب قلب من حديد
مرضى القلب يمتنعون .. لا تخافوا .. ولكن إحذروا ..
إحذروا من اللي بيهزروا ..
أهلاً بيكوا مرة تانية في مدونتكم ، وموضوع مقالنا النهارده
عن سر وجود البشرية ، لو جينا نتأمل البشرية من يوم ما خلقها ربنا
وأهدافها على الأرض هتلاقيها حاجة بسيطة وسهلة الفهم لأي حد
وهي بشكل مختصر كده .. الجواز ..
يعني تخيل لو عندك طفل داخل كي چي وان
بس معدل ذكاءه عالي شوية وجه سألك سؤال
وقالك يا بابا .. هو أنا ليه هروح الحضانة ؟
هتقوله علشان تكبر وتروح المدرسة
تمادى في السؤال وقالك طب وليه هروح المدرسة ؟
هتقوله علشان تتعلم وتدخل الجامعة
قالك ولو رحت الجامعة هستفيد ايه ؟
هتقوله هتتخرج وتلاقي وظيفة تعيش منها
وتعرف تشتري شقة وتجهز نفسك ..
برضه كل ده ليه ؟ هتقوله الرد المنطقي
علشان تتجوز ويبقى عندك عيلة وتخلف عيل
يعمل نفس اللي انت عملته ده بالظبط
يعني أنا هعمل كل ده علشان أتجوز وأخلف
طب خد يابابا اللانش بوكس ده كده .. والزمزمية
سيبوني بقى أنام ولما يبقى عندي 16 سنة صحوني
علشان أتجوز وأخلف بدل الفرهدة دي
المناقشة الخيالية دي كشفتلنا حاجة بسيطة خالص
إن كل الفرهدة اللي البشر فيها دي بسبب الجواز
وإن ده هدف البشرية حتى لو أنكروا ده سواء رجالة أو ستات
كده كده رجلهم هتيجي في الخية
والارتباط له محطات .. هنشرحها محطة محطة
في مقالنا النهارده عن خريطة الارتباط
المحطة الأولى : الإعجاب
وأي ارتباط في الدنيا بيكون أوله إعجاب
إلا بقى لو انت كذكر شرقي نطيت كل الحواجز دي
واتقدمت لواحدة وأهلها غصبوها عليك
ولا انت تعرفها ولا شوفتها ولا معجب بيها وده مش طبيعي
ولكن الطبيعي إن الارتباط في كل حتة في الدنيا
سواء في عالم الجن أو الإنس أو حتى في مملكة الحيوان بيبدأ بإعجاب
يعني تعجبها حاجة فيك ويعجبك حاجة فيها .. يعجبها فيك دقنك
طولك .. قصرك .. تخنك .. رفعك .. رقتك .. خشونتك
أيًا كان صفاتك المهببة ايه .. ففي الآخر هتلاقيلك واحدة تعجب بيك
حتى لو ابوك شايف إن فيك العبر
لأنه لولا اختلاف الأذواق لبارت السلع
وهو برضه هيعجبه حاجة فيكي .. شخصيتك بقى
تعليمك .. طريقة تفكيرك .. وطبعاً كل ده كدب وملوش لازمة عند الراجل
لأنه كراجل لو ما عجبوش شكلك مش هيدور على حاجة تانية
المهم يعجبه تخنك .. رفعك.. تحولاتك المزاجية .. نرفزتك
المهم هيلاقي سبب وكل فولة وليها كيال
يحصل الاعجاب من هنا .. شوية ابتسامات ونظرات ونحنحة يبدأ الإعجاب يتحول لتلميح
والتلميح عند الراجل مختلف تمامًا عن الست
يعني الراجل ما بيعرفش يلف ويدور هو بيدي في الوش على طول
تبقي نازلة من بيتك شعرك جايب ال fm وهو لو معجب بيكي
يقولك شعرك حلو قوي النهارده ، على طول كده .. خبط لزق
حتى لو انتي وحشة وتقرفي الكلب الحزين
بس هو اتعمى .. الاعجاب عماه .. وبالتالي لما تلاقي الراجل
مش فاهم التلميحات فده طبيعي .. يعني جو بقى
لما تخلف هتسمي بنتك ايه ؟ هو مش هيفهم ان ده تلميح
ومستنياه يقول اسمك .. هو حرفيًا هيقولك مش عارف
و فترة التلميح دي بتروح مننا لسكتين اتنين
يا اما نفور ورفض من أولها كده من طرف من الطرفين
وتبقى كده خلاص باظت قبل ما تبدأ
وكفى الله المؤمنين شر القتال
يا إما ياخدنا للاعتراف والقبول ويطلع الإعجاب متبادل لا قدر الله
ومن هنا تتنقل العلاقة واحنا معاها للمحطة التانية .. الإرتباط
المحطة الثانية : الإرتباط
والارتباط اللي نقصده هنا اللي لا بيحكمه لا ظابط ولا رابط
ولا حد عارف عنا حاجة ، ولا حد لسه شاف علينا حاجة
يعني تبقي قاعد طول الليل مع صاحبك تشكوا أحزانكوا لبعض
يقوم يروح وتاني يوم تلاقيه بيكلمك وبيقولك انا مش هعرف أخرج
ليه يا ابني ؟ عندي مكالمة بليل .. خير ؟ أصل أنا ارتبطت
امتى يا ابني ؟ ده احنا كنا مع بعض من كام ساعة
ولا حاجة .. هو قالها بحبك وهي قالتله وانا كمان وخلاص على كده
اهي هي دي مرحلة الارتباط اللي نقصدها بدأت بكلمة
والارتباط بالشكل ده له مراحل كتير ..
أولاً بيفضل سر لفترة محدش يعرف عنه حاجة
وبعد كده نبدأ نلمح للناس حوالينا بستوريز على الواتس آب
وبعد كده لو انتي عاملة بلوك لعيلتك نفر نفر على الفيس بوك
وانت عامل بلوك لخالتك وبناتها .. ممكن يعني
تعمل اشعار كده انك في علاقة
ومرحلة الارتباط الأولى اسمها حلاوة البدايات
كل حاجة حلوة وردي .. الشجر اخضر
والعصافير تزقزق وبنسمع أغاني فرايحي
وبنكلم بعض بال ٨ ساعات وبنخاف على بعض ونطمن على بعض
وفجأة حلاوة البدايات يبدا يطلعلها ريحة .. صاحبتي عرفت
وتبدأ تهريك اختبارات .. أمي عرفت وعايزة تكلمك
تبدأي تخنقيه .. رايح فين جاي منين .. بتكلم مين
ناوي تكلم مين .. بصيت على مين .. كنت ناوي تبص على مين واستغفرت ربنا
مين اللي عاملالك لاف على صورتك دي ؟
وهو كمان مش هيسكت ، ويبدأ يمارس عليكي رجولته
اللبس ده وحش .. ما تعرفيش صاحبتك دي تاني
ما تروحيش بيت خالتك ..ما تخرجيش ما تتكلميش ما تهزريش
وفجأة تتحول حلاوة البدايات لجبنة قديمة .. ومن هنا
العلاقة بتاخد منعطف تاني تمامًا .. وطريق من اتنين
يا اما مش طايقين بعض ونمسح صور ورسايل بعض وتنتهي ببلوكات
يا اما بابا عايز يقابلك .. وده ياخدنا للمحطة التالتة .. الخطوبة ..
المحطة الثالثة : الخطوبة
والمرحلة دي تكملة لمرحلة الارتباط بس بشكل رسمي
الناس اللي عارفة زادت والعيال خارجين داخلين مع بعض
والعيلتين والبواب عارفين ، هدايا وزيارات وعزومات
والدنيا مية مية .. لعند ما تبدأ تظهر المشاكل
واللي بتختلف بين الراجل والست تمامًا
بالنسبة للراجل المشاكل كلها بتكون
يا إما مشاكل مادية .. بيكون مضغوط بين التجهيز للجواز
والشقة والعفش والصنايعية والهدايا والمواسم والأعياد والشغل
فيطلع كل نرفزته على أي حد وتحديداً انتي
لأن جزء منه بيقول ان انتي السبب في اللي هو فيه ده ..
فا يا اما بيتسحل جامد وينسى انه خاطب ويركز في شغله
علشان يعرف يتجوزك ويخلص .. يا اما بيفشكل ويخلص
بالنسبة للست بقى المشاكل في مرحلة الخطوبة بتكون
عبارة عن جملتين .. انت اتغيرت ليه ؟ ..
أو فيه ايه ؟ مفيش .. فيه ايه ؟ مفيش .
وبعد جلسة استجواب مدتها ٣ شهور
تبدأ كلمة مفيش تتحول لمجلة من ٣٠٠ صفحة
ما بقتش تحبني زي الأول .. ولا بتهتم بيا ولا بتكلمني
ولا بتدلعني ولا بتسأل عليا ولا بتخاف عليا
وماسورة واتفتحت .. ده ياريتها فضلت تقول مفيش
وطبعاً الراجل بيكون جاهز بمبرر قوي وهو
ما انا مشغول عنك بس علشانك.. هو علشان مين يعني ؟
ما انا مشغول علشان أعرف اتجوزك في الميعاد اللي اتفقنا عليه
ومرة في التانية وخناقة في التانية بتنتهي مرحلة الخطوبة
لطريق برضه من اتنين يا اما كل شيء قسمة ونصيب
ورجعيلي دهبي ما انت كلت وشربت وحضنت بيه
يا اما بتدخل في المحطة اللي بعد كده ألا وهي .. الجواز
المحطة الرابعة : الجواز
والمحطة دي أصعب من كل اللي فات
ولما بنوصلها بنكون فاكرين إن مشاكل الدنيا كلها اتحلت
غلابة .. ما نعرفش ان المشاكل بدأت من هنا
والجواز زيه زي الارتباط له زهوة كده وحلاوة في بداياته
واللي بتكون مرحلة لا تتجاوز الشهرين
أول شهرين من الجواز بتحس إنك ملك
البيت نضيف مترتب ، العروسة كل يوم بلبس جديد
وميك اب جديد وبرفانات وعلى سنجة عشرة
الأكل والشرب والشيكولاتات وكل حاجة متوفرة
يعدوا الشهرين ، خزين البيت يخلص
تلاقي نفسك فجأو مضطر تنزل شغلك
كمان شغلانة تانية علشان تكفي مصاريف البيت
وبعد ما كنت بتنزلك ساعتين كده وترجع تشغل فيلم
وتسهروا مع بعض .. بقيت بتخرج من طلعة النهار
وترجع مع طلعة النهار برضه بس تاني يوم
تناملك ساعتين وتنزل .. وبناءًا عليه
هي بيكون لها رد فعل .. الميك اب اتشال
الشعر اتنكش ، البيت مكركب .. والزعيق والعصبية زادوا
ما انت مش موجود ولا حاسسني ولا شايفني والكلام ده
ومن هنا تبدأ المشاكل ، ومرحلة المشاكل في الجواز
غير مشاكل الارتباط تماماً .. يعني كنتوا الأول
ممكن تقعدوا يومين مقموصين وبعد حد يجي على نفسه
ويكلم التاني ويراضيه وخلاص
لكن في الجواز الموضوع ممكن يوصل للجنحة
والجنحة في القانون المصري .. هي جريمة صغيرة
يعاقب عليها القانون بالحبس من شهر ل ٣ سنين
ولما تلاقي الموضوع وصل لهنا ..
فبيكون قدام الجواز طريق من اتنين
يا اما اننا نتفاجئ إن فيه عيل في الطريق
فنرتجع ونتقي ربنا علشان العيل اللي جاي ده
ما يتولدش مجنون ، يا اما بيكون قدامنا حل واحد
وهو المحطة الخامسة .. الطلاق .
المحطة الخامسة : الطلاق
فاكر في بداية الحلقة لما ابنك وهو رايح كي چي وان
سألك شوية أسئلة كانت اجابتهم النهائية علشان تتجوز وتخلف
الجواز ده كان له اجابة تانية خالص..
اتجوز ليه يا بابا ؟ .. علشان تطلق يا حبيبي
وده مصير أعداد كبيرة مش مجرد كلام ع الورق
والطلاق هو المرحلة اللي بيكون فاض بينا من بعض
لا حب بقى ولا عشرة ولا أي حاجة نافعة معانا
كل اللي عايزينه م الدنيا اننا نخلص من وش بعض
ونعمل ريستارت للكام سنة اللي فاتوا دول
ونمحيهم تمامًا من الذاكرة
والطلاق برضه بيمر بمرحلتين
يا اما استهدوا بالله يا ولاد وارجعوا ..
لا مش راجعين طب حقي ومستحقي ونتفض بالمعروف
زي ما دخلنا بالمعروف .. يا اما بيكون لينا السبق
في اننا عرفنا طريق محكمة الأسرة على ايدين بعض
وقضايا بقى بين نفقة لتبديد قايمة لحبس
وممكن تؤدي للانتحار..فلو ابنك اللي في كي جي وان
سمع الإجابة الكاملة مش بس هيدخل ينام
ويقولك صحيني على سن الجواز
لا ده هيشنق نفسه حالا مادام النتيجة واحدة
ودي كانت خريطة الارتباط .. لو عندك الجرأة
تقولنا في الكومنتات انت في اي محطة بالظبط
ببقى كتر خيرك .. ما تنساش تشترك في المدونة
علشان يوصلك كل جديد .. أشوفكم على خير
ليست هناك تعليقات:
إرسال تعليق
أتشرف بتعليقك ونقدك دائمًا ..