أنواع القرايب "الجزء الأول" 

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

عن الناس اللي من دمنا ، وزي ما انتوا عارفين

الدم عمره ما يبقى ماية .. الناس اللي بتربطنا بيهم 

قرابة .. أو نسب .. أقرب حد لينا إسمًا وفعلاً

حلقتنا النهارده عن أنواع القرايب 

والقرايب أنواع كتير جدًا .. منهم اللي أول ما تحتاجه تلاقيه

اللي يقف في ضهرك ويسندك ، واللي بينصحك لوجه الله

ومنهم اللي بمجرد ما يعرف إنك واقع في ضيقة 

تلاقيه معاك ويمدلك إيده .. وأنواع كتير غيرهم 

مش  هنتكلم عليهم النهارده ، إحنا في حلقتنا النهارده

هنتكلم عن أنواع القرايب ال fake 

المزيفين .. القرايب اللي بالإسم بس 

اللي أغلبنا عاملهم بلوك .. وأغلبهم مستغربين 

إحنا قاطعين علاقتنا بيهم ليه 

مع إنها مش محتاجة حيرة ولا سؤال 

أنواع القرايب .. ويلا نبدأ على طول 

النوع الأول : الناصح الأمين 

وده قريبك اللي ممكن يكون قدك في السن 

أو أكبر منك بيومين تلاتة مثلاً

بس ساب كل أمثال الدنيا ومسك في مثل واحد بس 

المثل اللي بيقول أكبر منك بيوم يعرف عنك بسنة 

فتلاقيه في أي موقف وأتفه موقف مستنيك تقع وتغلط

علشان يقولك جملته المشهورة ، ما خادتش مشورتي ليه ؟

ويزعل زعل رهيب مش علشان انت في مشكلة 

لأ .. ده يزعل علشان انت ما كبرتش بيه 

وخدت رأيه في الحاجة دي قبل ما تعملها 

حتى لو الحاجة دي كانت صغيرة وتافهة 

يعني دخلت تاخد دش في الشتا والسخان قطع 

والماية بقت تلج فجأة ، موقف تافه أهوه 

خليك تحكي موقف زي ده في تجمع عائلي مثلاً

تحكيه عادي للضحك مش أكتر 

تلاقيه عدل نضارته كده وبصلك من فوق لتحت 

وبدأ ينظر عليك ، وقبل ما يبدأ محاضرته 

طبعاً لازم يقولك بس انت غلطان .. 

انت لو كنت استشرتني كنت قولتلك تعمل ايه 

أو كنت جبت معايا سباك وجيت جري 

وسبحان الله تلاقيه هو ولا ابنه مثلاً سباك 

وعايز يسترزق ومضايق إن شغلانة زي دي 

فاتت من تحت ايده مع إنه قاعد فاضي 

ولابس لبس الشغل ومجهز شنطة العدة جنبه 

وعامل موبايله عام ومعلي صوت رنته ع الآخر 

علشان أي مصلحة يرد قبل ما الموبايل يرن 

والمصيبة في النوع ده إنك لما تحب تاخد نصيحته 

هو اللي يكرهك في الدنيا وما فيها .. 

يعني مجرد ما تخبط على بابه ولا تتصل بيه 

وتسأله النصيحة ، تلاقيه بدل ما يرد عليك بكلمتين 

لأ .. ده دخل لبس العباية وفتح الصالون 

وعمل شاي وبدأ يعمل محاضرة طويلة

 عن كيفية التقديم للكليات العسكرية بدون واسطة مثلاً

وإن الناس بتقف عليه طوابير علشان تاخد نصيحته 

وانت بس اللي ما بتجيش .. 

وياخدك ويوديك ويجيبك ويضيعلك يومك 

ويضيقلك خلقك .. ويصدعك وتمشي من عنده 

وانت ما فهمتش أي حاجة .. 

النوع الثاني : المراقب 

والنوع ده من القرايب ربنا بيبتليك بيه 

تكفيرًا عن ذنوبك ، وده على الأغلب بيبقى 

ابن عم أبوك مش عمك على طول يعني 

وده راجل منتشر في كل مكان في الدنيا 

غير مناسب إنه يكون موجود فيه إلا 

في الوقت اللي انت فيه بس .. 

يعني مزوغ من المدرسة ورايح تلعب بلاي ستيشن

تلاقيه حاجز الجهاز اللي جنبك 

تبقى مزوغ من نفس المدرسة وعلشان محدش يقفشك 

تضطر تسافر دولة تانية تقعد على قهوة 

تلاقيه على الترابيزة اللي جنبك بيشيش 

وهو أصلاً ما بيدخنش .. وتلاقيه بيمسي عليك 

ويبدأ يتعامل معاك بصيغة إن أبوك بيتعب 

في الفلوس اللي انت بتصرفها على القهاوي دي 

علشان تتعلم وإنه واجب عليه طبعاً

إنه يقوله علشان يربيك وضميره يرتاح 

وطبعاً هو ما بيقولوش لأنه ما يفرقش معاه انك تتربى 

ولا تتعلم ولا تبوظ حتى .. هو كل اللي فارق معاه

إنك كل ما تشوفه تديله تعظيم سلام 

بعد ما يبصلك بصة اللي هو أنا مش هقول 

بس ما تعملهاش تاني ، ويفضل ذالل أنفاسك 

لعند ما تبقى عجوز كهل وفي فرح أحفادك 

يجي يبصلك نفس البصة هي هي 

وكأنه ماسك عليك ذلة .. يا عم سيبني في حالي بقى 

ده أنا رجلي والقبر .. 

النوع الثالث : المسخناتي 

وده قاريبك اللي ربنا مش هاديه ومنى عينه 

يشوفك بتتعاقب قدامه ولا بتنضرب 

ويفضل يحوش عنك بس من جواه بيرقص ويغني 

كأنها حفلة تخرجه .. والراجل ده بسببه 

العلاقة بينك وبين أهلك بايظة .. 

وقاريبك ده تلاقيله زيارة دورية عندكوا في البيت 

سببها وغرضها الوحيد إنه يأكد لأهلك 

إنك ما تستاهلش اللقمة ، وإن أهلك ما عرفوش يربوك 

وفشلوا في تعليمك … يعني تلاقي الدنيا عيد 

والناس فرحانة والبيت زحمة وفيه ١٠٠ عيل غيرك 

بيجروا في البيت .. وده يصطادك من وسط كل الناس دي 

ويوقفك في وسط الصالون ويبدأ يسألك في جدول الضرب

اللي هو لا في مكانه ولا في زمانه 

وكل ما انت تجاوب يصعبها عليك أكتر 

وأكنك في من سيربح المليون .. 

لعند ما تعجز عن الإجابة ، فجأة يقول لأبوك 

الواد مش عارف حاجة ويجيبهاله من الآخر بقى 

ده هيدخل كلية حلوة ازاي .. هيتوظف ازاي 

هيتجوز ازاي .. هيخلف ازاي 

اللي هو ادفنوه من دلوقت وريحوا دماغكوا منه 

وكأن غرضه من كل ده إنك تبقى كويس وشاطر

ولما تيجي تشوف حاله هو تلاقيه 

خريج معهد بريد قسم لحس الطوابع قبل اللصق 

وما يعرفش ان في جدول الضرب حاجة 

بعد جدول ال ١٠ وأولاده في الأحداث 

بس يبقى متنكد وفاشل وأولاده فاشلين لوحده يعني ؟ 

لا طبعاً ما تجيش .. لازم يطلع كل اللي حواليه زيه 

ويثبت للعالم كله إنه زيه زي غيره 

ويطلع عليك عقده النفسية بسبب إن أبوك زمان 

جاب درجة أحسن منه مثلا في تانية ابتدائي 

طب وانا مالي ياعم الحاج ؟!

النوع الرابع : الدم عمره ما يبقى ماية 

والنوع ده من القرايب يبقى عامل مشاكل الدنيا 

وسبب في فتنة بين كل أفراد العيلة 

بسبب مادي مفيش كلام .. يعني نص متر 

زيادة في حتة أرض ، غطا حلة تايه من عندهم 

وبيشك في إنكوا سارقينه مثلاً

متر قماش .. كلام فاضي يتحل بأقل التكاليف 

ولكنه في أي قاعدة بيلجأ لجملة الدم عمره ما يبقى ماية

وده بيفكرني بمشاهد سيد كشري مع عبد الغفور البرعي

لما يكون مطلع عينه وهو مليونير 

بس مش عايز يزوده ربع جنيه وكل ما تحصل حاجة 

يقوله عيب يا سيد احنا أهل 

طب لما احنا أهل زي ما انت بتقول 

قاعد تنقل كلام من هنا لهنا ليه ومكرهنا في بعض 

هو كده .. ما يرتاحش إلا لما يخلي العيلة كلها 

تقطع علاقتها ببعض .. وده غرضه بسيط جداً

إنه يكون هو الشخص الوحيد المحبوب 

اللي ما بتطلعش منه العيبة .. واللي ما بيقاطعش حد 

لأنه هو اللي مخليهم يقاطعوا بعض .. 

والقرايب قد ما هما صحيح أهالينا اللي بنحبهم 

بس القرابة شيء مش كافي 

علشان يجبرنا اننا نحبهم ونحترمهم 

الحب والاحترام حاجة الواحد

بيتعب علشان يلاقيها ولما يضيعها 

لا قرابة بتنفع ولا صحوبية بتشفع 

ياريت بعد ما سمعت عن أنواع القرايب 

تقولنا في الكومنتات لو عندك تجربة مشابهة للي حكينا عنه 

وما تنساش تشترك في المدونة

علشان يوصلك كل جديد