كوارث تنظيم أول كأس عالم لكرة القدم

 

"  كوارث تنظيم أول كأس عالم لكرة القدم " سألت نفسك قبل كده هو إزاي بدأ كأس العالم ؟  منين جات الفكرة ؟! مين اللي جه في باله إنه يجمع منتخبات  من العالم كله يلعبوا كورة مع بعض ؟ كل الأسئلة دي إجابتها (جوليس ريميه)  رئيس الإتحاد الدولي لكرة القدم  لما قرر سنة ١٩٢٨ إقامة بطولة لكرة القدم تتعمل كل أربع سنين  تتنافس فيها منتخبات من كل مكان في العالم وفتح باب تقديم الملفات قدام الدول اللي عندها رغبة  في استضافة أول بطولة كأس عالم   وبالفعل قدمت إيطاليا والسويد وهولندا وإسبانيا  وهنغاريا والأوروجواي .. لكنهم بعدها انسحبوا كلهم  ما عدا الأوروجواي ، اللي قرر اتحاد كرة القدم  يكرمها بإستضافة أول نسخة من كاس العالم بمناسبة الذكرى المئوية لكتابة أول دستور ليها  وبعد سنتين من القرار ده بتقام أول بطولة كأس عالم لكرة القدم ، زي اليومين دول بالظبط وتحديداً في ١٣/٧/١٩٣٠ ، ولكن بالمقارنة بين آخر كاس عالم  قطر ٢٠٢٢ وأول كأس عالم هنكتشف الفرق الكبير  في التنظيم والمستوى واللي بيوضح قد إيه  كل حاجة في بدايتها بتكون عشوائية  وإن التنظيم المهول والجميل لكأس العالم  اللي بنشوفه في كل مرة .. ما جاش من فراغ  كأس العالم ١٩٣٠ تم بمشاركة ١٣ دولة بس  ٧ دول من أمريكا الجنوبية و٤ منتخبات أوروبية  والمكسيك وأمريكا من أمريكا الشمالية  في حين إعتذرت أكبر منتخبات أوروبا والعالم لأسباب كتير  منهم صعوبة السفر في الوقت ده وطول الرحلة  من أوروبا لأوروغواي .. والسبب التاني  لاعتذار إنجلترا وألمانيا وإسبانيا وهولندا  إن لاعبين المنتخبات دي اتهددوا بفقدان وظايفهم  لو راحوا كاس العالم .. وده بالفعل اللي حصل مع منتخب رومانيا  واللي كان أغلبه موظفين وعمال مصانع  ووقتها طبقت الشركات والمصانع على اللاعبين جزاءات بسبب  مشاركتهم في كاس العالم وانهم سابوا أكل عيشهم  وراحوا يلعبوا كورة .. لحد ما اتدخل رئيس الدولة نفسه ولغى الجزاءات دي  والحقيقة إن دي مش الحاجة الوحيدة الغريبة في أول كأس عالم وإن كاس العالم ده كان مليان بالكوارث في التنظيم كبيرة  وأولهم إن الدول المشاركة في كاس العالم ما أكدوش مشاركتهم  لحد قبل البطولة بشهرين وده اللي خلى (جوليس ريميه) رئيس الفيفا يسافر بنفسه علشان يتأكد إن كانوا هيشاركوا ولا لأ  ده غير منتخب بلجيكا اللي إختار تشكيلته الملك البلجيكي  كارول الثاني بنفسه ..  كمان من المشاكل الغريبة اللي واجهت منتخب يوغوسلافيا واللي كان مكون من لاعبين أوكرانيين وصرب  إنهم اتخانقوا بسبب النشيد الوطني ، فاللاعبين الكروات ما وافقوش يغنوا النشيد الوطني اليوغوسلافي ..  وفي الآخر شارك المنتخب اليوغوسلافي بنص لاعيبته تقريبا من الصرب لوحدهم وبعيداً عن كوارث تنظيم كاس العالم  إلا إن أول نسخة كانت مليانة بأرقام قياسية كتير جداً منها أول هدف اللي اتسجل عن طريق اللاعب الفرنسي  لوسيان لوران في الدقيقة ١٩ في أول مباراة في كاس العالم  بين منتخبي فرنسا والمكسيك .. صحيح منتخب فرنسا كل بعدها ٤ اهداف  ولكنهم اصحاب سبق بأول هدف في كاس العالم  وكمان أول ضربة جزاء كانت من نصيب منتخب تشيلي  في مباراة تشيلي وفرنسا واللي نفذها اللاعب التشيلي  كارلوس فيدال .. صحيح الحارس الفرنسي أليكس ثيبوت صدها  ولكنها أول ضربة جزاء في تاريخ كاس العالم  كمان من أغرب الحاجات اللي حصلت في أول كاس عالم  لما لبس حكم مباراة النهائي بدلة وكرافاته  وحلف إنه هيحكم الماتش كله بالشكل ده  وفي نفس المباراة حصلت أغرب حالة اغماء ممكن تتخيلها  لما نزل حد من المعالجين علشان يعالج لاعب مصاب  ولكنه وهو بيجري على اللاعب وقع فوق شنطته  واللي كانت فيها قزازة (كلوروفورم) واللي بسبب وقعته اتكسرت  فشمها الطبيب المعالج وأغمى عليه ..  أول كأس عالم ١٩٣٠ قدرت تحسمه الأوروغواي لصالحها  ومع انه كان من أغرب البطولات اللي أقيمت لكرة القدم ومليان بالكوارث التنظيمية .. لكنه فتح مساحة كبيرة قدام المنتخبات والدول علشان تشارك كورتها وثقافتها كمان  بعد ما سمعت حكاية أول بطولة كأس عالم تفتكر إيه أفضل بطولة حضرتها من بطولات كاس العالم ؟