مش لازم ناكل أكل أورجانيك .. الأورجانيك خدعة لجلب الأموال !

   

مش لازم ناكل أكل أورجانيك .. الأورجانيك خدعة لجلب الأموال !

مفيش حاجة إسمها أكل أورجانيك .. لا مصري  ولا مستورد .

ولو لاقيته أحب أقولك إنه زيه زي الأكل العادي بالظبط

مع إن سعره أضعاف سعر الأكل العادي    

هتقولي امال ايه اللي بيتباع في كل حتة ده ومكتوب عليه أورجانيك ؟

ما هو مش أي حاجة مكتوب عليها كلمة أورجانيك تشتريها وإنت مطمن 

لأن الكلمة دي ليها معايير صعبة قوي

وفي البداية لازم تكون عارف أصلًا يعني إيه أورجانيك ؟ 

 أكل أورجانيك معناه 

 إن من أول البذرة نفسها اللي خرج منها الأكل ده 

تكون غير معدلة وراثيًا .. 

كمان السماد الطبيعي

 لازم يكون من حيوانات بتاكل أكل اورجانيك 

ولا بتاخد أدوية ولا هرمونات

يعني مش مجرد إن الأكل مش مرشوش بمواد كيميائية يبقى أورجانيك ؟

لأ طبعًا .. فعلى حسب تقرير نشرته مجلة Scientific American  

 قالوا فيه إن الدعاية للأكل الأورجانيك مزيفة تمامًا

و مرتبطة بجذب المستهلكين مش أكتر

واللي للأسف 95٪ منهم ما يعرفوش عن الزراعة العضوية (الأورجانيك)

غير إنها ما بتتعرضش لمبيدات حشرية ،  زيك كده بالظبط 

وده كمان للأسف مش صحيح ..

  لأن التقرير نفسه بيثبت إن الزراعة العضوية

بيستخدموا فيها أكتر من ٢٠ مادة كيميائية

يعني اللي من وجهة نظرك أورجانيك .. ماطلعش أورجانيك  

وطلع مجرد خدعة سوقولها كويس 

علشان يخلوك تدفع فيها فلوس زيادة مش أكتر 

طب السؤال هنا .. أعمل ايه علشان آكل أكل أورجانيك ؟ 

مش لازم تاكل اكل أورجانيك أصلاً

لأنه مش ثابت علمياً إن كان صحي أكتر ولا لأ 

 فعلى حسب مشروع بحثي مستقل في إنجلترا

 عملوا 3558 عملية مقارنة

 بين محتوى الأكل العضوي والأكل غير العضوي 

والمفاجأة بقى .. انهم ما لقوش أي اختلاف بينهم 

لا من الناحية الغذائية .. ولا من ناحية مستويات التلوث 

والدراسة دي وغيرها كتير بيثبتوا إن كلمة اورجانيك

مجرد خدعة تخلي الناس تشتري الأكل بسعر أغلى من سعره الطبيعي مش أكتر

لمجرد إنه مكتوب عليه كلمة أورجانيك

زي فكرة البراند أو تفاحة آبل كده 

اللي بتدفع فيها مبالغ كبيرة للمظهر الإجتماعي 

 وأحب أقولك كمان إن الخدعة دي خالت على ناس كتير

لدرجة إنهم في أمريكا بس بيصرفوا على كلمة أورجانيك 28 مليار دولار في السنة 

إنما هنا بقى في مصر 

عمركِ ما هتلاقي حد يثبِتلك إن الأكل ده أورجانيك بنسبة ١٠٠٪

ولا جهة رسمية واحدة بتراقب معايير الجودة لحاجة زي دي 

يعني زي ما قولنا بالظبط .. لا مصر فيها أكل أورجانيك 

ولا هتلاقيه بره .. 

وحتى لو لاقيته … فهرجع أقولك إنه ملوش لازمة .. 

لأن كل الدراسات بتقول إنه مطابق تمامًا للأكل العادي

مش هيفرق معاك في حاجة 

إلا بقى لو شاريه وجاهة إجتماعية 

ساعتها هقولك وفر فلوسك وسافر .. ولا إتعلم لغة جديدة 

هتفرق في حياتك أكتر من كده 

ونصيحتي ليك .. ما تاكلش أكل أورجانيك لأنه مفيش