" أغرب قضايا التعويضات في العالم ! "

  

" أغرب قضايا التعويضات في العالم ! "

تخيل يا معلم تبقى نازل تقابل واحدة وأمها 

يمكن يحصل نصيب بينكم و تتجوزوا 

فتلاقي عروسة الندامة مستنياك هي و 23 واحد من عيلتها

 وناويين يتغدوا على حسابك  

هو ده اللي حصل بالظبط في الصين في اليومين اللي فاتوا دول

 لما رفعت عيلة صينية دعوى قضائية على شاب 

راح يقابل بنتهم في مطعم بغرض التعارف عليها علشان يخطبها

 ومجرد ما دخل المطعم اكتشف ان العروسة عازمة العيله كلها

 23 بني آدم من كل الفئات العمرية .. عواجيز ورضع و حوامل

 نسيوا كلهم هم جايين ليه وطلبوا اكل ب 20 الف يوان صيني

 يعني 2250 جنيه استرليني ، وده اللي صدم الشاب 

وبسرعة ساب العروسة وعيلتها وخد ديله في اسنانه وجري 

والعروسة واهلها اتدبسوا في الحساب

 مش يسكتوا بقى ويقولوا الحمد لله انها جت على قد كده 

لأ دول رفعوا على الشاب قضية بيطالبوه بدفع الفاتورة

 وكمان تعويض عن الضرر النفسي اللي سببه للعروسة

 لكن القاضي اتعاطف مع العريس ابو بخت مايل

وحكم لصالحه بدفع حساب وجبته هو بس 

يعني 1400 يوان صيني بس

  القضية دي قلبت الصين خلال اليومين اللي فاتوا لكونها

واحدة من أغرب قضايا التعويضات في العالم 

والحقيقة إنها ولا حاجة قصاد أغرب قضايا التعويضات في العالم

واللي منتشرة جدًا خصوصاً في أمريكا 

وأغربها في سنة ٩٢ لما واحدة ست أمريكية إسمها (ستيلا ليبيك) 

رفعت قضية على كافيه بسبب إن الويتر وقع عليها فنجان قهوة 

وقالت ان الموقف ده سببلها ألم نفسي كبير 

واتعرضت للاحراج وسط الناس .. وبناءًا عليه 

المحكمة حكمتلها بتعويض مليون دولار .. 

تخيل ! مليون دولار علشان فنجان القهوة اتدلق عليها 

ده لو حصل هنا القهوجي هيخليك تحاسب عليه .

القضية التانية بقى برضه في أمريكا في سنة ٢٠١٤ 

لما واحدة ست اتصابت بصاعقة برق 

وهي بتتمشى على شواطئ مسيرنا بيتش في فلوريدا

ولأن سلطات الشاطئ ما حذرتش الناس بوجود رعد وبرق 

رفعت الست المحظوظة دي قضية على السلطات المحلية 

وكسبتها واتحكملها ب ١٠ مليون دولار .. وقعوا عليها م السما حرفيًا

من قضايا التعويضات الغريبة في أمريكا برضه 

في سنة ٢٠١٩ لما اتقدم ركاب طيارة American Airlines

بشكوى ضد شركة الطيران علشان اتعرضوا لمطبات هوائية 

وهما ع الطيارة لمدة ٢٨ ثانية .. 

والحقيقة إن ال ٢٨ ثانية دول كان تمنهم غالي قوي 

لأن المحكمة غرمت شركة الطيران بدفع مليون دولار للركاب 

ومن أمريكا لدبي وواحدة من أغرب قضايا التعويضات

لما واحدة ست أسيوية قدمت قضية تعويض في سنة ٢٠١٥ 

ضد بقرة .. بالظبط زي ما سمعت كده .. قضية تعويض ضد بقرة 

طب عملتلها ايه البقرة الغلبانة ؟ 

كل اللي حصل إن الست دي عندها ٤٥ سنة ولسه ما اتجوزتش

وواحدة صاحبتها نصحتها تشتري بقرة 

هتجلبلها الحظ وحالها هيتعدل وهتتجوز 

وبالفعل الست اشترت البقرة وربتها واهتمت بيها لمدة سنة 

ولكن ما حصلش نصيب .. قامت رافعة قضية تعويض ضد البقرة 

وطبعاً المحكمة في دبي رفضت الدعوى تمامًا

الحقيقة إن قضايا التعويضات تعتبر شغلانة مربحة لبعض الناس 

وخصوصًا في نيويورك - أمريكا (بلد التعويضات)

وممكن بسبب خطأ بسيط تبقى بين ليلة والتانية مليونير 

لكن لو انت هنا في مصر أو الوطن العربي .. كل اللي هيحصلك 

انك هتطلع تريند وهيتقال عليك نكت

دلوقت بقى بعد ما سمعت عن أغرب قضايا التعويضات في العالم

تفتكر مين ممكن ترفع عليه قضية تعويض وتبقى غني بعدها ؟