المغول .. في دقايق

المغول .. في دقايق 

 المغول .. إسم سبب الرعب لسنين طويلة للعالم كله 

شوية قبائل لما اتحدوا مع بعض قدروا يجتاحوا 

العالم وينتشروا فيه زي الجراد ، واتعرف عنهم الوحشية والهمجية 

ومهنتهم الأصلية كانت الحرب  

كلنا درسنا عن المغول في المدارس ، وعن قد إيه كانوا وحشيين 

وهمجيين ودخولهم لأغلب العواصم الإسلامية وتدميرهم ليها ..

بس ولا مرة عرفنا هما مين بجد ؟ جايين منين ؟ 

وأصلهم وفصلهم .. وقصتهم الكاملة .. 

وده اللي هنحاول نختصره النهارده في حلقتنا 

النهارده هتكون من قصص وأحداث  

يعود أصل المغول إلى هضبة منغوليا في صحراء غوبي

 على أطراف بلاد الصّين الشّماليّة، 

و قبائل المغول كانت بتعيش في المنطقة دي مع قبائل تانية كتير

 وكان فيه بينهم صراع دائم وخصوصاً مع التّتار، 

إيه ده ؟ يعني المغول مش هما هما التتار ..؟ 

لا طبعاً .. بس مش ده المهم دلوقت ، المهم إن القبائل دي 

كان منتشر بينهم الديانة الشّمانية و دي ديانة تُقدس أرواح الأجداد يعني بيعبدوا موتاهم 

وعلى الرّغم من الصّراع القائم بين القبائل دي 

إلا أنهم قدروا على تأسيس أكبر إمبراطورية في التاريخ 

إمتدت من سيبيريا وبحر البلطيق إلى حدود الجزيرة العربية 

 وبلاد الشام وفلسطين جنوباً

 ومن الجزر اليابانية والمحيط الهادي إلى وسط أوروبا 

يعني كانوا بيحكموا أغلب العالم حرفيًا

  المغول كانوا بينقسموا إلى ستة قبائل رئيسية

 والقبائل دي هي : قبيلة القيات الصغيرة اللي انحدر منها جنكيز خان، 

و قبيلة الأويرات وهي أكبر قبيلة بينهم من حيث العدد

و قبيلة النايمان وهي من قبائل الأتراك واللي كان بيغلب عليهم الطابع المغولي

وقبيلة الكراييت وهي أقوى القبائل المغولية 

و قبيلة الماركييت واللي كانت بتمتلك أكبر جيش بينهم ، 

وقبيلة التتار اللي عرفوا بالهمجية والبربرية 

وبالنسبة لتأسيس دولة المغول فإن جد المغول الأكبر كان إسمه بدانتسار

واللي حاول لفترات طويلة توحيدهم ولكن دايماً كانت محاولاته بتبوء بالفشل 

الا ان اللي وحدهم هو إبنه (قيدو) 

وده أول حد من المغول يطلق على نفسه لقب خان

 وبعده وصل جنكيز خان إلى حكم المغول وقدر يوسع امبراطوريّته

 وقام بتقسيمها بين أبنائه فكانت روسيا، والقوقاز، وخوارزم، و بلغار

 تحت سيطرة ابنه جوجي،

 أما ابنه جغطاي فاداله حكم تركستان الغربية 

وبلاد الأويغور وبلاد ما وراء النهر

وابنه تولوي كان له حكم  خراسان وفارس وبلاد العرب وآسيا الصغرى

 وابنه أوغطاي إداله بلاد المغول والصين 

أما عن صراعات المغول والمسلمين فليها قصة طويلة جداً 

بتبدأ مع الدولة الخوارزمية في عهد علاء الدين خوارزم شاه، 

واللي تمكن جنكيز خان من تخريب دولته والقضاء على جيوشها وسلطانها وسكانها،

 وفي وقت غزوه للشرق الإسلامي قام جنكيز خان 

بتعذيب المسلمين ودمر كل ما يصادفه في بلاد المسلمين 

وبعد وفاة جنكيز خان انقسمت الدولة إلى أربعة أقسام

 وبدأ الإسلام بالانتشار فيها، فاعتنق العديد من المغول الإسلام 

ومنهم حاكم الجيش الذهبي أو القبيلة الذهبية في روسيا

بركة خان وهو أول أمير مغولي يدخل في الإسلام

  وكان بركة خان على علاقة جيدة مع الظاهر بيبرس

 ومتحالف كمان معاه ضد المغول نفسهم 

و دخول المغول في الإسلام خلاهم يتحولوا بشكل مفاجئ

 من شعوب تسفك الدماء إلى شعوب إنسانية محبة للخير 

أما بالنسبة لحملات المغول على المسلمين فبدأت سنة 651 هجرية

لما بعت هولاكو إلى إيران للقضاء على دولة العباسيين في بغداد،

 بجيش عدده ١٢٠ ألف فرد واحتل إيران بكل سهولة 

 بعدها انتقل لاحتلال بغداد وقضى على العباسيين  

بعد أربعين يوم من القتل والتخريب فيها، 

 وما نجيش من الغزو ده إلا عدد قليل من المسلمين،

 وبعد ما سيطر هولاكو على بغداد اتجه للشام  

وقدر يدخل حلب سنة 658 هجرية وقتل أهلها 

سقطت في ايده دمشق وغزة والخليل

 وبالشكل ده قدروا المغول خلال ٧ سنين بس 

تدمير ايران والعراق والشام وابادة أنظمة حكمهم 

 طب ازاي خلص الكابوس ده ؟ وازاي خرج المغول من الدول الإسلامية ؟

الحقيقة دي قصة محتاجة حلقات كتير .. بس بإختصار  

إن المماليك أعدوا خطة للتخلص من الغزو المغولي

 وكان هدفهم الأول استعادة غزة و اهتموا بتسليح جيشهم وتنظيمه

 وقسموا جيش المسلمين إلى مجموعات تضم كل مجموعة 400 جندي،

 ومع كل الترتيبات دي التقى جيش المسلمين بالمغول

 وكان لهم الغلبة ، فبدأ المغول بالانسحاب  من المعركة

 لكن جيش المسلمين بقيادة بيبرس لاحقوا المغول

 لعند ما وصلوا لمنطقة عين جالوت 

 ودي المنطقة اللي حصلت فيها المعركة الحاسمة واللي حصلت في 3 سبتمبر 1260م

 فتمكن الظاهر بيبرس من تخليص الشام من المغول بسهولة

 وبعد المعركة دي توقف زحف المغول في أنحاء العالم، 

وشمال إفريقيا وأوروبا وكذلك المغرب ، أو بمعنى أصح إنكسرت شوكتهم .. 

المغول زيهم زي أقوام وامبراطوريات كبيرة

تجبروا في الأرض ولوقت معين حسوا انهم بيمتلكوا العالم

أقوام تعودوا على الحرب وكانت دي مهنتهم الرئيسية 

لا زراعة ولا تجارة ولا صناعة .. ونهايتهم كانت بسيطة زي بدايتهم .. 

بمجرد توحد المسلمين تحت راية واحدة .. قدروا يخرجوهم

وينتصروا عليهم ويرجعوهم بلادهم بلا رجعة 

وبكده تكون انتهت حكايتنا النهارده عن المغول

ياريت لو عندك معلومة مختلفة تقولنا في الكومنتات

وما تنساش تاخدلك لفة في الحلقات اللي فاتت.. هتنبسط