"  أصل طبق الفتة .. فرعوني ولا شامي ؟!  "

لو مستني العيد علشان تاخد اجازة 

تخرجلك خروجة حلوة ولا تقضيها نوم 

فغيرك مستنيه لأسباب تانية خالص 

متلخصين كلهم في كلمة واحدة بس ..

 الفتة .. يا سلام ع الفتة

 باللحمة الضاني والخل والتوم بعد صلاة العيد 

هو ده الفطار بصحيح .. فطار يستاهل 

انك تبوظ أي دايت علشانه .. فطار ملوك  

استنى .. انت هتقعد تاكل الفتة كده 

من غير ما تعرف أصلها وفصلها 

شوية اهتمام بالحاجة اللي بتحبها علشان تحبك هي كمان 

والحقيقة إن الناس لسنين طويلة كانت محتارة 

في أصل طبق الفتة ده اللي موجود 

في كل البلاد العربية .. هل هي فرعونية ولا شامية 

ولا خليجية وخصوصاً إنها موجودة 

في كل الثقافات .. يعني احنا كمصريين عندنا 

طبق الفتة الرسمي البسيط .. رز ولحمة

وصلصة بخل وتوم وعيش 

اخواتنا الشوام بقى لعبوا فيه شوية 

وعملوا منه فتة مكدوس وشاورما وفراخ وحمص 

وسموه تسقية .. أما في الخليج فسموه فتات 

وفي ليبيا مثرود وفي تونس لبلابي

وليلة كبيرة قوي سعادتك 

والسؤال هنا .. هو مين غاشه من مين ؟

يعني مين صاحب أول طبق فتة ؟

مين صاحب الفكرة العظيمة دي اللي بتخلي العيد له معنى ؟ 

إحنا بقى حسمنا الجدل وعرفنا أصلها وفصلها 

وجبنا قرارها .. وبنقولك بكل ثقة 

الفتة طبق فرعوني .. فرعوني أصلي 

وده بسبب إكتشاف أول وصفة للفتة 

على جدران معبد سوبيك في كوم امبو

وسوبيك أو سوبكي .. لا مش اللي في بالك

 ده إله مصري قديم 

بيترسم في المعابد بجسم إنسان و راس تمساح 

وكان مسؤول عن الوقاية ضد الشر في الأساطير 

والخصوبة والبراعة العسكرية وحاجات كتير جدًا

واللي لقوا في معبده جدارية بتحكي وصفة 

لأول طبق فتة في التاريخ .. قدمته 

كاهنة إسمها كارا في عيد الإله 

لما دبحت خروف وحشته بصل وبرغل 

وزينته بالباتنجان المقلي وقطعت عليه عيش 

ومن هنا اعتبروا طبق الفتة طبق له قدسية 

ومفضل عند الملوك .. جه بعدها الفاطميين 

عملوا نفس الطبق بس بسطوه شوية 

رز ولحمة وعيش و شوربة .. تقريبًا كده 

ما كانش عندهم طولة بال 

ومن الفاطميين انتشر في المنطقة العربية 

وكل حد حط التاتش بتاعه .. وسماه بالإسم اللي على مزاجه 

إسم يعبر عن ثقافته ومكونات بيحبها 

بس في الأول والآخر هي فتة

ها ؟ عرفت بقى أصل الفتة ؟! .. تقدر دلوقت بس تاكل وانت مطمن 

وأيًا كان إنت بتاكل الفتة من أي بلد عربي

وأيًا كان انت بتسميها بأي إسم .. 

فكل سنة وانت طيب .. واحنا كأحفاد الفراعنة 

بنقولك أحلى مسا عليك .. ومش عايزين منك 

غير انك تبقى مبسوط .. مد ايدك ما تتكسفش