إزاي الناس كانت بتصحى قبل إختراع المنبه ؟
صاحي متأخر على شغلك مع إنك ظابط 10 منبهات ؟
إسمحلي أقولك إنك بتدلع .. لأنك لو كنت عايش
قبل ما يخترعوا المنبه .. كان زمانك نايم لحد دلوقت
سنة 1787 في ولاية نيوهامشاير في أمريكا
ظهر لأول مرة اختراع المنبه على يد
مخترع اسمه ليفي هوتشينز ..
وده معناه إن إختراع المنبه حديث نسبيًا
إمال الناس قبلها كانوا بيصحوا إزاي ؟
أنا هقولك .. كان فيه طرق كتير جدًا
بتصحي الناس من النوم قبل المنبه
وأولهم الساعة الشمعية
واللي اخترعها الصينيين سنة 1500
ودي كانت عبارة عن شمعة طويلة
مغروس فيها مسامير ومثبتة في طبق معدني
وبمجرد ما الشمع بيدوب بتقع المسامير في الطبق
وبتطلع صوت ، صوت المسامير ده بقى
هو اللي كان بيصحي الناس
في الوقت ده ولسنين طويلة ، كانت من أكتر
الطرق المعتمدة للصحيان م النوم
كانت أجراس الكنايس وصوت الأذان
إنما بقى من بعد سنة 1600 قل إعتماد الناس
على نفسهم في موضوع الصحيان ده ،
وخصوصاً الأغنيا منهم
وبدأوا يعينوا ناس يصحوهم ، زي المسحراتي كده
بس دول ما كانوش بيستخدموا طبلة
لا دول كانوا بيعدوا على زباينهم
ويخبطوا على شبابيكهم بعصاية
وأحيانًا كانوا بيستخدموا أعواد البوص المفرغة
ويحطوا فيها حبوب بسلة وينفخوا فيها
فتطير البسلة على قزاز شبابيك الزباين ، ويصحوهم بالشكل ده
أما بقى الناس اللي ما كانتش بتقدر تعين حد يصحيهم
كانوا بيتبعوا طريقة غريبة جدًا
وهي السيطرة على البول ، وده اللي قاله موقع mentalfloss
إن الناس في الوقت ده كانوا بيقدروا
يظبطوا الوقت اللي جسمهم هيحتاجه
علشان يصحيهم يدخلوا الحمام .. وكان الموضوع ناجح جدًا
ده غير أصوات الطيور والمصانع
اللي علشان كانت قليلة ونادرة
كانت كفيلة تصحي قرية بحالها ..
فضل الوضع كده لحد سنة 1940
لحد ما بقى المنبه منتشر في كل البيوت تقريبًا
ومن ساعتها وبدأ الناس يعتمدوا عليه إعتماد تام
وباظت عندهم الساعة البيولوجية
بتقول ميليندا جاكسون زميلة الأبحاث بمعهد ملبورن بأستراليا
والمتخصصة بأبحاث النوم ، إن الإنسان
عنده عمليتين بيعتمد عليهم في الصحيان والنوم
وهما عملية التوازن الهرموني وإيقاع الساعة البيولوجية
ولو الحاجتين دول مظبوطين عندك مش هتحتاج لا منبه
ولا حد يصحيك .. ولا هتتأخر بعد كده على شغلك
بس لو قمت بعد كل المنبهات دي متأخر
يبقى تستقيل أحسن .. وتكمل نوم
.jfif)
.jfif)
المشاركات
ليست هناك تعليقات:
إرسال تعليق
أتشرف بتعليقك ونقدك دائمًا ..