" الأوڤرثينكينج - مرض ما قبل النوم "

 

"  الأوڤرثينكينج - مرض ما قبل النوم "

كام مرة قبل ما تنام فتحت بينك وبين نفسك فيلم من تأليفك

وتخيلت حوارات وقصص وحواديت كنت إنت بطلها

أو كنت ضحية فيها ، قصص لو اتعملت مسلسل لمحمد رمضان

هتنجح وتكسر الدنيا .. قصص بتفضل تتخيلها بالتفصيل الممل 

لدرجة إنها بتطير من عينك النوم وبتخليك قايم تاني يوم لشغلك

مش طايق نفسك وكل ده تحت مسمى الأوڤر ثينكينج 

أحب أقولك ، أهلاً بيك .. تقدر تتفضل جمب اخواتك 

لأن اللي عندك ده مرض نفسي اسمه … متلازمة جوسكا  

متلازمة جوسكا يقصد بها نوع من الاضطرابات العقلية 

اللي بتؤثر على نفسية الإنسان وبتصيبه بالإكتئاب ،

 بيتم من خلالها خلق أحاديث افتراضية مع العقل سواء إيجابية أو سلبية

 ولكن أغلب الأفراد المصابين بيها ما بيفكروش إلا بسلبية 

لدرجة تخليهم دايمًا حاسين انهم ضحية لشيء ما مجهول 

أو إنهم ظلموا حد بشكل كبير وده بيخليهم ندمانين جدًا 

وللأسف الشديد.. كل ده بيكون جوه دماغهم وبس 

وما حصلش منه أي حاجة على أرض الواقع 

متلازمة جوسكا هي من أغرب المشاكل اللي بتواجه الإنسان 

أولاً لأنه غير مدرك ان دي مشكلة .. وزي ما قولنا قبل كده 

بيكون متخيل ان ده مجرد أوڤر ثينكينج  

أو فاكر إنه بالشكل ده بينفصل عن الواقع شوية 

الواقع اللي بيكون شايفه صعب ومحزن بدون مبرر 

لدرجة ممكن توصله لإدمان الموضوع ده  

ويفضل العالم الخيالي اللي صنعه لنفسه بنفسه 

ثانيًا بقى متلازمة جوسكا خطيرة جدًا لأن لعند دلوقت 

مفيش أي أعراض ليها معينة أو حصر للمصابين بيها 

واللي ع الأغلب هو عدد كبير جدًا  

في متلازمة جوسكا بيتم الحوار مع العقل لساعات

 وبنلاحظ على المصابين بيها انعزالهم تمامًا عن الواقع

ودي مرحلة تانية من مراحل جوسكا .. 

وإنه الموضوع بيتطور بعد كده 

لمجرد انها عدد ساعات قبل النوم 

لأنه يكون في أي حتة وفي أي وقت 

وده ممكن يتطور لعدد كبير من الهلاوس السمعية والبصرية

يعني يبدأ المريض بمتلازمة جوسكا 

يشوف ويسمع حاجات مش موجودة على أرض الواقع 

ويعيش مع أشخاص من وحي خياله 

وتؤدي الاصابة بمتلازمة جوسكا إلى كتم الأحاديث 

اللي بتدور في عقل المصاب ، وعدم مشاركته لأي مشكلة

  لأنه بيشارك مشاكله بالفعل مع العالم الافتراضي بتاعه

  وده بيؤثر على الأداء المهني والعلاقات الاجتماعية عند المصاب، 

فلما تشوفي جوزك بعد كده سرحان ومش مهتم انتي بتقولي ايه  ..

 اعرفي انه مش منفضلك ، لأ ده صاحب مرض يا عيني ومحتاج يتعالج

 دكتور وليد هندي، استشاري الأمراض النفسية، قال أنه من أهم الأحاديث

 اللي بيجريها الإنسان في حياته هو حديث النفس 

وأكد على أن الفرق بين الحديث مع النفس

 ومتلازمة جوسكا هو الوقت الذي بياخده الشخص المصاب في السرحان ده

 فلو كانت الفترة اللي بيسرح فيها بسيطة وما بتعزلوش عن العالم 

فده طبيعي، أما في حالة التأثير على نفسية الشخص،

 وخلق أحاديث افتراضية مع العقل فهو بالشكل ده

 مصاب بمتلازمة جوسكا، وهي متلازمة خطيرة لا يجب التغافل عنها

ومن أعراض متلازمة جوسكا 

الاكتئاب ، و شحوب البشرة ، و ضعف الشهية

اعتزال العالم أو الانطواء و فقدان الشغف

يا ما شاء الله أنا عندي كلهم ..

أما عن أسباب الإصابة بمتلازمة جوسكا

فمن أهمها الإهمال في مرحلة الطفولة من الأهل، 

والقسوة الزايدة في التعامل، ووصف الأهل لأولادهم بالفشل

 وقلة العلاقات الإجتماعية لدرجة الوحدة 

ولكن السبب الأهم هو الخذلان من شخص أهل ثقة للمريض 

 وده اللي بيخليه يلجأ لخلق عالم موازي للحقيقة و يهرب له

ومن المعروف إن الستات هما الأكثر عرضة للإصابة بالمتلازمة

ولو انت واحد من الناس اللي بيظهر عليهم أي عرض من الأعراض دي  

 فلازم تبدأ بمشاركة مشاكلك مع الناس 

 وما تكتمش في نفسك ، حتى ولو عن طريق

 إنشاء صفحة على الفيس بوك ومشاركة المتابعين حواراتك .. أصل احنا ناقصين

 والكتابة هي العلاج للتخلص من المشاعر السلبية .

وبعد ما عرفتوا عن متلازمة جوسكا .. 

تفتكر إن عندك نفس الأعراض .. وهل الموضوع وصل بيك 

انك تعيش في عالمك الخاص وتتكلم فيه وتشارك فيه كل اللي مضايقك 

ولا كلامك مع نفسك مجرد أحلام وافكار وترتيبات لمستقبلك مش أكتر

ياريت تقولنا في الكومنتات وما تنساش تلف لفة في المواضيع اللي فاتت 

هتنبسط