أغرب لغات العالم احنا انكدب علينا كتير ، لكن كذبة  زي إن اللغة الكازاخستانية أصعب لغة في العالم  وينتشر ليها فيديوهات لثلاث مذيعين فيها الضحك ده ؟  https://youtu.be/8RRzWeRV-oY لا مش للدرجة ..أنا ضحكت صحيح لكن ده تضليل  لأن ده كان مجرد تدريب على النطق ومخارج الألفاظ للمذيعين مش أكتر وجرايد عالمية كدبت الخبر زي وكالة فرانس بريس  وواحد من المذيعين اللي ظهر في الفيديو قال ده على حسابه على الانستجرام  إنما بقى لو عايز تعرف أغرب لغات العالم  والمعتمدة بجد .. أنا هقولك  أول لغة الآرتشي Artchi  ودي لغة بيتكلم ببها ٩٠٠ فرد بس  عايشين على نهر الرايسور في روسيا  بس اللغة دي مش غريبة بسبب إن اللي بيتكلموا بيها عددهم قليل  لأ هي غريبة لأن كل فعل فيها بيتصرف  لـ مليون ونص شكل .. يعني إحنا كل اللي نعرفه عن الأفعال  إنها ماضي أو مضارع .. أو أمر مثلاً ولو ضليعين قوي هنعرف إن منه مذكر ومؤنث  ومفرد ومثنى .. كده يعني .. إنما مليون ونص تصريف  ده فضا زيادة قوي بصراحة .. واضح هما عددهم قليل ليه .. تاني أغرب لغة في العالم بقى .. هي لغة سيلبو جوميرو  Silbo gomero  ودي لغة منتشرة على ساحل اسبانيا  وكل حروفها عبارة عن تصفير .. وده لأن أهلها بيعيشوا على مسافات متباعدة  وأحيانًا بيعيشوا وبينهم جبال كمان  فتلاقي واحدة بتصفر لجارتها اللي واخدة شقة ايجار جديد  على الناحية التانية من الجبل وتقولها  عندكيش شوية ملح ؟ التانية تبعتلها الملح .. وكده يعني  بدل ما حد يقطع المشوار ده وما يلاقيش عندها ملح  طب أنا ما بعرفش أصفر .. أعمل إيه بقى ؟ لأ إنت تاكل الأكل دلع بقى ..  تالت أغرب لغة في العالم لغة الكوسى Xhosa هي الكوسة كمان بقت لغة ؟ .. عمرها  ودي لغة بيتكلم بيها ٨ مليون شخص في جنوب أفريقيا وهي عبارة عن شوية نقرات باللسان  كل حرف له نقرة حاجة زي كليك الماوس كده  وعلشان كده بيسموها X clicks وكلها على بعضها ١٥ نقرة ..  ولا تويفل بقى ولا كلام من ده هياكل معاهم  بس ما تقلقش فيه فيديوهات تعليمية للغة على اليوتيوب  رابع أغرب لغة في العالم ، لغة بيراها Piraha  وهي لغة خاصة بشعب البيراها في البرازيل  والغريب في اللغة دي إنها مفيهاش كلام يوصف لا الألوان ولا الأرقام  فكل الألوان هناك يا غامق يا فاتح ..  ولا تقولي بقى كشمير .. هاڤان .. مفيش الكلام ده  وكل الأرقام يا إما قليل ياكتير  ومنهج رياضة اتنين عندهم يخلص في كلمة إلا كلمة  ولا عمرهم عملوا حساب للمثلثات ..  خامس أغرب لغة في العالم  لغة بيتجانتجاجارا .. يا عم ده اسمها نفسه صعب ما بالك اللغة بقى .. ؟! ودي لغة السكان الأصليين لإستراليا وبيعيشوا  في وسط آسيا وبيتعلموا اللغة دي في المدارس كمان لحد النهارده ودي لغة كلامها قليل علشان كده تقدر تطلق على كذا كلمة نفس النطق  طب واللي يفرق بين واحدة والتانية ايه ؟ النقطتين فوق بعض .. اه والله زي ما بقولك كده  النقطتين فوق بعض يتخليك تعرف ده حرف ساكن ولا متحرك  طب وهو بيتكلم هيقولي نقطتين فوق بعض ازاي ؟ لا ما هو مش مس عواطف .. هو مش هيقول  هو هيكتبها بس .. لكن في الكلام مفيش  عايز تفرق بقى الكلام افهمه بالسياق .. بالشبه  الحقيقة إن سهولة التواصل دي نعمة كبيرة وإنه يكون عندك لغة قديمة وموثقة بأشكال كتير  ده سبب أساسي في المواكبة والتطور والحمد لله إننا ما اتولدناش في بلد  بيتكلموا بالشكل ده .. كان زماني بتعلم اسمي لحد دلوقت