" من غير قايمة ولا نيش - قصة حب طائر اللقلق تجوب العالم "

 " من غير قايمة ولا نيش - قصة حب طائر اللقلق تجوب العالم "

طول عمرنا نسمع عن روميو وجولييت ، عنتر وعبلة

وفاكرين إنها قصص حب مليانة بالإخلاص 

ولكن بعد اللي هتسمعه في الحلقة دي عن قصة حب بين طائرين

هتغير تظرتك في كل اللي سمعته قبل كده

‏سنة 1993 راجل كرواتي عجوز إسمه فوكيتش كان بيصطاد.. شاف طائر لقلق مصاب 

نتيجة ضرب الصيادين له بالنار 

‏الراجل اخد الطائر عنده البيت و قرر يراعيه لحد ما يخف.

‏اتضح ان الطائر ده كان أنثى ف الراجل قرر يسميها ميلينا ،

 لكن ، ‏بعد ما عمنا ضمد جراح ميلينا واكلها و عالجها و خفت الحمد لله

 اتضح ان الطلق الناري عمل مشكلة في جناحها و سبب ليها اعاقة

 و ميلينا خلاص فقدت القدرة على الطيران

‏فالراجل العجوز قرر يكمل الاعتناء بيها و بني ليها عش فوق سطح البيت

 و اعتبرها زي بنته بالظبط لحد سنة 2001

‏وكان طول الفترة دي هو اللي بيروح يصطاد سمك ليها و يأكلها 

و تركب معاه في عربيته و يتفسحوا كل يوم مع بعض 

و هي عايشة في العش بتاعها فوق بيته.

‏سنة 2001 بيظهر لقلق تاني في السما فوق بيت الراجل ،

لكن المرة دي ذكر ، و يبدأ يتقرب من ميلينا و يراعيها.

‏كل يوم الطائر الجديد ده يروح يصطاد سمك ل ميلينا و يأكلها و يقعد معها ،

 ف الراجل فهم ان ميلينا تقريبا كده بتحب

 فقرر يكبر العش اللي فوق السطوح بتاعه

 و يسمي الطائر الجديد حبيب ميلينا " كلابتان "

فضل ‏كلابتان يقضي الوقت مع ميلينا و يراعيها

 لحد ما في يوم في اخر الخريف فجأة بيختفي

‏اختفاء كلابتان المفاجئ ده بيأثر علي ميلينا بشكل كبير،

 بتبدأ ترفض الاكل و وزنها ينزل و حالتها الصحية بتتأثر يوم بعد يوم.

واللي لازم تعرفه إن‏ اللقلق من الطيور احادية الشريك ،

 يعني بتختار شريك واحد فقط بتتزاوج معاه طول فترة حياتها

 و ما بينفصلوش أبدًا ولا عندهم لا طلاق ولا خلع

‏لحد يوم في أول الربيع فجأة .. كلابتان ظهر تاني

واتضح إن ‏كلابتان كان مشارك في موسم الهجرة و رجع

كان مهاجر فين ؟ جنوب أفريقيا !

 و‏دي حاجة المفروض طائر اللقلق يعملها كل سنة 

لكن ميلينا هي اللي ما بتطيرش ..

و‏الحقيقية أن كلابتان أساساً كان بيبقي من أخر طيور اللقلق 

اللي بتهاجر من أوروبا كل سنة في الخريف و من اوائل اللي بيوصلوا في الربيع ، 

عشان بس يقضي كام يوم زيادة مع ميلينا و يراعيها

ومش مجرد سفر عادي .. لأ 

ده ‏بيسافر 13 ألف كيلو متر و يعدي خط الاستواء مرتين في السنة، 

بس بيرجع بردو لعش ميلينا.

‏الموضوع بيستمر كتير ؟ اه جداً 

‏لحد 2017 فجأة كلابتان مبيظهرش لحد شهر ابريل ، و مفيش أي اخبار عنه

‏فعمنا فوكيتش بيدور علي معلومات و يشوف طريق هجرة الطيور

 لقي انها بتعدي من لبنان ، و كل سنة بيتم التعامل مع

 مسار هجرة الطيور هناك انه مهرجان للصيد

‏كل سنة حوالي 2 مليون طائر مهاجر بيتم اصطيادهم في رحلتهم 

 ف الراجل بيقرر انه يجمع الريش اللي كلابتان سابه وراه قبل ما يهاجر

 و استخدمه في كتابة رسالة لرئيس لبنان 

 عن قصة ميلينا و كلابتان و المصير السيئ اللي كلابتان 

غالبا واجهه في رحلة الهجرة و الصيد

‏رئيس لبنان بيتأثر بالرسالة و القصة و بسببها

 بيمرر سلسلة من القوانين اللي بتحمي الطيور المهاجرة 

و بيغير قوانين الصيد والحفاظ على الحياة البرية .. بس برضه كلابتان لسه مختفي

‏لحد يوم في آخر الربيع في أواخر موسم الهجرة 

بيظهر طائر في السما فوق بيت الراجل ،

طائر مرهق ، مصاب ، و مغطى بالجروح ، مسافر 13 ألف كيلو متر بس وصل 

.. كلابتان بيرجع تاني العش مرة تانية و يوصل ل ميلينا 

‏علاقة  ميلينا و كلابتان استمرت 20 سنة 

من غير ما يكون فيه قايمة ولا نيش 

انجبوا أكتر من 60 فرخ كلهم كانوا بيهاجروا و يسيبوا العش كل سنة

 في رحلة هجرة اللقلق بس محدش بيرجع غير كلابتان كل سنة في الربيع

‏في شهر يوليو 2021 ميلينا بتموت بسبب السن 

‏كلابتان كان موجود معها وقت موتها في أخر لحظات ليهم مع بعض

‏2021 كمان كانت آخر سنة بيرجع فيها كلابتان للعش ،

 فوكيتش قال انه يتمنى رجوع كلابتان

 مرة تانية للعش و انه يشوفه تاني

‏بس الحقيقة  إن كلابتان معندهوش سبب للرجوع لنفس العش ده تاني 

 بعد رحيل ميلينا

الحقيقة دي من أشهر قصص الوفاء والحب في العالم

وبتضرب لنا أمثلة كتير على قد إيه ممكن الحيوان 

يكون أكثر إخلاص من الإنسان .. اللي المفروض 

إن ربنا خلقه مفعم بالأحاسيس والمشاعر .. 

قصة كلابتان وميلينا .. قصة اتخلدت .. 

ياريت نتعلم منهم ..