أغرب الأرقام القياسية في موسوعة غينيس ، لن تصدقها !

   

أغرب الأرقام القياسية في موسوعة غينيس ، لن تصدقها !

عمرك تخيلت إن سبب تنمر الناس عليك

ممكن يفتحلك أبواب الشهرة ، أو إنك تدخل موسوعة جينيس

بسبب حاجة غريبة إنت الوحيد اللي بتعملها أو مميز فيها 

حتى لو كانت الحاجة دي تافهة وملهاش أي قيمة 

وإيه المانع ؟ إذا كانت موسوعة جينيس نفسها 

كان الهدف من تأسيسها حسم الجدالات التافهة 

بين الناس في الحانات والبارات .. 

بدأت فكرة موسوعة جينيس في خمسينات القرن العشرين

لما حضر السير هيو بيفر المدير التنفيذي 

لمصنع البيرة (جينيس) حفلة رماية وصيد 

في مقاطعة ويكسفورد في أمريكا 

وخلال الحفلة حصل نقاش جدلي بين الحضور 

عن أسرع طائر في قارة أوروبا 

وبعد ما دوروا في كل المصادر ما وصلوش لحاجة 

وفي 30 نوفمبر لسنة 1954 قرر السير بيفر 

إنه يصدر أول كتاب من موسوعة جينيس 

يجمع فيه أغرب وأعلى الأرقام القياسية في كل حاجة وأي حاجة تقريبًا 

الكتاب حقق مبيعات مهولة والفكرة كسرت الدنيا

ومن يومها لحد النهارده والناس من كل حتة في العالم 

بيتنافسوا على إنهم يدخلوا الموسوعة 

ومعاها يدخلوا للشهرة من أوسع أبوابها 

ومن أغرب الأرقام القياسية في موسوعة جينيس 

كانت للأمريكي (ملفين بوث) صاحب أطول أظافر لرجل في العالم

واللي طول ضوافره 10 متر ، وبسببهم بقى مشهور 

هي عفانة صحيح ، وصحيح الراجل لا عارف 

ياكل ولا يشرب ولا يعمل أي حاجة إلا بمساعدة 

ولكنه بقى مشهور وحامل رقم قياسي 

تاني رقم قياسي ومن الأرقام القياسية الأغرب في العالم 

لواحدة ست إنجليزية إسمها (جيل دريك) 

واللي دخلت موسوعة جينيس بسبب صرختها 

لأن صوت صرخة جيل دريك قوتها 129 ديسيبل 

وده أقل 15 ديسيبل بس من صوت الطيارة 

ربنا يكون في عون جوزها وولادها 

زمانهم عايشين بقطن في ودانهم 

من أغرب الأرقام القياسية في العالم 

حصل عليها التركي (إيلكر يلماز) واللي عنده موهبة غريبة جداً

وإنه بيقدر يطلع لبن من عينيه 

طول عمرنا نسمع عن اللي بيبكي بدل الدموع دم 

ده بقى بيبكي حليب .. وإيلكر إتولد بعيب خلقي 

في الغدة الدمعية ، وعنده تجويف بين الجفون والأنف 

وده خلاه يقدر يدخل أي سائل في مناخيره 

ويخرجه من عينيه ، لكنه إختار لقب دموع الحليب

علشان يكون بيه صاحب رقم قياسي في موسوعة جينيس 

من تركيا تاني لصاحب الرقم القياسي 

لأكبر أنف في العالم ، التركي (محمد أوزيورك) 

واللي طول مناخيره 9 سم تقريبًا 

والغريبة إنه أوزيورك كان بيعاني طول طفولته 

وشبابه من شكل مناخيره ، وبيتعرض للتنمر 

ولكن بعد سنين ، إكتشف إن سبب التنمر عليه ده 

خلاه من مشاهير موسوعة جينيس كصاحب أكبر أنف 

وزي ما الناس كانت بتتنمر على مناخير أوزيورك 

برضه كانوا بيتنمروا على بق (سامنتا رامسديل) 

الأمريكية صاحبة أكبر فم لسيدة في العالم 

بقطر 6 سم ونص .. واللي عانت من التنمر عليها طوال شبابها 

ولكن بعد ما دخلت موسوعة جينيس بقت بلوجر قد الدنيا 

وعندها أكاونت تيك توك بيتابعه مليون و 700 ألف متابع 

ودخلها من الفيديو الواحد 11 ألف جنيه إسترليني 

إنت كمان مش أقل منهم في حاجة 

دور في نفسك وحواليك على أي حاجة تافهة 

تقدر تعملها يمكن تلاقي نفسك بكره 

من مشاهير موسوعة جينيس ..