رحلة للثقب الأسود .. رحلة بلا عودة !

من 200 سنة تقريباً بدأنا نسمع كلمة الثقب الأسود

وبدأت تتردد في الأوساط العلمية كتير 

واللي عرفناه عن الثقب ده إنه مكان 

بتختلف فيه كل قوانين الفيزيا اللي نعرفها 

وإن أقرب ثقب لينا الحمد لله على مسافة 

3000 سنة ضوئية

لكن إزاي بيتكون الثقب الأسود ؟ 

ولو دخلت الثقب الأسود هيحصلك إيه ؟

والله صعب أأكدلك بالظبط هيحصلك إيه في الثقب الأسود 

لأن دي خناقة كبيرة بين العلماء 

بس علشان نجاوب على الأسئلة دي 

خلينا الأول نعرف هو إيه الثقب الأسود ده 

الثقب الأسود ببساطة نجم زي الشمس بتاعتنا كده بس ميت 

الله يرحمه ، وهي النجوم بتموت ؟

طبعاً بتموت ، كل حاجة في الكون ليها عمر افتراضي 

وما دايم إلا وجه الله .. ونعم بالله يا عم 

بس النجم ده بيموت إزاي ؟ 

خليني الأول أقولك النجم بيتولد إزاي ..

نجم زي الشمس بتاعتنا دي بتتولد من خلال 

تجمع كمية غاز هيدروجين مهولة في الفضاء 

وبسبب جاذبية ذرات الهيدروجين دي 

بتفضل تسحب بعضها لبعض بقوة كبيرة

لحد ما يكونوا سحابة غازية .. وبرضه ما بيبطلوش جذب 

لحد ما بتنكمش الذرات دي وتقرب قوي 

وساعتها بقى يحصل بينهم احتكاكات وحوارات ونوش 

لعند ما يندمجوا مع بعض ويكونوا غاز الهيليوم

وأهوه زيتنا في دقيقنا .. 

ساعتها بس بيتولد النجم .. وبينور من خلال 

إن ذرات الهيدروجين المشتعلة دي طول الوقت 

بتحاول تهرب بعيد عنه إلا إن جاذبية النجم بتشدها تاني 

فبيخرج النور اللي مالي الدنيا ده 

وهو ده بالظبط اللي بيحصل في القنابل الهيدروجينية

وده معناه إن الشمس دي عبارة عن إنفجار نووي ما بيخلصش 

عرفت بقى إنت ليه حران ؟ فوقك انفجار نووي على مدار الساعة

طب كده احنا عرفنا هو النجم بيتولد ازاي ..

طب ازاي النجم ده بيموت وبيتحول لثقب أسود 

كل نجم بيكون عنده مخزون من الطاقة والوقود 

اللي هو الهيدروجين زي ما قولنا.. 

طول ما الهيدروجين ده موجود بيحصل انفجارات 

وبتزيد حرارته وبيتمدد وتكبر جزيئاته 

وده معناه إنه بيكون عنده جاذبية ضخمة .. 

فجاذبية الغاز نفسه تفضل تحارب في جاذبية النجم 

الغاز يحاول يهرب والنجم يرجعه ليه تاني وهكذا

في حالة من التوازن الدقيق جدًا بتخلي النجم عايش منور .. 

ده نورك والله  

لحد ما يخلص الوقود ده .. أوبس .. 

ساعتها بس الجاذبية تضغط على النجم وتخليه ينكمش 

لحد ما يوصل لأصغر حاجة ممكنة 

يوصل من نجم كبير منور لمكان صغير مظلم 

يقدر يسحب جواه أي حاجة واسرع حاجة في الكون .. الضوء نفسه 

أهوه الجسم الصغير المظلم ده بقى إسمه الثقب الاسود 

أهلاً وسهلاً يا سيدي .. 

طب ده معناه إنه ده وارد يحصل للشمس بتاعتنا ؟

لازم تعرف إن الشمس عندها ما يكفيها من الوقود 

لمدة 5000 مليون سنة ، ولكن مش هتعيش للأبد يعني 

بس تلحق تخطب وتتجوز وتعيشلك يومين قبل ما تصحى تلاقي نفسك في ثقب اسود

طب كده احنا عندنا ثقب أسود جميل

بيبلع أي حاجة تقرب منه وعنده القدرة على إبادة كواكب 

لو فقدت جاذبيتها أو حصل خلل ما في حساباتها

طب لو افترضنا ده حصل هيكون مصيرك ايه 

يعني خلينا نفترض انك قمت من النوم لقيت نفسك في ثقب دودي هيحصلك ايه ؟

ساعتها هيكون مصيرك الموت أكيد .. بس ازاي بقى 

دي اللي مختلف فيها العلماء .. 

في 1915 ظهرت النظرية النسبية على يد ألبرت أينشتاين

واللي فسرت كل حاجة تقريباً من أول قعدتك قدام الفيديو ده 

لحد ما تحترق النجوم وتفنى العوالم .. 

وقال أينشتاين في الجزئية دي تحديدًا إن بعد موت النجم 

بيفتح بينه وبين النجم اللي بعده مسار أي حاجة تقرب للمسار ده 

بتقع جواه بسبب جاذبيته الضخمة فلو حضرتك قربت للثقب هيبلعك مفيش كلام 

وفي طريقك جوه الثقب هتقع بشكل طبيعي لحد ما توصل لنقطة أو حلقة 

إسمها event horizon أو أفق الحدث 

وساعتها هتعدي جوه الثقب وتموت جواه 

لكن بقى في منتصف العشرينات وبعد ظهور ما يسمى بميكانيكا الكم 

ودي اللس بتفسر العلاقة بين الذرات والجزيئات اللي بيكونوا أي حاجة في الكون 

قالوا إنك مجرد ما تقرب لحلقة افق الحدث بتتحرق براها 

وبتفضل جزيئاتك تطفو في المكان ده وما بتدخلش الثقب الأسود 

يعني احنا كده عندنا نظريتين عكس بعض 

أينشتاين والنسبية بيقولوا هتعدي افق الحدث بلا رجعة هتكمل جوه الثقب وتموت جواه 

وميكانيكا الكم بتقول هتتحرق على الافق ده ومش هتدخل 

ولحد دلوقت الخلاف ده ما اتحلش غير نظريًا بس 

عملياً محدش جربها ورجع قالنا الحقيقة 

إلا إن بروفيسور الفيزياء والرياضيات في جامعة كامبريدج

ستيفن هوكينج عنده تفسير مختلف شوية 

قال إنك مجرد ما تدخل الثقب الأسود

هتموت بعملية فيزيائية سماها spaghettification

سباجيتي فيكيشن .. يعني هتتمدد زي المكرونة الاسباجيتي 

بسبب إن نصك التحتاني هيكون قريب أكتر للثقب 

فمعدل الجاذبية عليه أعلى من نصك الفوقاني 

فهتتمط زي الاسباجيتي كده وتفضل تتقسم 

نصين .. 4 .. 8 .. 16 .. 32 وهكذا 

بس ما علينا هتموت إزاي .. لكن لازم تعرف إن 

الثقوب السوداء بتتسمى مقبرة النجوم 

وتقدر تاكل عوالم كاملة 

علشان كده لما تلاقي العالم مجتمع علشان المناخ

في مؤتمرات وبيتكلموا عن الانحباس الحراري 

وبيحاولوا يحاربوه بأي طريقة 

إعرف إن الموضوع ده مهم 

لأن كتر التفاعلات داخل الشمس هتؤدي 

لموتها أسرع من المتوقع 

وموت الشمس معناه انهيار الكون اللي انا وانت نعرفه 

فمش بعيد تصحى من النوم تلاقي نفسك جوه الثقب الأسود 

وساعتها يبقى ربنا يعوض عليك وعلينا كلنا