إنتقام أولجا .. أشرس إنتقام في التاريخ

 

(إنتقام أولجا)

/ أشرس إنتقام في التاريخ /

لو شايفه ان سلفتك سماوية و يتخاف منها ؟!

تعالي اسمعك حكايه لواحدة ست 

صاحبة أشرس انتقام لست في التاريخ إنتقام أولجا 

سنة 945 ميلاديًا ، تم اغتيال الأمير (ايجور روريك)

 أمير كييف على يد قبيلة تعيش بشرق أوروبا ،

 تسمى قبيلة الدريفليان

واللي قتلوا الامير بشكل بشع ووحشي

اللي ربطوه بين شجرتين ، وقربوا الشجرتين لبعض 

  وفلتوا الشجرتين .. وده أدى لانشطار جسم الأمير نصين

بعد اغتيال الأمير ايجور روريك

 تولت زوجته الأميرة أولجا الحكم 

في الوقت ده شاف الأمير (مال) أمير قبائل الدريفليان

 أنه أولى بحكم كييف .. يا بجاحتك يا اخي ..

 فأرسل للاميره اولجا أفضل رجاله

 علشان يقنعوها بالزواج منه 

وبكده يكون خد الجمل بما حمل ،

 قتل الأمير واتجوز مراته وجلس على عرش كييف

لكن رد فعل الأميرة اولجا كان عنيف جدا

 وغضبها و حرقت قلبها على جوزها اللي انقسم نصين بالطول 

خلاها دفنت رسل قبيلة الدريفليان احياء 

بعد ما دفنت أولجا رسل الدريفليان أحياء

 بعتت رسول من عندها للأمير مال زعيم القبيلة

 علشان يبلغه أنها موافقة على جوازها منه

 وادعت أنها احتجزت عندها رجاله كضيوف

 علشان يتجولوا في الشوارع بين شعبها تمهيدا لخبر الجواز

 وانها عايزة المزيد من رجال القبيلة وافضلهم

 علشان يحتكوا بشعب كييف 

ويعرفوا عادات وتقاليد بعض

وبالفعل الأمير مال ما كدبش خبر

 وأرسل عدد كبير من افضل رجاله 

 لمدينة كييف ولقلعة الملكة مباشرةً 

واللي الملكة رحبت بيهم جداً واكرمتهم

 وجهزت لهم وليمة غدا كبيرة تليق بيهم

 ولسه بيقولوا بسم الله لقوا نفسهم محبوسين في القلعة

 وبيتحرقوا احياء

وبعد ما اولجا ولعت في أفضل رجال الدريفليان

قررت إقامة عزاء مهيب لجوزها 

وبعتت رسول ثاني للامير مال زعيم القبيلة

 وادعت للمرة التانية إن العزاء ده مجرد اجراء روتيني

 علشان ما تظهرش بشكل خائنة قدام شعبها

 وأنه ورجالته و كل قادة جيوشه المهمين عنده

 لازم يحضروا العذاء

وبالفعل عدد كبير جداً من قبيلة الدريفيليان

 وصل ل 5000 فرد وصلوا إلى كييف

 شايلين هدايا كتير جداً للاميره اولجا ولشعبها

 استقبلتهم الأميرة بحفاوة كبيرة

 وبعد ما يدوب اخدوا نفسهم من الطريق

 وقبل ما تبدأ اجراءات العزاء

 يكتشفوا انهم معمول لهم كمين

 رتبته اولجا مع جنودها اللي دبحوا ال 5000 فرد بكل سهولة

بالشكل ده اولجا خلصت على صفوه جيش الدريفليان

وكانت الخطوة اللي بعد كده انها تحضر جيش جرار

 وتهاجم القبيلة علشان تقضي على بقيتهم 

وبالفعل خلال أيام بسيطة

 كانت بتحاصر هي وجيشها قبيلة الدريفليان

 وبعد أيام بسيطة من الحصار 

قدرت تقضي أولجا على جيش القبيلة بالكامل

وبعد ما سيطرت على القبيلة سيطرة تامة

 توسل أهل القبيلة الاميره انها تتركهم احياء 

وخصوصا انهم ما لهمش يد في اللي حصل ده

ولو عايزة مقابل لحياتهم فممكن تاخد منهم ضريبة

 من انتاجهم للعسل اللي كانوا مشهورين بيه في الوقت ده

 وبالفعل قلب أولجا رق ووافقت على مطلبهم 

ولكن مقابل شرط غريب .. 

هتعفوا عنهم مقابل ثلاثة من طيور الحمام

 من كل منزل في القبيلة ، علشان يدوم ذكرها في القبيله

 وكل الناس تفتكر هي عملت ايه في حكامهم

 كانتقام لوفاة جوزها

ماصدقوا أهل الدريفليان ووافقوا على الشرط ده

 وقاموا بتسليم الحمام للجنود زي ما الاميره طلبت 

وبعد ما استلم جنود أولجا الحمام 

ربطوا في رجلين كل حمامة

قطعة قماش متغطية بمادة الكبريت

 وولعوا في كل القماش اللي مربوط في الحمام

 وسابوا الحمام علشان يرجع لاعشاشه في بيوت المزارعين

 في القبيلة علشان تحرقها بالكامل ..

 وبعد ما القبيله بقت مجرد شويه تراب

 اللي قدر ينفد بجلده من الحرق اتقبض عليه واتقتل 

أو اتاخد اسير .. بالشكل ده اولجا انتقمت لموت جوزها

 بقتل وابادة قبيلة كاملة وبكده تقدر ترجع كييف 

وتاخد عزاء جوزها الله يرحمه

بعد ما سمعتوا انتقام اولجا تفتكروا الست المصرية

 لما تحب ممكن تعمل ايه علشان الراجل اللي بتحبه ؟

 وبكده نكون خلصنا حكايتنا النهارده

إنتقام أولجا