" يوم الشاي العالمي "

 

" يوم الشاي العالمي "

تعمل إيه لو قالولك إن الشاي خلص من العالم ؟ 

ومعدتش هتسمع صوت تقليبة المعلقة في الكوباية اللي ترد الروح دي ؟

شايف ايدك بترتعش وانت بتقلب كوباية الشاي وأكنها آخر كوباية في حياتك 

لأن خبر زي ده مش بس هيقفلك اليوم ، لأ 

ده كفيل إنه ينهي حياتك المهنية بالكامل 

أحب أقولك ما تخافش .. الشاي ما انتهاش 

بس حبينا نخضك علشان تعرف قيمة كوباية الشاي اللي في ايدك

وتشكر النعمة اللي انت فيها 

يلا كمل كوبايتك وصحصح واستعد 

علشان نحتفل مع بعض بيوم الشاي العالمي ٢١ / ٥ 

واللي الحقيقة قليل عليه يوم واحد للاحتفال بوجوده في حياتنا 

طبعًا دارت في دماغك أفكار كتير 

وتخيلت حياتك هتبقى إزاي من غير كوباية الشاي دي 

واللي وجودها مرتبط بمهن كتير ممكن تنتهي 

وإختفاؤها ممكن يغير شكل العالم .. من غير مبالغة

انت عارف يعني ايه صنايعية من غير شاي 

يعني الشقة اللي كانت بتتسلم في شهر 

هتتسلم في سنة .. يعني القهاوي هتفضى 

وهتنتهي مصطلحات اتعودنا عليها زي ، مش هنحبس بكوباية شاي ؟!

يعني أغاني زي أشرب شاي بعد ما كانت بترقصك 

هتتحول لذكرى حزينة .. 

و الشاي إسم صيني بيطلقوه على شجرة الكاميليا الصينية 

اللي بينتجوا منها الشاي واللي بتكون أوراقها خضرا 

بس بعد ما يعرضوها لهوا رطب ومشبع بالاكسجين بيتحول لونها للبني 

أو للأسود وده اللي بيسمى بالأكسدة ..

والشاي يعتبر أكتر مشروب استهلاك بعد الماء في العالم ، 

وأهم الدول المنتجة له الهند والصين وسيلان واليابان .. 

وأهم المستوردين له بريطانيا ، أمريكا ، استراليا وروسيا وكندا 

وطبعاً مصر اللي بتحتل المركز السابع عالميًا في استيراد الشاي

والمركز الأول بين كل الدول العربية .. 

لا .. ده إحنا جامدين قوي بقى 

وعلى حسب التقارير فالمصريين استهلكوا خلال آخر ٩ شهور 

من سنة ٢٠٢٢ بـ ٢٣٧ مليون دولار .. 

يعني بمعدل كيلو شاي للفرد الواحد تقريبًا

والشاي دخل مصر عن طريق الإنجليز تحديدًا في سنة ١٩١١ 

وانتشر بين الفلاحين والعمال بشكل كبير 

لدرجة إن الصحف نشرت دعوات لمنع استيراد الشاي 

بحجة إنه بيضر بصحة ونشاط العمال والمزارعين 

تحديدًا في أكتوبر ١٩٣٢ ، ولكن كل الدعوات دي فشلت تمامًا 

وفضل الشاي أكتر مشروب بيشربه المصريين 

وأول شركة مصرية تقوم بتعبئة وبيع الشاي 

كانت شركة الشيخ الشريب واللي إعلانهم 

كان موجه للستات تحديدًا لدفعهم لشرب الشاي 

وكان عنوان الإعلان إن بما إن الست أكثر قدرة من الراجل 

على تمييز الطعم .. فاختارت شاي الشيخ الشريب 

ده انت فيمينست صحيح ..

وللشاي فوايد كتير جدًا ، منها تعزيز صحة القلب 

تخفيض نسبة الكوليسترول في الدم

وتقليل أعراض السكتة الدماغية

ده غير انه غني بمضادات الأكسدة وبيحسن صحة القناة الهضمية 

وبيساعد على التركيز .. وكمان بيخفض مستويات السكر في الدم 

وبيقلل الإصابة بالسرطان .. ده ما طلعش للصحصحة بس 

المهم إننا ما نعرفش نكمل يومنا من غير خربوش الشاي الجميل

وسواء انت بتشربه خفيف ولا تقيل 

فتلة ولا سايب .. كوباية كبيرة ولا خمسينة 

بأي حال من الأحوال ما تعرفش تستغنى عنه 

علشان كده حبينا نحتفل بيه بطريقتنا الخاصة .. 

ونقوله كل سنة وانت طيب