" عمر خيرت .. فيها حاجة حلوة "

" عمر خيرت .. فيها حاجة حلوة "

لو مش متاكد إن فيها حاجة حلوة

وشايف إنك مش مستفيد حاجة من حضارة ٧٠٠٠ سنة 

وكل اللي على لسانك إن إحنا ولاد النهارده 

أحب أقولك إنه عايش بينا النهارده في مصر 

أحلى ما فيها .. عمر خيرت 

الدليل الأجمل والأكبر على عظمة الحضارة دي

عمر خيرت .. إسم مجرد ما تسمعه ترن في ودنك ألحان كتير حلوة

وتمس قلبك ذكريات عاشت وهتعيش  لسنين وسنين

من أفلام ومسلسلات يمكن يكون سبب من أسباب شهرتها مزيكتها 

اللي اتعملت من القلب ودخلت كل قلب سمعها 

مين ينسى موسيقى خلي بالك من عقلك ؟!

ولا ليلة القبض على فاطمة ؟! 

مين يصدق إن الجيل اللي نوع موسيقاه المفضلة الراب

 والتراب والأندر جرواند ، يتفق مع الجيل اللي مزيكته المفضلة

أم كلثوم وعبد الوهاب ، وهما الاتنين يقعدوا جنب بعض في حفلة واحدة لعمر خيرت

عمر خيرت الموسيقي المصري اللي غير فكرة المصريين والعرب 

عن الموسيقى التصويرية واللي بقت جزأ أساسي من العمل 

واللي بتعبر عن كلام ما اتقالش بس حسيناه 

مع كل ضربة له على البيانو .. 

الموسيقى التصويرية اللي قدمها عمر خيرت 

واللي بسببه و بسببها عشقنا أعمال كتير

وبقت موسيقاها بتشتغل في كل بيت ولكل جيل 

بس تفتكروا إيه السبب في حالة التوحد دي ؟

ايه السبب اللي خلى كل الأجيال تتفق عليه ؟

ايه السبب اللي يخليك تحدد ميعاد حفلته 

كواحد من أهم مواعيد حياتك ومن أولى أولوياتك ؟

لأ وما تكتفيش بحفلة واحدة أبدًا .. إنت بتوصل معاه 

ومع ألحانه لحالة من الإدمان .. كل ما تسمع إن فيه حفلة 

لازم تكون واحد من الحضور .. 

هل السبب ورا كل ده المزيكا بس ؟ 

ولا السبب إن عمر خيرت بيعبر عن مصر 

وبيفكرنا بكل حلو فيها .. ولا السبب إنه فنان 

فريد من نوعه ، مميز وأيقونة في كل حاجة 

غير المزيكا اللي مش محتاجة كلام .. 

سلوكه الراقي وتحيته المميزة لجمهوره 

ولا احترامه البالغ لكل أعضاء فريقه وتقديره ليهم 

ولا إهتمامه بتقديم كوادر جديدة في كل حفلة من حفلاته 

حفلاته اللي بقت ميعاد مقدس بيتقفل بسببها شوارع 

إن كان في مصر .. ولا السعودية ولا الإمارات 

وغيرها كتير من الدول اللي كان ليها الشرف بإستضافته

ممكن يكون سبب تأثيره الدائم ده أنه مميز في كل حاجة 

كموسيقي وفنان وكإنسان راقي بيحترم فنه وجمهوره 

عمر خيرت بدأ حياته العملية في الستينات كعازف درامز في فرقة روك

مقدم البرنامج (مسترسلًا)

ليي بُتي شا (les petits chats) 

واللي كان من أعضائها الفنان عزت أبو عوف

بعد ما درس التأليف الموسيقي في كلية ترينتي في لندن  

وبعدها دخل عمر خيرت مجال التأليف الموسيقي والموسيقى التصويرية 

بأعمال عاشت معانا لسنين كتير وأولهم كانت الموسيقى التصويرية

لفيلم ليلة القبض على فاطمة سنة ٨٣ 

اللحن اللي نجح نجاح كبير وبعدها توالت أعماله 

ومن أهمها كان قضية عم أحمد والبخيل وأنا .. ضمير أبلة حكمت وغوايش 

ده غير إنه تعاون مع أكبر مطربي الوطن العربي 

زي محمد منير .. علي الحجار .. أنغام .. وهاني شاكر 

يوم ١٦ يونيو اللي فات اتفاجئنا بخبر فرحنا كلنا 

وهو حصول الموسيقار عمر خيرت على جائزة 

الشيخ زايد للكتاب في دورتها ال ١٧ 

كشخصية العام تقديرًا لجهوده المتميزة طوال مسيرته 

ودي جايزة تُمنح كل سنة لصناع الثقافة والمفكرين والمبدعين ،

 في النهاية حابين نقول إن قد إيه التكريم مهم للفنان 

علشان يقدر يكمل ويبدع .. ووجود فنان مصري 

زي عمر خيرت في حياتنا لا يقدر بأي تكريم