" الذكاء الاصطناعي وفردة الشراب المفقودة "
كام مرة اتخانقت انت والمدام ووقفتوا ع الطلاق
بسبب فردة الشراب اللي مش لاقيها ؟
طب كام مرة بعد ما جهزت الفشار وهديت النور
وقعدت علشان تتفرج على فيلم مزاجك اتعكر وليلتك باظت
بسبب الريموت اللي ضاع في ظروف غامضة ؟
طب فاكر كام مرة اتأخرت على شغلك بسبب مفتاح ولا بصمة اسانسير اختفت ؟
أحب أبشرك .. كل مشاكلك من النوع ده اتحلت
ومفيش حاجة هتضيع منك بعد كده تاني أبدًا
بعد ما طور عدد من الباحثين في السويد تقنية جديدة
قايمة على الذكاء الاصطناعي وقادرة على برمجة أي روبوت
على تحديد أماكن الحاجات الضايعة
مفاتيح بقى أيوه اللي في ايدك دي بس بتدور عليها
نضارتك اللي متسوح من غيرها م الصبح وانت لابسها أصلاً
أي حاجة ممكن تعطلك أو تعكر مزاجك بسبب انها ضاعت
الروبوت هيلاقيها ويشاور لك عليها وفوقها بوسة كمان
في الأساس الباحثين طوروا التقنية دي
علشان تساعد الناس اللي عندهم مشاكل في الذاكرة أو بيعانوا من الخَرَف
تحديدًا كبار السن ، وبما اننا صغيرين وكبار
على مدار اليوم بننسى كل حاجة تقريباً
ويدوب فاكرين اسمنا بس علشان مكتوب في البطاقة
فده هيكون حل عملي للنسيان ده كله اللي مالي حياتنا
هو صحيح مش هيعالجنا .. بس هيخلينا ننسى واحنا مطمنين
والباحثين استخدموا خوارزمية لاكتشاف الحاجات اللي بتضيع
عن طريق تخزين أماكنها بكاميرا الروبوت اللي المفروض
في المستقبل هيكون عايش معاك في البيت وملازمك
يعني بعد كده لما تدخل البيت تعبان
وترمي فردة شراب في باسكت الغسيل
والفردة التانية ع الدائري ، الروبوت بتاعك هيصور ده
وتاني يوم بدل ما تضيع وقت في رحلة البحث عن فردة الشراب الضايعة
كل اللي عليك إنك هتروحله تستسمحه يوريك
انت رميت فردة الشراب فين .. وهو هيقولك على طول
وابقى قابلني لو لاقيتها ..
وطبعاً كل ده هيتم بدون لا عتاب ولا تقطيم ولا حتى تريقة
يعني مش هتلاقيه بيقولك ما هو لو انت بتحط الحاجة في مكانها لما تحتاجها هتلاقيها
ولا هتلاقيه بيقولك أقولك فين وما تزعلش .. ولا الكلام ده خالص
هو هيقولك هي فين من سكات ومن غير صداع
طبعاً الكلام ده هيصحل في المستقبل القريب
يعني بالنسبة لنا احنا كناس بننسى طول الوقت
هيكون في الوقت ده عندنا زهايمر
بس محلولة يعني بإذن الله
طبعاً لازم نعرف إن مهما يخترعوا في روبوتات
ويطوروا في تقنيات ويحلولنا في مشاكل
مفيش حاجة في الدنيا هتغنينا عن الأم
اللي لو سألتها على شغفك اللي ضاع في زحمة الأيام
هتقولك ولو جيت طلعتهولك
والحقيقة إن تطور الذكاء الاصطناعي واستخداماته في حياتنا
بدأت تاخد شكل جاد وشكلنا كده داخلين على عصر
ما يعلم بيه إلا ربنا .. عصر الإنسان مش هيبقى فايق فيه
علشان يدور على فردة شرابه
ويدوب قادر يدور على نفسه بالعافية …
المشاركات
ليست هناك تعليقات:
إرسال تعليق
أتشرف بتعليقك ونقدك دائمًا ..