إنفصام الشخصية .. الحالة الأغرب على الإطلاق لمريض يحتله 24 شخصية ..

النفس البشرية مليانة بالألغاز ، والمشاكل اللي لعند دلوقت 

وبعد التقدم الكبير للعلم والطب محدش قدر يحلها 

أو يعالجها بشكل جذري .. 

وكل يوم والتاني بتظهر حاجات ومشاكل مختلفة 

ما تخطرش على بال حد .. وما خفي كان أعظم 

ومع تطور الطب النفسي في العالم كله 

إلا إنه سيظل المرض النفسي متاهة كبيرة جدًا

وبير غويط ملوش قرار .. 

ومن أغرب حالات المرض النفسي .. ما يسمى 

بالإنفصام .. وده هيكون موضوع حلقتنا النهارده 

وحكاية النهارده عن أغرب حالة إنفصام في الشخصية 

مرت على البشرية كلها .. 

الإنفصام في الشخصية .. في حكاية النهارده 

فيلمين من أنجح وأغرب الأفلام في العالم .. اتكلموا عن حالة 

هي الأغرب من حالات إنفصام الشخصية 

حصلت وعدت على الطب النفسي .. 

فيلم split و the glass

واللي بيحكوا قصة حقيقية لشاب إسمه 

بيلي ميليجان .. واللي كان بيعاني من أغرب حالات

انفصام الشخصية اللي تم رصدها حول العالم

طب يعني إيه الأول إنفصام في الشخصية

انفصام الشخصية على حسب ما عرفته 

منظمة الصحة العالمية.. إنه حالة من 

الاضطراب العقلي المزمن واللي بيؤثر في طريقة تفكير الشخص

 وشعوره وسلوكه واللي بيخليه يسمع أصوات غير موجودة، 

أو قد يعتقد أن فيه أشخاص آخرين بيحاولوا إيذاءه ، 

وغالبًا ما يصفه الأطباء بأنه نوع من الذهان ، 

وده معناه أن الشخص قد لا يكون دائمًا

 قادر على تمييز أفكاره الخاصة 

عن الأفكار التي تحدث في الحقيقة 

يعني ببساطة كده الانفصام هو اضطراب بيؤدي 

إن المصاب يكون شايف وسامع ناس وأحداث

مش موجودة إلا في خياله هو وبس ..

 وبيكون أغلب المصابين بيه

عايشين جواهم شخصيتين أو أكتر .. 

إلا بطل حكايتنا النهارده ، واللي تم رصد عدد كبير من الشخصيات 

اللي عايشة جواه .. كل شخصية وليها صوت وطريقة وأحداث بتعيشها 

مختلفة تمامًا عن شخصيته الحقيقية

في السبعينات كان فيه شاب إسمه بيلي ميليجان 

 و ده قضيتة كانت من اشهر القضايا في السبعينات كلها

الراجل ده كان بيمتلك عدة تهم

منها الإعتداء و السطو وحاجات تانية كتير من هذا القبيل

هتسبب انها تسجنه مدة لا تقل عن ٢٠ سنة وأكتر 

بس الغريب في الموضوع انه لما تم عرضه للقاضي سنة 1978

خرج بريئ من كل التهم اللي اتوجهتلة

علي الرغم من وجود ادلة واضحة تدينة 

وما أخدش يوم واحد سجن .. طب ازاي ده حصل ؟

هل بعد التهم دي هل هيكون في مبرر ممكن يقتنع بيه القاضي و يبرئه ؟

تصدق بقي طلع في سبب اياً كان بقي مقنع او لأ

بس السبب ده غريب ومدهش فعلاً 

كان من دفاع المحامية عن بيلي 

انه مش هو المسؤول عن الجرائم اللي ارتكبها دي 

 الله ؟ امال مين اللي عمل المصايب دي كلها ؟

قالت المحامية إن اللي عمل كده هي مجرد شخصيات

 تانية جوه عقل "بيلي" شخصيات هو بس اللي بيشوفها

وهو بس اللي بيسمعها ومن ضمنهم مجرمين 

يا يقدر يسيطر عليهم ، يا يقدروا هما يسيطروا عليه 

ويكون تحت أمرهم .. طبعاً الكلام ده في ظاهره

مجرد حجة لتخفيف الحكم عن بيلي أو لتبرأته مش أكتر 

لكن الواقع كان بيقول غير كده ..

ورأي الطب النفسي ، والفحوصات اللي اتعملت عليه

كانت بتأيد كلام محامية الدفاع الخاصة بيه 

و ده اللي أكده الدكتور النفسي اللي بيعالج بيلي

واللي عينته المحكمة لفحصه وكتب ده في تقريره الطبي عن حالة المتهم

و بكده كان "بيلي" هو أول حالة تم الدفاع عنها

 لكونه بيعاني من مرض إنفصام الشخصية 

أو ما يسمى بـ "Dissociative Identity Disorder"

لحد هنا وعادي .. مريض نفسي عنده انفصام في الشخصية

وعمل كذا جريمة وهو تحت تأثير المرض 

لكن الأغرب من كل ده .. كان عدد الشخصيات 

عدد الشخصيات اللي كانت جوه بيلي .. عدد حقق رقم قياسي 

وكان من الأول من نوعه في تاريخ الطب النفسي

في التشخيص اتضح ان "بيلي" بيمتلك اكتر من 23 شخصية 

بيظهروا ويختفوا في اوقات معينه

و كلهم مختلفين عن بعض تمامًا من حيث...

(الطباع واللهجة والتفكير وأسلوب المعيشة والمهنة والعمر)

 وكان من بينهم رجالة وستات وأطفال 

وكل واحد فيهم عنده اسم مختلف وحياة خاصة

 و مختلفة اختلاف تام عن التاني تخيل ٢٣ شخصية .. ده مجتمع كامل 

كل شخصية فيهم عندها مجتمعها الخاص 

اللي هو افتراضي برضه .. مش موجود الا في دماغ بيلي لوحده

الأغرب من كده وأغرب إن بيلي نفسه ما كانش يعرف بوجود كل الشخصيات دي 

أو يعني نقدر نقول منها اللي كان بيلي عارف بوجوده

 وبيتشارك معاهم نفس الذكريات و الأحداث ... 

ومنهم اللي ما كانش يعرف انهم موجودين اساسا 

و هما دول بقي اللي ارتكبوا الافعال اللي اتمسك بسببها

والشخصيات اللي كانت عايشة جوه بيلي 

زي ما قولنا كان ليها حكاياتها الخاصة 

ومجتمعها الخاص وعلاقاتها الخاصة

يعني على سبيل المثال من الشخصيات دي كانت

شخصية طفلة اسمها كريستين , وكريستوفر اخو كريستن 

و طفل أصم اسمه شون , وبنت مثلية اسمها ادالانا .. 

وحاجات كتير مختلفة .. كل شخصية بيكون ليها 

مشاكلها الخاصة .. وحواراتها وذكرياتها وطريقتها

ده الواحد مش مستحمل نفسه .. ما بالك ده 

عايش ومعاه او ان صح القول جواه ٢٣ شخصية 

وعلى فكرة رقم ٢٣ شخصية ده اللي توصله الفحص الطبي لبيلي 

وإنه في الحقيقة ممكن يكون أكبر من كده بكتير

بيلي فضل يتعالج ويخضع لبرامج تأهيلية نفسية

 في مستشفيات ومصحات لأكتر من 10 سنين

 لحد ما خرج من العلاج النفسي في سنة 1988 

يعني بعد 10 سنين من القبض عليه وبعدها حذفوا اسم "بيلي" من المحاكم 

واعتبروه من بعدها مواطن عادي.. وبعدها اختفى لفترة طويلة

اخر مكان رصدوه فيه كان في كاليفورنيا 1996 

وإختفي بعدها لحد ما تلقوا خبر وفاته في 2014 بالكانسر

قصة بيلي شغلت الرأي العام لفترة طويلة 

وكان لازم نعمل عنها حلقة.. لانها من أغرب حالات المرض النفسي

اللي مرت على التاريخ .. 

وبكده تكون انتهت حكايتنا النهارده

ياريت تقولنا في الكومنتات لو عندك معلومة مختلفة

وما تنساش تعملنا لايك وتشترك في المدونة

علشان يوصلك حكاياتنا اللي ما بتخلصش