الأمثال الشعبية .. تاريخ المثل الشعبي

 

 الأمثال الشعبية .. تاريخ المثل الشعبي

(إذا جُعل الكلام مثلاً .. كان أوضح للمنطق .. آنق للسمع .. وأوسع لشعوب الحديث) 

                                                                 إبن المقفع 

                                                            724 م : 759 م

تفتكر احنا الشعب الوحيد اللي عنده كمية الأمثال الشعبية دي ؟

أكيد لأ .. كل شعب من شعوب الأرض عنده أمثاله الشعبية 

اللي تناسب ثقافته وبيئته وظروفه .. 

علشان كده هتلاقي إن كل شعب من شعوب العالم أمثاله تشبهه

يعني الأمثال اللي بيستخدمها في كلامه على مدار يومه 

شبه شخصيته بشكل كبير 

فالشعوب مثلاً اللي معروفة بالعمل والجدية

هتلاقي أمثالها عن العمل والجماعية والاجتهاد 

زي الشعب الألماني مثلاً 

على العكس الشعوب اللي حياتها مليانة إجتماعيات زي الشعوب العربية 

هتلاقي أمثالها بتتكلم عن تنظيم العلاقات بين الناس وهكذا 

النهارده في حكايات .. هنعرفكوا يعني إيه مثل شعبي 

جه منين ؟ وأصله إيه ؟ وإيه هي أغرب الأمثال الشعبية

كلمة مثل جاية من التسوية والمماثلة والحذو ..

 فالمقصود بالمثل إنه قول نقدر إننا نستخدمه في مواضع مشابهة على مر العصور .

والأمثال من الحاجات اللي بتعكس ثقافة الشعوب ، وعاداتها وتقاليدها .. 

زي ما سبق وقولنا ده 

الألمان مثلاً عندهم أمثال كتير عن العمل زي :

 " لا يمكن الخلط بين العمل والراحة "

 dienst ist dienst und schnaps ist schnaps> .

ودي حاجة شبه المثل المصري اللي بيقول : 

إتغدى وإتمدى .. وإتعشى وإتمشى … الله ؟ إمال هنشتغل إمتى يا جماعة . 

وفي الثقافة الصينية مثلاً هنلاقي أمثال كتير بتشجع على العمل وكيفية إدارته

 .. زي مثلا : " لا تعطني سمكة .. بل علمني كيفية الصيد " .. أو

 " إن كنت غير قادر على الإبتسام ، لا تفتح متجراً " .. 

والله المثل ده لو هنا كانت كل المحلات قفلت . 

وده بيوصلنا قد إيه الشعب الصيني بيحب الشغل . 

الأمثال من مئات السنين بتشكل ثقافة الشعوب ، 

وبتعبر عن تراثها . .. وده برضه بنشوفه في مصرنا الحبيبة . 

هنا في مصر في أمثال إستحالة تسمعها في أي مكان تاني في العالم .. 

زي مثلاً " إن بيت أبوك خرب .. خدلك منه قالب " … 

يا ساتر يارب ، يعني ما أساعدش مع الرجالة 

ونلم الطوب كده يمكن نبنيه تاني ؟ … لأ .. إلحق خدلك قالب .

أو مثلا زي " إن جالك الطوفان حط إبنك تحت رجليك "

 .. سادية رهيبة … طب أنا عشت واتعلمت واتجوزت وخلفت ،

 وجربت كل حاجة في الدنيا ،

 مش الأولى إني أشيل إبني على راسي يمكن ينجو من الطوفان ؟ 

.. لأ … حطه تحت رجليك .. 

مش بقولكوا أمثال إستحالة تسمعوها في أي حتة في العالم ..

 ولا حتى في جهنم .

أو مثلاً زي المثل اللي بيقول " إن جه بختي على حجر أختي ، أخطفه وأجري" 

إيه ؟ إزاي يعني ؟ … يعني لو أختين جاي لواحدة منهم عريس ،

 وعجبته التانية ، مفيش مشكلة إنها تتجوزه وتقهر أختها عادي ،

 مش أحسن ما يروح للغريبة ، أغلب الأمثال المصرية 

هتلاقيها مستمدة من الإجتماعيات .. المصاطب بمعنى أصح

الحقيقة إن إستخدامنا للأمثال كانت من الحاجات

 اللي فرقت معانا في حياتنا بشكل كبير

 وغيرت كتير في حكمنا على الأشياء بشكل صحيح .. 

زي مثلاً " اللي بيته من إزاز ما يحدفش الناس بالطوب"

 وده خلى كل بيوت المصريين من حجر وأسمنت

 زي ما إنتوا شايفين علشان ناخد راحتنا في حدف الطوب على بعض . 

أو مثلاً " إضرب المربوط يخاف السايب" … 

وده بيعلمنا إننا ما نقدمش أي تنازلات أبدًا مهما حصل

 لأن كل تنازل بيجر تنازل أكبر منه وهكذا ، 

بدليل إن الراجل كان مربوط وما سلمش من الضرب برضه . 

أو مثلاً " اللي يعرف أبويا يروح يقوله "  

ودي لما تبقى مش فارقة  معاك ، 

أو أبوك شخص مش معروف مثلاً للناس أو مسافر . 

الحقيقة إن مش كل أمثالنا الشعبية بالشكل ده ..

عندنا أمثال كتير بتشجع على العمل ، والإجتهاد ، والصبر …

 والحقيقة برضه .. إننا لو ركزنا هنلاقي إن أغلب الأمثال 

اللي احنا كمصريين بنستخدمها بتمتاز بالدفء والصبر 

لكن أغلبها والجانب الأكبر منها بيصب في علاقاتنا الإنسانية

واللي بيدل إن المصريين في تكاتف ودايمًا عايشين لبعض وببعض

إنت بقى .. تقدر تقولي في الكومنتات إيه أغرب مثل سمعته في حياتك

وكان بمناسبة إيه ..؟ 

وبكده تنتهي حكاية النهارده