" أغرب قوانين رعاية الحيوان في العالم "
لما تشوف واحد في الشارع ساحب كلب وراه
ممكن تقول عليه ده دماغه تعبانة والفراغ قاتله
لكن لما تقربله ويبقى صاحبك .. مش الكلب
لا اللي ساحبه .. هتعرف قد ايه الكلاب والحيوانات الأليفة
نفسيتها بتتعب من قاعدة البيت وانها ما اتخلقتش للحبسة
لا سلامتها ألف سلامة .. وده اللي حاولت بعض الدول انها تنظمه
وتحط قوانين له كمان
فلو انت متعود تربي حيوان أليف في البيت
وبتأكله دراي فود وبتخرجه تمشيه كل كام يوم
وفاكر انك كده مدلعه وانك ياما هنا ياما هناك
فأحب أقولك إنك بالشكل ده ممكن تكون مجرم
في وجهة نظر قوانين بعض الدول
وممكن يتطبق عليك غرامات كتير جدًا
بسبب تقصيرك في حق حيوانك الأليف
زي في سويسرا مثلاً ، اللي بتجبر مواطنيها
على اخذ دروس تعلمهم ازاي يهتموا بحيواناتهم الأليفة
طبعًا ده لو حصل هنا هتبقى مسخرة
وهتلاقي الناس بتتابع مع بعض على الواتس آب
وعاملين جروبات للدفعة وأعمال سنة وليلة
وتلاقي الواحد منهم خارج زعلان من الامتحان
تسأله ليه .. يقولك ما خدتش بالي من الأسئلة اللي في ضهر الورقة
مع إن مادة رعاية الكلب دي مذاكرها كويس .. يلا ربنا يعوض عليك
ده غير ان الدول دي بتجبر أصحاب الحيوانات على شوية عادات هدفها
الحفاظ على نفسية حيواناتهم .. زي مثلاً
لو انت مربي قطة في البيت ومضطر تسيبها
عدد ساعات طويلة لوحدها فأنت مجبر
توفرلها كل يوم مكالمة فيديو مع أي إنسان
أو قطة تانية علشان تفضل على تواصل مع العالم
وما تصابش بالاكتئاب .. وإلا هتتعرض لغرامة
يا بختهم طب وأنا مين هيحافظ على نفسيتي المتدمرة
ويراعي إني منطفي من ٣٠ سنة
والحقيقة ده غريب جدًا لأننا كبشر بنحاول ما نتواصلش مع بعض
بقدر الإمكان علشان ما يجيلناش اكتئاب .. مش العكس
ولولا مشوار السوبر ماركت ما كناش خرجنا م البيت
كمان في سويسرا فيه شوية قوانين بتمنع أصحاب الحيوانات
من إهانة حيواناتهم بالتدخل في مظهرهم
بعمل قصات شعر غريبة ليهم أو صبغهم
الناس دي لو نزلت كوبري قصر النيل يوم العيد الصبح
هينتحروا بسبب الألوان وقصات الشعر الغريبة
اللي بنشوفها على البشر نفسهم في اليوم ده
وسويسرا هي البلد الوحيدة في العالم اللي بتجبر مواطنيها
من مربيين الحيوانات الأليفة على تزويدهم
بشريحة الكترونية وتسجيلها في قاعدة بيانات مركزية
ما يعرفوش إن فيه ناس عاشت واتجوزت وخلفت وماتت
ونسيوا يطلعوا شهادات ميلاد وبيطلعوها مع الوفاة مرة واحدة توفيرًا للوقت
إنما بقى لو انت مواطن إيطالي فأحب أقولك
إن إيطاليا اصدرت قانون في ٢٠٠٥
بيمنع تربية أسماء الزينة في أحواض
إلا بمعايير وأحجام معينة لأن أحواض سمك الزينة
بشكلها المعروف ما بتوفرش الاكسجين الكافي للسمك
وبتعرض الأسماك للموت بسرعة بسبب نقص الأوكسجين
ما يعرفوش إن البشر هنا بيتنفسوا ثاني أكسيد الكربون
مع سنة أوكسجين والدنيا ماشية عادي
كمان في إيطاليا وتحديدًا في ولاية تورينو
فلو انت مربي كلب فإنت مجبر تمشيه
كل يوم ٣ مرات على الأقل للحفاظ على نفسيته
وإلا هتدفع غرامة ٥٠٠ يورو
يا أستاذ أنا ما خرجتش من بعد نتيجة الثانوية العامة
لعند ما ركبي اتخشبت وجالي خشونة في سن العشرين
إنما بقى لو انت مواطن بريطاني فإهمالك لمعايير
تربية حيوانك الأليف ممكن تعرضك للحظر من تربية الحيوانات
لمدة تصل لخمس سنين وممكن للأبد
أما لو انت مواطن أمريكي من ولاية مونتانا
فممنوع تربي فار أو تبيعه أو تشتريه
وبصراحة عندهم حق .. ايه اللي يخلي حد يربي فار برضه ؟
احنا عندنا بنصطاده بحتة جبنة قريش
مش رومي حتى ولو حصل وكل الجبنة من غير ما يموت
بتبقى ليلة سودا ع العيلة بحالها
إنما لو انت أمريكي من ولاية بنسلفانيا
فالقانون بيفرض عليك انك تقدم لكلبك
ماية نضيفة ٣ مرات على الأقل ولو أُثبت عليك
إنك ما بتعملش كده فممكن تتعرض للحبس
ودي سهلة جدًا .. ومع اننا كبشر بنشرب من الحنفية
وشايلين شوائب في أجسامنا أكتر من كمية المياه نفسها بس سهلة دي
هنركبله فيلتر ٥ مراحل على الله يطمر
وعلى العكس تماماً من كل اللي قولناه
فلو انت مواطن ايراني ، فأحب اقولك إن إيران
منعت تربية الحيوانات الأليفة في البيوت
زي القطط والكلاب والأرانب والقرود
إلا بإجراءات طويلة ومعقدة .. ولو اتمسكت
في الشارع بتمشي كلبك مثلاً.. فهتطبق عليك أقصى عقوبة ممكنة ..
الحقيقة قوانين كتير في دول كتير في العالم
بتنظم رعاية الحيوانات الأليفة ، ونتمنى تطبيقها في مصر
زي انك لو عندك كلب فمن حقك يدخل معاك مطعم
أو محطة المترو مثلاً ، لأن في مصر ده ممنوع
وممكن يعرضك لغرامات مالية كبيرة
الحيوانات الأليفة بالنسبة للي بيربوها هي جزء كبير من حياتهم
والعناية بيها جزء كبير من تديننا وانسانيتنا
انت بقى بعد ما سمعت القوانين دي
تفتكر لو انت مواطن من دولة من الدول اللي ذكرناها
هتتطبق عليك أنهي عقوبة .. قولنا في الكومنتات
ايه نوع الحيوان الأليف اللي بتربيه
وايه أغرب عادة بيعملها .. وما تنساش تلف لفة
في المقالات اللي فاتت .. هتتبسط
المشاركات
ليست هناك تعليقات:
إرسال تعليق
أتشرف بتعليقك ونقدك دائمًا ..