"  بغبغان في قفص الاتهام ، وديك باض بيضة .. تعرف على أغرب قضايا الحيوانات في العالم "

لو انت كل يوم بتروح بيتكوا جري 

بسبب اللي في الشارع اللي مستقصداك

فأحب أقولك إن فيه دول بتمنحك حق محاكمة الحيوانات

وإن فيه قضايا كتير في العالم بتترفع ضد الحيوانات 

وبيتعينلهم محامين وفيه منهم بياخدوا أحكام كمان

وده حصل في أماكن كتير جدًا وكان أقربهم 

في ٥ سبتمبر سنة ٢٠١٩ لما حكم القضاء الفرنسي 

ببراءة الديك موريس بعد ما رفع سكان 

جزيرة أوليرون في شمال فرنسا عليه قضية 

بسبب صياحه المستمر ، ولكن بعد البت في القضية 

حكمت المحكمة إن من حق أي ديك 

عمره أكبر من ٤ سنين أن يستمر في الصياح 

زي ما هو عايز .. ابسط يا عم صيح براحتك 

كمان في أمريكا ، اتهم السكان كلب بتهمة التعدي على كلبين 

من كلاب الحي .. وبعد ما الكلب وقف في قفص الاتهام

حكمت المحكمة  بتعيين خبير متخصص لمراقبته 

إنما كانت أغرب التهم اللي اتعرض ليها الحيوانات 

في مدينة بازل في سويسرا سنة ١٤٧٤ 

لما السكان قدموا ديك للمحاكمة بسبب إنه باض بيضة 

واعتبروا ان ده عمل شيطاني واتهموه بالإلحاد كمان 

والحقيقة إن ده مش الحاد بس .. لا ده كمان 

بوظلنا مثل بيستخدمه كل سواقين الميكروباص 

لو باض الديك .. هعديك .. أهو باض يا عم الحاج 

والمحكمة حكمت على الديك بالحرق حيًا 

احسن علشان ما تتدخلش في شغل غيرك بعد كده 

كمان في الهند في ولاية ماهاراشترا استدعت الشرطة

بغبغان متهم بالإساءة لسيدة مسنة 

السيدة (جاناباي ساخاركار) واللي عندها ٧٥ سنة 

قدمت شكوى ضد البغبان (هاريال) لأنه بيشتمها 

كل يوم الصبح على غيار الريق 

ولما حطوه في القفص طلع واعي و ما نطقش بكلمة واحدة

وبالتالي المحكمة حكمت عليه بتسريحه في الغابات 

برضه انتي عاملة دماغك بدماغ ديك يا حاجة 

الشتيمة ما بتلزقش .. 

أما في فرنسا .. في القرن ال١٦ استدعت المحكمة مجموعة

من الفئران بتهمة تدمير محصول الشعير ولكن الفيران 

ما حضرتش جلسة المحكمة وقال المحامي بتاعهم 

إنهم ما حضروش بسبب خوفهم من القطط 

وحكمت المحكمة ببرائتهم .. 

في ألمانيا غرمت المحكمة حمار بدفع ٦٨٠٠ دولار 

بعد ما كسر سيارة ماكلارين .. يا ترى معاه يدفع 

ده الدولار النهارده ب ٣٥ جنيه .. 

دلوقت بعد ما سمعت ان فيه حيوانات بتتحاكم 

أوعى يوزك عقلك وتجري ع القسم 

تتهم الكلاب اللي بتجري وراك في الشارع 

ساعتها مش بعيد يحبسوك انت شخصيًا 

والناس في الشارع هتزفك وتقول العبيط أهوه 

وتبقى كل ليلة بتروح جري من الكلاب والناس كمان 

تفتكر لو في ايدك ترفع قضية على حيوان 

هتبقى ايه نوع القضية دي.. وايه تفاصيلها ؟ 

ياريت تقولنا في الكومنتات.. ولف لفة في المقالات اللي فاتت 

هتنبسط .. صدقني هتنبسط