" لغز حلم السيد سامسون .. الحلم الأغرب على الإطلاق "

" لغز حلم السيد سامسون .. الحلم الأغرب على الإطلاق "

عمرك حلمت حلم قبل كده وإتحقق ؟

طبعًا هتقولي وارد وبيحصل وكل الكلام الجميل ده 

بس ده في حالة إنه الحلم يخصك أو يخص حد من معارفك

أو قرايبك ، أو حتى بتقع أحداثه في مدينتك 

أو محيط معيشتك بس ، وطبعًا ده له سبب علمي 

إننا كبشر إستحالة نحلم بأحداث أو أشخاص 

الا وسبق شوفناها قبل كده 

يعني مستحيل العقل البشري يخلق أحداث من لاشيء 

بس ده ده ما حصلش في حكاية النهارده

لأغرب حلم اتحقق عبر التاريخ 

في 27 أغسطس 1883 كان بيشتغل الأمريكي إدوارد سامسون صحفي ،

 في مجلة البوسطن جلوب في أمريكا ، وكان إدوارد من أشهر الأقلام الصحفية في الصحيفة ، 

وفي أمريكا كلها ، وعدد قرائه كان يتجاوز الآلاف بفضل كتاباته ،

 وفي أحد الأيام قعد إدوارد يفكر وقت طويل جدًا 

في فكرة متميزة لإحدى مقالاته بالصحيفة ، 

وكان بيعاني من حالة من حالات الإنسدادة الكتابية 

ودي حالة بتصيب الكتاب ، وفجأة بيلاقوا نفسهم 

مش عاجزين عن الكتابة نهائيًا 

وأثناء تفكيره ومحاولته إنه يكتب مقالته 

 وقع إدوارد في نوم عميق جدًا ، وحلم أغرب حلم على الاطلاق 

حلم سامسون وكأنه يطير بجسده في الهواء ، أو بمعنى أصح بروحه فقط 

وبيخرج من الغرفة وهو شايف نفسه بيراقب جسده وبيسيبه نايم مكانه 

ومن اوضته في الجريدة لسما المدينة وبيخرج منها ، للغلاف الجوي وبيغادر حدود أمريكا كلها

لعند ما بيشوف نفسه أعلى جزيرة في المحيط الهندي ، 

جزيرة مساحتها كبيرة تذخر ومليانة بالسكان اللي بيمارسوا يومهم بكل بساطة 

وفجأة لمح سامسون بركان ضخم على حدود الجزيرة ، 

مش مستقر وبدأت حممه في الخروج ،

 وفجأة انقلب الحال رأسًا على عقب وشاهد سامسون السكان ، 

ينظرون إلى الحمم الملتهبة اللي خارجة من فوهة البركان ، 

وتتجه نحوهم بسرعة كبيرة ، علشان تحول الحياة على سطح الجزيرة اللي كانت هادية ومستقرة

من دقايق بس لجحيم ونيران وحالة من الفوضى ، 

ومش بس الجزيرة اللي اتحرقت بيوتها بالكامل 

ولكن امتدت آثار الانفجار إلى المرفأ 

وحرقت السفن الراسية على شاطئ الجزيرة ، حتى السفن اللي قدرت تهرب 

لحقت بها الأمواج المتلاطمة بشدة والنيران المشتعلة ،

 جراء الانفجار البركاني اللي باد أغلب الجزيرة  

قام سامسون من نومه المفاجئ العميق ده ، عرقان جدًا وبينهج

 وكأنه كان موجود على الجزيرة وبيهرب من البركان زيه زي السكان 

قام وهو فاكر كل اللي حصل بالتفصيل وسامع بودانه ، صرخات السكان

 وهم بيجروا خايفين من البركان ، ومش بس سامع .. لا كمان 

كان حاسس بحرارة شديدة كأنه خارج من فرن حرفيًا 

أول حاجة فكر فيها سامسون بعد ما صحي

إنه قام بكتباة تفاصيل حلمه على ورقة وسابها على المكتب ،

 وحطلها عنوان (هام جدًا) لأنه هيحتاج يرجعلها في يوم من الأيام

ويكتب من خلالها قصة خيالية  ، وأطلق على الجزيرة اسم برالاب ،

 وعلق الورقة فوق مكتبه وخد بعضه ومشي .

حضر مدير التحرير إلى الجريدة ، بعد ما مشي سامسون

 ولقى الورقة اللي كتبها سامسون متعلقة ومكتوب عليها مهم ، 

فقرأ ما فيها وافتكر أنه سبق صحفي للجريدة ،

وبسرعة راح إلى المطبعة ، وأمر بطباعة محتوى الورقة ونشرها

قبل ما ينشر الخبر جريدة تانية ، وبسرعة كبيرة

 انتشر الخبر وتداوله الجميع ، في حين بدأت الصحف المنافسة لهم ،

 بالتساؤل عن مكان الجزيرة دي غريبة الاسم ، واللي ما سمعوش عنها قبل كده

وازاي عرف الصحفي (سامسون) اللي كتب الخبر باللي حصل ، وغيرها من الأسئلة المشككة

رجع سامسون للجريدة بعد عدة أيام انشغل فيها بأمور حياته ، 

واتفاجئ باللي حصل و راح إلى رئيس التحرير

 ووضح له أصل الحكاية وإن الموضوع كان مجرد حلم مش أكتر ، 

وده اللي خلى رئيس التحرير يدخل في نوبة شديدة من الغضب 

ويحس انه بسبب حلم سامسون خاطر بسمعته وسمعة الجريدة

وبناءًا عليه فصل سامسون من العمل وعقد مؤتمرًا للصحيفة ، 

اعتذر فيه مدير التحرير للقراء والصحف المنافسة ،

 ووضح ما حدث من لبس في الأمر ، وانتهى الموضوع .

المفاجأة ، إنه بعد ما مر أسبوعان على ما كتابة المقال ونشرها ، 

وصلت إلى الشواطئ سفينة شبه مدمرة ، وطاقمها في حالة من الرعب ، 

وبدؤا يحكوا قصة جزيرتهم اللي اشتعلت فيها النيران ، بسبب انفجار بركان ، 

ألقى بحممه الملتهبة على الجزيرة ، لتشتعل فيها النيران وتختفي تمامًا !

بالظبط زي ما سمعت كده ، الحلم تحول إلى حقيقة ،

 واختفى جزء كبير من جزيرة كراكاتوا التي تقع بإندونيسيا ،

 وهي جزيرة بركانية ، تدمرت فجأة إثر انفجار بركاني حدث عام 1883م ،

 وتسبب عقب الانفجار في حدوث موجات متصاعدة من التسونامي بعد كده ، 

وتسبب هذا الانفجار في وفاة أكثر من 35 ألف شخص ، 

وجرح عشرات الآلاف من سكان الجزيرة ، واختفى أكثر من ثلثي الجزيرة جرّاء هذا الانفجار .

بمجرد ما عرفت الصحف بأمر الجزيرة ، حتى بادر مدير تحرير صحيفة البوسطن جلوب ،

 بالتبجح وذكر أنهم كانوا أول من تنبأ بحدوث تلك الكارثة ، وتم إعادة سامسون إلى عمله ، 

وترقيته في الوظيفة! وبالبحث عن اسم الجزيرة الذي ذكره سامسون في مقالته ،

 عثر البعض على خرائط قديمة للغاية ، كانت تظهر فيها جزيرة كراكاتوا باسم برالاب ،

 اللي ذكره سامسون وكان هذا هو الاسم الذي أطلقه عليها السكان الأصليون للجزيرة ،

 لذلك لم يعرفه أحد في العصر الحديث

طبعًا الحلم اللي راود سامسون ما كانش مجرد حلم 

كان نوع من أنواع التجلي البصري أو اللي بيسموه

الإسقاط النجمي ، واللي للأسف وقت حلقتنا مش هيمكننا من الكلام عليه بالتفصيل

ولكن لو حصلك حالة مشابهة ياريت تقولنا في الكومنتات

لأن بالشكل ده تكون انتهت حكايتنا النهارده 

استنونا في حكاية جديدة .