" إزاي تخلي الناس تحبك ؟! "

 "  إزاي تخلي الناس تحبك ؟! "

سنة ٢٠٠٣ صدر فيلم مصري إسمه إزاي تخلي البنات تحبك .. 

من بطولة هاني سلامة وأحمد عيد واللي طرح سؤال مهم جدًا

سؤال قديم قوي .. بس تقريبًا ما اداش اجابات كافية

ولا منطقية الحقيقة .. 

وطبعاً ما نقدرش ننسى المشهد المشهور من فيلم 

سيد العاطفي من بطولة تامر حسني .. واللي كان بيقول فيه

في محاضرة لتعليم الشباب فنون الشقط 

سيب البت تحبك .. حب البت تسيبك 

واللي حاول يدي بعض الحلول البسيطة لمسألة الحب 

واللي الكل تقريبًا بيدور عليه وبيحاول يوصله 

لكن برضه ما كنتش حلول كافية  

لكن احنا بقى النهارده قررنا نجاوب ع السؤال ده 

بخطوات عملية ومنطقية .. 

إزاي تخلي الناس تحبك ؟! 

 يا ترى ازاي ؟! .. إختر بين الإجابات التالية :

 الفلوس .. أو النقود .. أو الأموال 

الحقيقة الإجابة ملهاش أدنى علاقة بالفلوس أو المظهر أو السلطة 

أو أي حاجة ممكن تكون عند ناس وناس تانية لأ 

يعني مش هتلاقيني بقولك على حاجات فيه ناس منكوا

يقدروا يعملوها وناس تانية ما يقدروش 

بالعكس الإجابة في الحلقة دي في أربعة نقاط

 هتخليك تعرف إن الموضوع في إيدك 

وتقدر تنفذهم  بكل سهولة 

م الاخر كده هنديلك الخلاصة .. ونحط المانوال في ايدك 

 
أولاً / Be a good listener 
كن مستمع جيد

استمع بحرص .. إسمعلي .. ده حقي عليك كصاحب ، 

أو كإبن أو أخ أو زميل أو شريك حياة

 مش لازم كل ما أقولك أنا … 

ولسه ما كملتش الكلمة تقولي وأنا كمان .. 

مش مسابقة هي .. مش بطولة واللي زعلان أكتر هيكسب 

ولا اللي مضايق أكتر هنديله جايزة 

معنى إن فيه حد لجألك دوناً عن الخلق وقرر إنه يحكيلك 

ده معناه إنك مهم بالنسبة له ومعناه كمان إنه لما تسمعله هيرتاح 

ولو ما سمعتلوش .. لو ما سمعتلوش يبقى ما تستاهلش تكون صاحب أو أخ 

خطوة أسهل ما يمكن ويقدر أي حد ينفذها 

وهتعلي من قدرك جدًا عند كل الناس اللي حواليك 

ودي أول نقطة .. وأظن سهلة جدًا

 
ثانياً / Smile  إبتسم 

إبتسم يا أخي .. ما بقولكش لا سمح الله اضحك 

لا .. بقولك بس إبتسم 

الرسول عليه الصلاة والسلام قال في حديث شريف 

 «تَبَسُّمُكَ فِي وَجْهِ أَخِيكَ لَكَ صَدَقَةٌ»

صدقة .. يعني لو حضرتك مُعدم ومش لاقي تاكل 

وبالتالي مش لاقي تتصدق 

فيه طريقة مجانية تقدر تتصدق بيها وهي الإبتسامة 

ده غير بقى المثل الصيني الشهير واللي بيقول 

(إذا لم تستطع الإبتسام لا تفتح متجراً)

طبعًا ده لو اتطبق هنا لا حد هيبيع ولا هيشتري 

ودي من النقاط اللي بنعاني منها على مدار اليوم 

في كل تعاملاتنا بتلاقي الناس مكشرة في وشك 

كأنك انت اللي مصحيهم م النوم 

يا عم إبتسم .. ده انا زبون وجاي أنفعك 

ودي حاجة تستحق الإبتسام في حد ذاتها 

وبرضه الخطوة دي زيها زي الخطوة الأولى 

مش محتاجة منك أي مجهود ولا هتكلفك جنيه

هي مجرد ابتسامة .. لكن هتفتحلك أبواب وطرق كتير

في قلوب الناس اللي حواليك .. وهتخلي كل صعب يتسهل

رقم تلاتة .. say thank you قول شكرًا

لما أكون عاملك خدمة أو حاجة تستحق الشكر 

فواجب عليك تشكرني 

و الا بعدين هقرر اني مش هخدمك 

هقرر اني أعاملك بنفس الطريقة 

ومع الوقت هيكون ده شكل التعامل بين الناس 

يعني مش تبقى ساحلنا معاك لأيام في مصلحة تخصك 

وما تقوليش شكراً ومتوقع انك لما تطلب مني حاجة تانية أعملها خلي عندك دم 

وبرضه دي خطوة سهلة التنفيذ وأي حد يقدر عليه 

كلمة من أربع حروف .. شكرًا  

Apologize sincerely رقم أربعة
اعتذر بصدق 

لما تبقى غلطان ومتنيل على عينك .. إعتذر 

مش هتحصل مشكلة لما تعتذر 

مش هيشاوروا عليك في الشارع ويقولوا اللي قال آسف أهوه 

الموضوع بسيط بس أثاره كبيرة 

والإعتذار مش مجرد كلمة .. والإعتذار لازم يكون عمل جاد 

يأكد للشخص اللي قدامك اللي حضرتك غلطت فيه 

إنك بالفعل ندمان مش مجرد كلمة آسف 

وبناءًا على كتاب كيف تجذب الناس كالمغناطيس 

للكاتب ليل لاوندس واللي صدر سنة ٢٠٠٩ 

واللي ذكر فيه عدد مهم من النصايح اللي هتساعدك 

على تحسين علاقتك بالناس ويخلوك محبوب 

وأولهم انك تكون متفائل وتدي أمل للناس وتساعدهم

فهتلاقيهم مع الوقت بيطلبوا نصيحتك 

تاني نصيحة انك لازم تحط نفسك مكان الناس 

وتحكم في الأمور من وجهة نظرهم وتقدم لهم العذر قبل كل شيء

تالت نصيحة ذكرها الكتاب .. انك لازم تتعامل مع كل شخص 

معاملة خاصة ، يعني ما تتعاملش مع الناس على أنهم مصالح

يعني لو بتشتري أكل من حد ياريت 

لو تبص للشخص اللي بيقدملك الأكل ده وتقوله 

شكرًا .. انت بتعمل شغل جميل .. صدقني هيتبسط 

وبعد كده هيميزك في الخدمة عن أي حد 

النصيحة الرابعة اللي ذكرها الكتاب انك تكون مبادر 

حتى لو حسيت بعدم اهتمام من اللي بيتعامل معاك 

يعني لو بتشتري حاجة من سوبر ماركت وحسيت 

انه بيتعامل معاك من غير ما يبصلك واكنك مش موجود 

بادر وخد خطوة وقوله شكلك تعبان النهارده

صدقني ده هيفرق معاه جدا ان حد فارق معاه تعبه 

في نهاية الحكاية حابب أقولكوا 

إن حب الناس غاية سهل الحصول عليها 

ما بتطلبش إنك تكون على قدر من الثراء 

ولا مظهرك يكون جذاب 

ولا محتاجة أي تفاصيل ممكن نلاقيها عند حد وحد تاني لأ 

الموضوع مجرد قرار 

تكون مستمع جيد .. تبتسم .. تقول شكراً  .. تعتذر بصدق

وما تنساش وانت بتعمل الأربع حاجات دول تشترك في المدونة  

وتلف لفة في المقالات اللي فاتت .. هتنبسط