" أغرب الأنظمة الغذائية للمشاهير .. إحداهن تتغذى على اللحم النيء "

 " أغرب الأنظمة الغذائية للمشاهير .. إحداهن تتغذى على اللحم النيء "

لو فاكرة إنك هارية نفسك 

دايت ورياضة ورياضة ودايت وكل محاولاتك باءت بالفشل 

تعالي شوفي المشاهير وأغرب الأنطمة الغذائية اللي بيمشوا عليها 

علشان يوصلوا للشكل المثالي ده 

بوظتي الدايت تاني وبتتحججي بإن 

الست الوالدة مستقصداكي وكل ما تشوفك عاملة دايت 

تعمل هي محشي .. تعالي أفرجك على الناس اللي عندها عزيمة بجد 

وأغرب الأنطمة الغذائية للمشاهير 

بوظتي الدايت للمرة الخمسين ؟!

وبتأنبي نفسك على كل صباع محشي دخل معدتك 

مع إنك حالفة إنك تقاطعيه .. تعالي أحكيلك

 عن أغرب الأنظمة الغذائية للمشاهير واللي كانت سبب في وصولهم للشكل المثالي

 

١) فيكتوريا بيكهام

فيكتوريا بيكهام مغنية البوب 

وزوجة لاعب كرة القدم المشهور دايفيد بيكهام 

عندها نظام غذائي من أغرب الأنظمة المتبعة في العالم 

الست دي يا جماعة بقالها ٢٥ سنة ما بتاكلش غير سمك أو سلمون 

مع خضار مسلوق أو مشوي .. تخيلوا ؟ 

٢٥ سنة ما بتاكلش حاجة تانية خالص وما زهقتش 

لا كحك في العيد ، ولا محشي وبط في اول فطار في رمضان 

ولا أي حاجة تانية غير سمك وخضار.. بس والله ارتاحت من سؤال 

حير كل الستات المصريين ، هناكل ايه النهارده ؟ لأنها عندها نفس الإجابة من ربع قرن 

٢) هايدي بلير مونتاج

ودي مغنية مشهورة وممثلة 

في واحد من أشهر برامج الواقع the hills 

واتعودت هايدي من سنين طويلة على أكل اللحوم والكبدة 

نية تمامًا ، زي ما هي كده في حالة من حالات البيع المباشر

من الجاموسة عليها عدل .. لا طبيخ بقى ولا غسيل مواعين 

ولا بتستخدم غاز ولا توابل ولا اي حاجة .. 

وطبعاً ده غير صحي تمامًا ولازم تكون متأكدة من مصدر اللحمة كويس

لأن اللحوم النية مليانة بالبكتيريا والطفيليات اللي بتموت على النار 

لكن أكيد هي عاملة حسابها .. الغريب إنها تبان كيوت كده وعسولة 

ولكنها في الحقيقة .. بتاكل اللحمة نية ..

 

٣) كيم كارداشيان

وكيم كاردشيان من أشهر المؤثرين 

والنشطاء الإجتماعيين وبتتبع كيم نظام غذائي حاد 

قائم بالكامل على أكل اللحوم والخضروات بس 

وبتبعد عن السكريات والدهون تمامًا ، بس بتكتر 

من العصاير الخضرا .. واللي بتصفي الجسم من سموم كتير

 

٤) أديل

المطربة المشهورة صاحبة واحد من أفضل الأصوات في العالم 

 اللي فاجأتنا كلنا بنزول وزنها بشكل كبير 

واللي بتتبع نظام غذائي قائم على الطهي بالطريقة الصينية

يعني بتحط الأكل ع النار من بروتين وخضار مدة صغيرة جدًا 

وتاكله نص سوا .. وعلشان ما تحسش بحرمان

بتاكل طول الوقت شيكولاته داكنة .. والنتيجة زي ما انتوا شايفين 

بسم الله ما شاء الله.. كده بقت صوت وصورة 

٥) ناتالي بورتمان

بطلة فيلم black swan 

واللي قررت تخس مخصوص علشان تلعب دورها في الفيلم ده 

كراقصة باليه .. وناتالي اعتمدت في نظامها الغذائي 

على نوعين من الأكل بس .. الجزر واللوز 

والصراحة ده لو أرنب الواحد هيحطله شوية عيش حتى 

٦) مادونا

المغنية المعروفة ، واللي بتدعي انها بتقوم 

بطهي الأكل وتستنشق بخاره بس .. 

وبتقول إن ده كافي لمنح الجسم النشاط المناسب

وتعزيزه بالمعادن اللازمة له على مدار اليوم 

مش عارفين إن كانت صادقة ولا كدابة 

بس بصراحة ده اوفر قوي يعني .. يعني أنا انزل 

اصرف واكلف واشتري لحمة وخضار 

علشان أسلقهم ولا مؤاخذة أشمهم بس ..وتقوليلي بيمنح الجسم النشاط 

والله احنا اللي نعرفه إن الواحد لو ما فطرش فول ع الصبح 

أكنه لسه ما صحيش

 

٧) نيكول كيدمان

الممثلة المشهورة ، واللي بعدت ما خلفت

قررت تتبع نظام غذائي شاق .. علشان تتخلص من الوزن الزائد بعد الولادة 

ونظامها الغذائي قائم على نوع واحد من الأكل

٤ بيضات في اليوم .. مش ع الفطار ، لأ في اليوم كله 

ده الست هنا بعد الولادة بيسموها نفسة 

ولازم العيل ينزل من هنا يتحط مكانه جوزين فراخ من هنا 

دفعة واحدة كده .. طبعاً علشان تتقوت 

والحقيقة إن لكل حاجة ضريبة ومفيش حياة كاملة 

ولو انتي فاكرة إن أجسام المشاهير اللي حضرتك بتحسديهم دول 

جات بالساهل .. أحب أقولك إنك غلطانة 

لأن محدش بياخد كل حاجة .. يا إما فورمة كويسة

ورشاقة .. يا إما تاخدي راحتك وتبرطعي في الأكل 

بعد ما سمعتوا عن أغرب الأنظمة الغذائية للمشاهير

قولولي بقى إيه أغرب نظام غذائي عملتوه 

وفشل كام مرة ؟ 

وما تنسوش وانتوا بتنقنقوا كده تاخدوا لفة في المقالات اللي فاتت

هتنبسطوا ..