"  التقويم الأثيوبي - قول للزمان ارجع يا زمان "

لو سألتك إحنا في سنة كام هتقولي بكل بساطة 

احنا في ٢٠٢٣ ومن وجهة نظرك ده سؤال مش محتاج إجابة 

لأنه بديهي .. بس أحب اقولك ده بالنسبالك انت بس 

لأن في دول تانية احنا لسه في سنة ٢٠١٥ 

وده اللي حاصل في أثيوبيا وإريتريا بالظبط

واللي التقويم عندهم بيختلف اختلاف تام 

عن التقويم الميلادي في كل دول العالم 

من حيث عدد الأيام والشهور وتسميتها

ومتأخرين بفرق ٨ سنين عن التقويم الميلادي 

يعني الدنيا كلها في سنة ٢٠٢٣ بس هما دلوقت لسه في سنة ٢٠١٥ 

والسنة في أثيوبيا أو في التقويم الجعيزي أو الحبشي 

بتتقسم لـ ١٣ شهر مش ١٢ زي بقية الخلق 

١٢ شهر منهم كل شهر بيتكون من ٣٠ يوم عادي 

زي الشهور بتاعتنا العادية 

والشهر رقم ١٣ بيتكون من ٥ أو ٦ أيام 

على حسب السنة دي كبيسة ولا بسيطة

وبيسموها الأيام دي أيام شروق الشمس أو باللغة المحلية (باغيل)

وباغيل شهر ما بيتحسبش في أي وظيفة 

ولا بيتدفع فيه أجور خالص 

ولا بيتعد في السجلات الرسمية وأكنه مش موجود

ولكنه شهر مقدس بالنسبة لمسيحي أثيوبيا

خاصة أتباع الكنيسة الأرثوذكسية الشرقية 

واللي على حسب مصادرها إن الشهر ده تم فيه تعميد المسيح عليه السلام 

يعني تقريبًا بعد التاريخ المعتمد بالتقويم الميلادي ب ٨ سنين 

وبعده مباشرةً بتبدأ احتفالات رأس السنة الأثيوبية الجديدة 

واللي بتوافق يوم ١٠ سبتمبر من التقويم الميلادي 

والتقويم الأثيوبي هو التقويم الرسمي 

اللي بيستخدموه بينهم وفخورين بيه جدًا

اه فيه منهم يعرف التقويم الميلادي لكن ما بيستخدموش 

ومنهم ناس ما تعرفش عنه حاجة أصلاً

وخصوصاً أهل القرى اللي بالنسبة لهم التقويم الحبشي هو الكل في الكل

علشان يقدروا يظبطوا عليه مواعيد أعيادهم

وبيقولوا إن التقويم الحبشي مشتق من التقويم الشمسي المصري 

أو يعني التقويم القبطي 

ولكنه بيضيف يوم كبيس كل أربع سنين 

والمفارقة الغريبة إن أول يوم في العام الأثيوبي 

بيوافق ١١ سبتمبر اللي هو ذكرى الهجمات 

على برجي التجارة في أمريكا .. الحدث ده اللي غير شكل العالم 

يعني يبقى الناس متنكدة وهما بيحتفلوا براس السنة 

واليوم في التقويم الحبشي منقسم بشكل متساوي تماماً

يعني عدد ساعات النهار قد عدد ساعات الليل بالظبط ، وبالتالي ..

فإن لحظة الشروق الساعة ٦ صباحاً في أي مكان في العالم

 تعتبر في إثيوبيا الساعة ١٢ علشان تكون أول ساعة في اليوم 

هي بداية التوقيت الساعة ١

 يعني الساعة ٧ صباحاً في أي دولة تانية

ولما بتغرب الشمس تكون الساعة ١٢ 

 ودخول الليل من بداية الساعة واحدة .. يعني اليوم مقسوم بالنص بالظبط

ولو انت حد من الناس اللي بتتحسر على زمان 

وعلى أيام زمان وأسعار زمان .. فأحب أقولك 

تذكرتك طيرانك وجواز سفرك وشد على أثيوبيا 

هتلاقيهم عايشين في زمان وهتبقوا مبسوطين مع بعض 

بعد ما سمعت عن التقويم الأثيوبي .. 

تقدر تفتكر ايه حصل معاك في ٢٠١٥ وعايز تكرره ؟

ولا أيامك كلها شبه بعضها ؟ 

ياريت تقولنا رأيك في الكومنتات

وما تنساش تاخدلك لفة في المقالات اللي فاتت

هتنبسط