قبيلة الهونزا أكبر معمرين الأرض
ناس كتير على مدار التاريخ كانت بتدور على سر العمر الطويل
هل هو من خلال نظام غذائي معين
ولا من خلال ترياق أو ينبوع معين بيستخدموا أصحاب العمر الطويل
ولا هو مجرد سر من عند الله .. محدش له السيطرة عليه
غير ناس محددة ربنا اختارهم ..
وناس كتير من هوسهم بالموضوع ده لفوا العالم كله
وناس تانية كانت بتدور على ما هو أبعد من العمر الطويل
لا دول كانوا بيدوروا على سر الخلود نفسه
وقضوا حياتهم في ترحال بين جبال الألب
والمعابد والقلاع وأماكن يقال إن أهلها عندهم السر ده
ومن الأماكن دي اللي بيعيش فيها أكبر معمرين في العالم
هي جزيرة من الجزر البعيدة عن العالم
واللي ما وصلهاش تكنولوجيا ، واللي لفترة طويلة
شكلت لغز كبير بين البلاد بسبب كبر أعمار سكانها
عن قبائل الهونزا أكبر معمرين في الأرض
هتكون حكايتنا النهارده …
قبيلة الهونزا واللي بتقع على الحدود بين باكستان والهند
من القبائل اللي حيرت العالم بسبب أعمار سكانها الطويلة
نسبياً مقارنة بباقي سكان الأرض واللي
أعمارهم تصل إلى الـ 150 عام
ونسائهم عندهم القدرة على الإنجاب وهما في سن السبعين ..
قبيلة الهونزا هي قبيلة مسلمة تعيش في وادي يسمى وادي الخالدين
واشتهروا بأنهم بيعيشوا أعمار مديدة ، ولا تصيبهم أوبئة وأمراض هذا العصر
ويبلغ عدد سكان القبيلة تقريبًا 920 ألف نسمة
وبسبب معدل أعمارهم وصحتهم علماء وباحثين كتير
بدأوا يدوروا على الأسباب ورا كل ده
هل هو دوا أو عقار معين بيستخدموه ..
ولا بحيرة زي ما كان بيتقال بيشربوا منها ..
ولا لمجرد معيشتهم في مكان مبارك زي وادي الخلود
هو اللي كان سبب في طول أعمارهم
والحقيقة محدش من العلماء وصل لحاجة مش طبيعية
ولكن الأسباب ورا أعمارهم الطويلة كانت أسباب
يقدر أي حد على سطح الكرة الأرضية إنه ينفذها
والأسباب اللي قدر العلماء يحصوها زي ما قولنا قبل الفاصل
كانت سهلة وبسيطة جدًا ويقدر أي حد على الكرة الأرضية
انه يتبعها ويمشي عليها ويوصل لنفس النتايج
وهي كانت السر ورا أعمارهم الطويلة
واللي أولهم إنه بيتبع أفراد القبيلة أسلوب حياة يومي
هو سر شبابهم الدائم فهم يعتمدون فى نظامهم الغذائي
على أكل الخضروات النيئة فقط
والفواكه والبروتين زي الحليب والبيض والجبنة
وما بياكلوش أي حاجة تانية إلا اللي بيزرعوه وبس ،
وكمان عندهم فترة صيام صحي مدته ثلاثة أشهر من كل عام
لا يتناولون فيها إلا العصير الطازج ، ده غير صيامهم الشرعي
في شهر رمضان بما إنهم قبيلة على الديانة الإسلامية
يعني زي ما سبق وقولنا أسباب عادية جدًا وأي إنسان يقدر ينفذها
كمان من ضمن الأسباب والأسرار ورا أعمار قبيلة الهونزا الطويلة
وشبابهم الدائم هي الرياضة واللي بيختصروها
في نشاط سهل وبسيط ولكن دوري ويومي
فا بيتضمن نظام حياتهم اليومي المشي لمسافات أكثر من 20 كيلومتر
أنا عارف إن دي مسافة كبيرة .. ومش أي حد يقدر عليها
ولكن يا سيدي بلاش ٢٠ كيلو كل يوم
كفاية ٢ كيلو بس .. هيخلوا صحتك بومب
كمان من الحاجات اللي بتميز قبيلة الهونزا هي نساؤهم
حيث تتمتع نسائهم بصحة جيدة تخليهم قادرين على الإنجاب
في سن الـ 70 عاما وكأنهم فى سن العشرين ، وده مش طبيعي بالنسبة لباقي الستات
في أي مكان تاني على كوكب الأرض ، بل وإن السائد دلوقت إن الناس في سن العشرين
بيحسوا إنهم في السبعين مش العكس
وطبعاً الولادات هناك طبيعية ١٠٠٪ مفيش قيصري
ولا مستشفى الجلاء للولادة ولا غيره
ما شاء الله يعني .. اللهم لا حسد ..
وبسبب نظام قبائل الهونزا الغذائي
فانهم على الدوام بيتمتعوا ببشرة نضرة كبشرة الأطفال ،
بينما الرجال أقوياء ولديهم قدرة غير عادية للتحمل
وطبعاً كمان من الأسباب المتوقعة لزيادة عمر قبيلة الهونزا
واللي مش محتاجة توضيح ولا سؤال
هو غياب التكنولوجيا الحديثة لدى تلك القبيلة
يعني لا موبايل ولا انترنت ولا تيك توك
ولا أي وجعقلب من ده .. وبما ان مفيش تكنولوجيا
فمفيش لا ماتشات ولا مشاحنات ولا حزق
ولا أهلي و زمالك ولا كريستيانو وميسي
ولا أي حاجة .. الناس دي عايشة بجد
ولا عندهم أي نوع من أنواع المنافسة
و اللي بسبب انتشارها على السوشيال ميديا
بقى السائد عند الناس هو التوتر .. والتوتر يعني قلب وضغط وسكر
زي ما انتوا عارفين ومادام مفيش لا ضغط ولا قلب ولا سكر
مفيش ان شاء الله جلطات
وبعد سكان قبائل الهونزا عن التكنولوجيا
خلى من المجهود البدني الشاق أمر ضروري لاستمرارية الحياة ،
لا فيه دليفري ولا فوري ولا أسانسيرات
اللي عايز يعمل حاجة يعملها بإيده
وده خلى انه مفيش أي مجال للكسل والأنتخة
اللي يعتبر من أكثر المخاطر اللي بتهدد صحة القلب
وده سبب كافي يخليهم يعيشوات لعند 150 سنة
تم إكتشاف شعب الهونزا بالمصادفة فى عام 1984
عندما استوقف موظف الأمن في مطار لندن
رجل تاريخ ميلاده فى جواز سفره عام 1932
في حين إن شكله يبدو فى الثلاثين من عمره
وده اللي خلى رجل الأمن في المطار يستغرب ويشك في الراجل ده
، فحكى الرجل له عن موطنه الـ ( هونزا ) ومن هنا عُرفت تلك المنطقة
و إسم الهونزا معناه ( المتحدون في جبهة واحدة كالسهام )
والمجتمع ده بيتكلم لغة تسمى لغة البروشسكي ،
ويقال إنهم من نسل أحد جيوش الإسكندر الأكبر
اللي ضلوا طريقهم وتاهوا في القرن الرابع
في واحد من الجبال الضيقة للهيمالايا
دلوقت بعد ما سمعت عن قبائل الهونزا
وحكايتهم الغريبة.. هتبطل سهر ؟ أكيد لأ ..
طب هتبطل قهوة وتدخين وتاكل أكل صحي وتمشي كل يوم ؟
أكيد برضه لأ
طب هتسيب كل ما يتعلق بالتكنولوجيا ؟
طبعاً لأ لأن بالطريقة دي مش هتوصلك حلقات برنامج حكايات
لو تعرف معلومة مختلفة ياريت تقولنا في الكومنتات
وما تنساش تعملنا لايك وتشترك في القناة
علشان يوصلك كل حكايتنا ..
وبكده تكون انتهت حكايتنا النهارده
استنونا في حكاية جديدة
المشاركات
ليست هناك تعليقات:
إرسال تعليق
أتشرف بتعليقك ونقدك دائمًا ..