" هذا الحدث مقتبس من فيلم .. المياه السوداء ورعب فندق سيسل "
عمرك سمعت عن قصه اتحكت قبل ما تحصل ؟!
طبعا هتقولي ازاي يعني ؟! وهو ده ممكن من الاساس ؟
مش بعيد كمان تتهمني بالجنون وان اللي أنا بقوله ده
حاجة من اتنين .. يا إما بشتغلك ، يا إما بسرح بيك
لكن ده اللي حصل بالفعل سنة ٢٠٠٥
لما اتعرض فيلم Dark Water
أو المياه السوداء .. والطبيعي في بعض الأفلام
إنه أحياناً بيتكتب قبل بداية الفيلم ، إن هذا الفيلم
مقتبس من أحداث حقيقية .. لكن اللي حصل مع الفيلم ده بالذات
كان العكس تمامًا .. وإنه بعد عرض الفيلم بـ ٨ سنين
حصلت القصة بتاعته بنفس تفاصيلها ..
قصة ملهاش تفسير لعند دلوقت ..
فيلم المياه السوداء واللي صدر سنة ٢٠٠٥
من إخراج walter salles ومن انتاج Walt Disney
قصته كانت بتدور عن أم وبنتها سافروا لبلد تانية
بعد انفصال الأم عن الأب .. بالبلدي كده يعني
عزلوا علشان اتطلقت .. ربنا ما يكتبها على حد
وسكنوا في شقة في أحد الأحياء الفقيرة والهادية
بشكل مؤقت كده لحد ما الست تشوف شغل
ولا تكسب قضية النفقة اللي رفعاها على طليقها
وبعد مفيش كام يوم من سكنهم في الشقة
بتبدأ تحصلهم أحداث غريبة ، زي إن الأسانسير
يقف في أدوار معينة بدون سبب ..
وبدأت بنتها تتكلم مع شبح لطفلة إسمها ناتاشا
وبقوا اصحاب كمان .. وكان بيصاحب الظواهر الغريبة دي
نزول مياه سوداء من الحنفيات وجو رعب كده
بسبب إن المكان اللهم احفظنا ملبوس
فيلم عادي جدًا وبنشوف أحداث مشابهة له
في أفلام رعب كتير .. لكن الغريب مش في الفيلم
الغريب واللي ملوش تفسير لعند دلوقت
إنه بعد ٨ سنين من عرض الفيلم
وتحديداً في سنة ٢٠١٣ بيتفاجئ سكان فندق سيسل
في لوس انجلوس بنفس الأحداث بالظبط
الأسانسير بيقف في أدوار معينة
وبتظهر للسكان أشباح أو أطياف وخصوصاً للأطفال
لأرواح ساكنة الفندق من زمان
وبيصاحب ده نزول مياه سوداء من الحنفيات
السكان اللي حسوا بحالة من الرعب
ومحدش صدقهم لفترة طويلة لعند ما ظهر فيديو
على كاميرات المراقبة غريب جدًا
فيديو بتظهر فيه إحدى سكان الفندق ، اسمها اليسا لام
واللي بتختفي من الاسانسير بشكل غريب
قلبوا عليها الدنيا .. في سلقط في ملقط
فص ملح وداب .. اليسا ملهاش أي أثر
والحقيقة إن قضية اختفاء اليسا لام
قلبت الرأي العام وعملت ضجة كبيرة
في المجتمع الأمريكي ، وخصوصاً إنها متوثقة بفيديو
من كاميرات المراقبة للفندق نفسه
فيديو مش مفبرك .. فيديو حقيقي ١٠٠٪
كمان بسبب شهرة القضية .. نتفليكس أنتجت وثائقي
من ٣ حلقات بيتكلم عن قضية اختفاء اليسا
وإسمه crime scene : the vanishing at the cecil hotel
انت بقى ايه رأيك ؟ .. تفتكر مؤلف العمل كان أحد سكان الفندق ده ؟
ولا حد من السكان في وقت سابق حكاله ؟
يعني ازاي ممكن قصة بعد ما تتحكي في فيلم تحصل على أرض الواقع ؟
ياريت تقولنا رأيك في الكومنتات
وخدلك لفة في المقالات اللي فاتت .. هتنبسط
المشاركات
ليست هناك تعليقات:
إرسال تعليق
أتشرف بتعليقك ونقدك دائمًا ..