" فرصة عظيمة لكل صاحب كرش .. جهز نفسك لمسابقة ملك جمال الكرش "

قالوا في الأمثال.. كل فولة وليها كيال 

واللي بتتعاير بيه النهارده وسبب في همك 

في أماكن تانية علامة من علامات الجمال

كرشك ، والراجل اللي ملوش كرش 

ما يسواش قرش .. أيوه هو البلونة اللي إنت حاطط 

إيدك عليها دلوقت وبتستخدمها ستاند للموبايل 

وانت بتتفرج على الفيديو ده 

واللي أمنية حياتك إنك تصحى من النوم

تلاقيه اختفى واتحول لسيكس باكس

أحب أقولك إنت غلطان 

لأن في إيدك كنز بس مانتاش داري بيه 

إنت بس موجود في مكان غلط مكان مش مكانك

إنما بقى لو إنت واحد من سكان وادي أومو بجنوب أثيوبيا

هتتعامل بكرشك ده معاملة الملوك 

ومش بعيد يعينوك شيخ القبيلة 

أيوه يا أستاذ .. كرشك ده اللي كل كام شهر

تعمل دايت وتحرم نفسك من البشاميل والمحمر والمشمر 

علشان تعرف تروح الساحل 

هناك هو ثروتك الحقيقية .. لدرجة إن الرجالة هناك 

في وادي أومو ، بيبذلوا أقصى جهدهم 

علشان يبقى عندهم كرش زي كرشك ده 

وعندهم مسابقة بتقام كل سنة لأجمل وأكبر كرش 

في حدث كبير بيحضروا كل أفراد القبيلة 

إسمه (كايل) .. واللي بيكسب في الحدث ده 

كل أفراد القبيلة بيحترموه وبيضربوله تعظيم سلام 

يعني كلمة يا أبو كرش اللي ممكن تزعلك 

وتعتبرها تنمر وممكن ما تنامش الليل بسببها

هناك الكلمة دي مدح .. وسبب يخليك فخور بنفسك وبكرشك

أنا عارف إنك قمت دلوقت تجهز شنطتك وبتستعد للرحلة 

بس خد بالك قبل ما تسافر لازم تعرف

إن مش حجم الكرش بس هو اللي يخليك تكسب المسابقة دي 

لا .. ده لازم يكون مدور إستدارة كاملة ومظبوطة 

وده هيحتاج منك شوية مجهود على ترابيزة السفرة 

وزي ما قولنا هناك الرجالة بتجتهد علشان يوصلوا لشكل كرشك ده 

وبيتبعوا نظام غذائي خاص بالتسمين 

وإنت ما شاء الله جايالك ع الجاهز .. يعني لا هتتعب ولا تحتار 

احنا بس هنشتغل على التدويرة حبتين 

فلو دماغك واجعاك من موضوع الكرش ده

خد بنصيحتي واشتغل على كرشك شهر ولا اتنين 

وشنطة هدومك وشد على جنوب أثيوبيا .. 

يمكن تكون ملك جمال الكرش .. وتبقى حققت طموحك و ربنا يوفقك

ولو تعرف حد من صحابك عنده نفس الكرش 

إعمله مينشن هنا .. علشان تاخده في ايدك وانت رايح