" طلعت فيلتر ، غرامات مالية وأحكام لمن تستخدم فيلتر للتصوير بتهمة الغش "

 " طلعت فيلتر ، غرامات مالية وأحكام لمن تستخدم فيلتر للتصوير بتهمة الغش "

عمرك نزلت ديت مع واحدة اتعرفت عليها على السوشيال ميديا

وكنت مستغرب .. هي واحدة بالجمال ده هتبصلي على ايه ؟

ولما شوفتها يا حبة عيني اتصدمت .. والدنيا اسودت في وشك 

لأن كل الحلاوة والرقة دي للأسف .. طلعت فيلتر .. 

فاكر قد ايه حسيت بإحباط وخيبة أمل ؟

مش إحباط بس .. لأ .. ده انت حسيت كمان أنه

انضحك عليك و اتعرضت للغش ..

 بالبلدي كده يعني .. خدت على قفاك .. والموضوع كبر معاك لدرجة

إنه خلاك ما تثقش في أي حد بعد كده 

وانت أصلاً مش ناقص تراست ايشوز 

حاسس بيك .. بس ما تقلقش فيه كتير غيرك 

و بما إنه فيه كتير غيرك ، والموضوع منتشر

 فأحب أبشرك انت واللي زيك إن حقكوا راجع راجع … 

لأنه أصدرت النرويج قانون جديد يجبر المؤثرين

والبلوجرز على منصات التواصل الاجتماعي

أنهم يكتبوا على كل صورة متعدلة بالفلتر 

أن تم تعديل الصورة بالفلتر وإلا 

هيتعرضوا للمحاكمة وهيتحكم عليهم بغرامات 

وأحياناً ممكن يكون مصيرهم الحبس 

القانون اتوافق عليه بأغلبية البرلمان النرويجي يوم ٢ / ٥

وبيختص أقصى العقوبات تحديدًا للانفلونسرز

اللي بيعملوا اعلانات للميك آب ومنتجات تكبير الشفايف 

والتخسيس وزيادة العضلات .. 

وحددوا لده ثلاث مصطلحات رئيسية 

الشفاه الضخمة ، الخصر النحيف ، العضلات المبالغ فيها 

يعني الموضوع طايل الشباب كمان .. و كله هيتربى 

وسبب قرار زي ده انهم لاحظوا عدد وفيات كبير 

بيحصل بسبب فقدان الشهية ، بسبب الإحباط 

اللي بيتعرضله متابعين البلوجرز دول 

لأنهم مش قادرين يوصلوا لنفس الشكل اللي بيظهر بيه

الانفلونسر اللي هما بيتابعوه .. وهو فلتر أساسًا 

كمان شددوا الغرامات على البنات أكتر 

بسبب خيبة الأمل اللي بيتعرضله الشباب اللي بيقعوا في حبهم 

وبيتفاجئوا بعد أول مقابلة إن كل ده كان فيلتر 

وعرفوا ده إنه حالة من حالات الغش التجاري 

والنرويج مش أول دولة تاخد قرار زي ده

بالعكس سبقها في كده فرنسا والمملكة المتحدة .. بقرارات مشابهة 

وكان أغربهم قانون اصدرته فرنسا سنة ٢٠١٧ 

بضرورة معاملة الصور اللي متعدلة بفلتر 

نفس معاملة علبة السجاير .. يعني زي ما هو لازم 

يتكتب على علب السجاير إنها بتسبب الوفاة 

فلازم يتكتب على الصور اللي متعدلة بفلتر 

إنها ملعوب فيها .. ومش ده الشكل الحقيقي 

وإلا صاحبة الصورة هتتعرض لغرامات 

وهتتعامل معاملة مجرمي الغش التجاري 

القانون اتقابل من المجتمع النرويجي باستحسان 

وأكنهم ما صدقوا يا عيني ، حد ينجدهم 

من كمية الفلاتر اللي منطورة في كل حتة 

وكمان القانون ده هيبدأ قريب تعميمه 

في الاتحاد الأوروبي بالكامل ، وبتدرس تنفيذه كل دولة على حدة 

يعني مش بعيد بعد كام سنة 

وبعد ما ينتشر في الدول دي ويتعمم 

تلاقيه اتطبق هنا في مصر .. ونلاقي 

الزنازين مليانة بقى من نوعية البنات دي .. 

اللي جاية في تكبير شفايف واللي جاية في فلتر تنعيم بشرة 

واللي محبوسة بسبب انها ٩٠ كيلو بس مش مقتنعة ، وهكذا 

ولما تسألهم انتوا محبوسين في ايه .. يقولوا فيلتر 

أهم حاجة قبل ما قانون زي ده يتطبق 

لازم تتقبلوا نفسكوا زي ما انتوا .. 

وما تصدقوش كل اللي تشوفوه بعينيكوا 

لأن مفيش أمان .. وكله للأسف انضرب