أنواع زباين القهوة !

مساء الخير على كل حد بيدور على الضحكة 

في وقت الفرح بقى نادر 

مساء الخير على كل متابعينا ، وعلى كل اللي لسه ما عملش فولو لينا 

هناخدكوا معانا لدقايق هيعيشوا في بالكوا لساعات طويلة 

في ركن بعيد لوحدينا .. بعيد عن كل النكد والقلق المرطرط حوالينا 

بدون حزق وبدون حرق .. استعدوا لجرعة مكثفة من الضحك ، 

ما يقدرش عليها إلا كل صاحب قلب من حديد

مرضى القلب يمتنعون .. لا تخافوا .. ولكن إحذروا ..

إحذروا من اللي بيهزروا .. 

أهلاً بيكوا مرة تانية في مدونتكم ، وموضوع مقالنا النهارده

بيشغل فئة كبيرة جدًا من الناس ، لأنه مرتبط بمكان 

كلنا عدينا عليه يا زباين فيه ، يا اما اشتغلنا فيه 

يا إما الموضوع كبر معانا وعملناه مشروع 

مكان بنلاقي فيه راحتنا ، مكان اتعودنا عليه 

واتعود علينا .. وحفظناه وحبيناه ، مكان بيقبلنا على وضعنا

وعلى اللي في جيوبنا .. سواء قليل أو كتير 

بنلاقي لينا مكان جواه … مملكة الرجال ، لعند وقت قريب 

بديل للطبيب النفسي وجلسات الثيرابي .. 

مكان تبقى نازل من بيتك متخانق مع مراتك يرجعك فرفوش

تبقى نازل تقعد تعمل مصلحة ولا شغلانة يستقبلك أحسن إستقبال

تبقى نازل في مشكلة وتقعد قاعدة عرب .. تلاقي فيه ألف مين يدلك 

حلقتنا النهارده عن جنة الرجالة في الأرض 

أحلى وأمتع مكان تقدر تنجز عليه كل حاجة في الدنيا 

مكان شهد انتصارات المنتخب والأهلي والزمالك وليفربول

وتلاقي كل اللي فيه في الأوقات دي بيحضنوا بعض 

وهما ولا حد منهم بيعرف التاني 

مكان شهد على خيبات أمل كتير وكور في العارضة 

وضربات جزاء وانفرادات ضايعة 

وبتلاقي كل اللي فيه بيواسوا بعض 

وهما برضه محدش منهم بيعرف التاني 

مقالنا النهارده عن القهوة .. و زباين القهوة .. 

وزباين القهوة بينقسموا لأنواع كتير 

احنا في حلقتنا النهارده هنختصرهم في كذا نوع 

وهنبدأ بالزباين من النوع الأول .. 

النوع الأول : صاحب المجال 

وده الزبون اللي تلاقيه كل يوم داخل عليك بحد جديد

وأكنه بيعمل دعاية للمكان ، أو شغال في التسويق الشبكي

معتقد إنه كل ما يجيب زبون يمين زبون شمال 

هياخد كوباية شاي مثلاً

الزبون ده معروف بصوته العالي .. 

لأنه أول ما يدخل بتلاقيه بيسلم على كل حد في القهوة 

ومش ملتزم أبدًا بالمثل اللي بيقول كتر السلام بيقل المعرفة 

هو بالنسبة له كتر السلام ده معناه

 إنه يعرف كل حد بيقعد في المكان 

وإن ده مجاله ومكانه ومنطقته اللي أول ما بينزلها 

بينضربله نار وتعظيم سلام

فتلاقيه بيسلم عليك واكنه يعرفك من وانت عيل صغير 

ولو الكلام خدكوا يبدأ يقنعك بشتى الطرق

إنه يعرفك ويعرف عيلتك نفر نفر 

حتى لو انت من بوركينا فاسو .. لا هو أكيد يعرفك من وانت صغير

وطبعاً هو عمره ما كان صغير ، في الوقت اللي كنت فيه انت عيل صغير

هو كان كبير .. هو أصلاً اتولد كبير قد الدنيا

.. وتلاقيه محسس اللي معاه انه اهم حد هنا 

ويبدأ يستعرض مواهبه ، ويغمز للقهوجي ويقوله القهوة بتاعتي 

وبيدخل القهوجي في تساؤل ، يا ترى يقصد إيه بالقهوة بتاعتي ؟

هي مظبوطة ولا سادة ولا زيادة ..؟ 

يكونش قصده إن القهوة نفسها كمكان بتاعته .. 

يعني هو اللي هيحاسبني آخر الوردية ؟

هما احيانا بيشوفوه صحيح.. واحيانا بيطلب حاجه غير الشاي صحيح

لكن في الأساس محدش يعرفه هو بالنسبة للقهوجي مجرد 

واحد شاي ، ومياه م الحنفية .. بالنسبة للقهوة مجرد خمسة جنيه

النوع ده موجود في كل قهوة وبيكون من كتر ما الناس متجاهلاه

عايز يحسس اللي داخل معاه انه العكس مش اكتر 

وتلاقيه من اول باب القهوة لعند ما يقعد رافع ايده في السما 

وبيسلم بعشم ع الناس وطبعاً الناس بتبقى عارفة وحافظة النوع ده كويس

فبتتعاطف معاه وبتديله احترامه ومجاله .. 

بس أول ما بيمشي بيبدأوا يسألو بعض سؤال واحد 

مين ده ؟ .. ده صاحب المجال 

النوع الثاني : الفييس 

النوع ده واحد من تلاتة ، يا إما نصاب وعايز يقنع اللي معاه إن جيبه دفيان

يا إما سارق ، يا إما وارث .. أصله ما تقنعنيش 

إنك كزبون تقدر تقعد ست ساعات متواصلين بخمسة جنيه 

حق كوباية الشاي ، وفي نفس الوقت 

تفرتكلك بتاع عشرين تلاتين جنيه مشاريب 

بأي منطق يعني ؟ فده حاجة من التلاتة اللي قولناهم مفيش كلام

والنوع ده من الزباين محبوب بالنسبة لكل صاحب قهوة

الزبون ده اللي العمال كلها بتقفله على ترابيزته 

الزبون ده بيتعينله عامل مخصوص يغيرله الطفاية بعد كل سجارة 

علشان ده الإنسان الوحيد في الدنيا كلها

اللي بيدي تيبس في قهوة .. أصلاً مش منطقية 

تيبس وقهوة .. المفروض يتسمى بقشيش 

الزبون ده اللي بينضربله تعظيم سلام 

اللي بيطلب قزازة مياه قبل المشروب ، لأ وبيفتحها 

الزبون ده عدو الشاي ، وأقل حاجة بيطلبها سحلب فواكه

مشكلة النوع ده من الزباين حاجة واحدة بس 

إن النوع ده مش موجود أساساً إلا في خيال صاحب القهوة بس 

الزبون ده مش موجود لسه بين البشر 

ولو حصل خطأ ولا طفرة چينية واتولد زبون زي ده 

فهتلاقي صورته متعلقة في القهوة لأنه أكيد صاحب القهوة نفسها 

تعالى ندور كده في صفاته .. أولاً محبوب من صاحب القهوة

بيحب نفسه عادي .. نوع من النرجسية

بينضربله تعظيم سلام .. طبيعي نوع من التطبيل 

 بيفتح قزازة المياه .. 

ده قلبه جامد ، بيشرب حاجات غير الشاي 

طبيعي بيعمل تيست على شغل الصنايعية 

الوحيد اللي بيطلع فلوس من جيبه لجيب القهوجي عدل 

النوع ده من الزباين بيقعد على احسن كرسي وفي أحسن مكان 

قدام الشاشة ولو القهوة كلها بتتفرج على برشلونة وريال مدريد

هو ممكن يقلب يبص على حرس الحدود وطلائع الجيش عادي

الزبون ده اللي بيتغير علشانه المنيو كل فترة 

لانه بيحب يجرب كل المشاريب 

وممكن تلاقيله مشروبه الخاص اللي مسمينه على إسمه 

وكوبايته أو ماجه الخاص وشيشته الخاصة

وفوطته الخاصة وسريره منصوب جوه 

لو حب يريح شوية بين مشروب والتاني 

الزبون الفييس ممكن يحل مشاكل اقتصادية كتير جدًا 

وهو مش واخد باله .. مشكلة مثلاً زي غلاء الأسعار 

لأنه من تمن مشروب واحد .. ممكن يحل مفاوضات 

على ترابيزة جنبه بين خمس رجاله بيتقاسموا حق كوبايتين الشاي

وكمان ممكن يحل مشكلة التضخم .. لأنه من البقشيش اللي هيسيبه 

يقدر القهوجي يسد العجز اللي عنده في الدرج 

الزبون ده حلم .. حلم في ليلة صيف 

حلم بيراود كل صاحب قهوة .. حلم بيقعد يستناه لسنين 

وللأسف ما بيجيش .. 

 

النوع الثالث : أبو كوباية 

وعلى عكس ندرة وجود نوع الزبون الفييس 

النوع ده الأكثر شيوعاً بين الزباين ، ومرطرط في السوق 

وعلى عكس كل اللي قولناه في الفقرة اللي فاتت 

الزبون ده زبون الشاي ، الشاي التقيل السكر زيادة قوي

ويطلق عليه خبراء المجال أبو كوباية 

وده من غير كلام كتير اسمه بيدل على صفته 

أبو كوباية ، فمن اسمه كده نعرف على طول 

مدى عداوته مع كل مشروب خلقه ربنا

ما عدا الشاي .. وده مش راجع لبخله لا سمح الله 

ولا راجع حتى لظروفه المادية ، بالعكس ممكن يبقى مرتاح ماديًا جدًا

بس الزبون اللي من النوع ده اختصر القهوة كلها وموضوعها

في كوباية الشاي ، اللي ممكن يشربها في بيتهم 

ويريح دماغه من المشوار ويوفر الخمسة جنيه 

بس ليه ؟ هو يجي معزز مكرم ، يقعد على ترابيزة 

ويطلب شاي تقيل سكر بره ، ويدلق فيه السكرية كلها

ويقعد يفتح واي فاي يخلص الباقة وبعد ما تخلص 

يقعد يتفرج على أفلام على قناة حبيشة 

كل ده بالخمسة جنيه ، الزبون ده تقدر تعرفه من عينيه 

فتلاقيه دايمًا مرهق ومهبط ، ضربات قلبه سريعة

حاسس بصداع أو دوخة ، ولو ايدك لمست إيده 

تلاقيها ساقعة متلجة .. لأن دي أعراض نقص الحديد في الدم

من كتر شرب الشاي حضرتك 

الزبون ده ما ينفعش تبقى قهوجي ومتمرس في مهنتك 

وتروح كده بكل بجاحة فاتح التلاجة وواخد قزازة ماية حاططها قدامه على الترابيزة

لأن الحركة دي ممكن تبقى أخر ذكرى ليك في القهوة

لأنه ممكن يعمل مكائد للعامل اللي ينزله قزازة مياه

ويفضل ينخور وراه لعند ما صاحب القهوة يقطع عيشه

دي حركة ممكن تتسبب في قاعدتك في البيت فترة طويلة يا ولداه

وهتفضل علامة سودا في السي ڤي بتاعك كقهوجي

 فاحذر منه وتعامل معاه بحذر

والنوع ده من الزباين بياخد احقر كرسي وما بيتكلمش 

وبياخد اوحش مكان وما بينطقش 

واللي بيلاقيهم بيتفرجوا عليه بيشاركهم فيه وخلاص 

والزبون ده زي ما قولتا ممكن ما يكونش بخيل 

ممكن يكون بسيط وخياراته محدودة.. 

شاي.. وكوباية ماية ساقعة واتعشت 

النوع الرابع : حلال المشاكل 

نيجي بقى للنوع الرابع ، النوع اللي ما تعرفلوش مكان محدد في القهوة 

هو بيقعد في كل ركن فيه نوش .. بيعرف كل حدوتة دايرة

وعنده كمية داتا رهيبة ، وسجل كامل بكل الخناقات والخلافات 

اللي مرت على المنطقة من قاعدته في القهوة 

حلال المشاكل .. وده واحد وهب نفسه للمشورة

وهب وقته وطاقته للناس ومشاكلهم 

الزبون ده فضولي.. وفضوله لا مؤاخذة واكله..

مش مريحه ، تلاقيه كل يوم له مكان 

مرة جمب دول بيعرف مشاكلهم وبيديهم حلول

ومرة جمب التانيين دول يعرفهم مشاكل اللي قبلهم 

وينقل من هنا لهنا ومع كل نقلة ينقل معاه الأخبار والكلام 

فتنة ماشية على الأرض ..

والزبون ده ما بيفرقش بين دكتور ولا ميكانيكي 

تلاقيه من كتر ما سمع للناس بيعرف عن كل حاجة حاجة 

حاجة تسمحله إنه يرد عليك ويتجاوب معاك 

ويحسسك إنه فاهم .. وبسبب العادة دي بتلاقيه دايمًا مبالغ فيه 

وفي أرقامه ، فتلاقيه سافر كل الدول وعنده خبرة عنها 

وتلاقيه اشتغل كل المهن ويفهم فيها 

وهو ما خرجش من القهوة من ساعة زلزال ٩٢ 

هو بس كل اللي حصل إنه اكتسب معلومات كتير جدًا 

من كل صنف ولون .. معلومات تخليك تقول عليه ده متخصص

يعني عندك مغص روحله هيديك وصفة .. 

عربيتك فيها عطل روحله هيديك وصفة 

عندك مشكلة في الإقامة روحله هيديك وصفة 

فيه مشاكل بينك وبين مراتك روحله هيطلقك منها ويشوفلك عروسة وهكذا 

حل لكل مشكلة وقاعدته كلها فايدة   

الزبون ده لوسألته انت هنا ليه تلاقيه عنده مشاكل الدنيا 

ومش هتلاقي عنده اي حلول لنفسه 

لأنه ما اتعودش حد يسأله .. هو مش سايب فرصة لحد

يتكلم في الدنيا غيره ، الزبون ده بيتكلم كل اللغات واللهجات

وبيحلل ماتشات أحسن من ناس كتير من كتر ما ورد عليه

احنا مابنقولش ان الزبون ده هتاش او بيكدب 

لا بالعكس هو صحيح عنده كل الحلول من الخبرة 

من كتر ما سمع لده ولده وادى ودنه لده ولده 

ولو سألته في يوم عن اي حد في محيط القاهرة والجيزة 

هيقولك لون لباسه ايه .. لانه اكيد قابله قبل كده في قهوة

القهوة مكان بيمر عليه كل الناس ، وبتحتوي كل الناس 

فيه منهم اللي محتاج يقعد ساكت ، ومنهم اللي محتاج يفضفض 

ومنهم اللي عنده استعداد يسمع لا ويحل معاك كمان 

القهوة وزباينها موضوع يستاهل ١٠٠ حلقة ،

لكن احنا اختصرناه في حلقة .. 

ياريت لو مريت بتجربة شبه التجارب اللي اتكلمنا عليها في مقالنا

تقولنا في الكومنتات .. ولو تعرف حد من زباين القهوة 

شبه الشخصيات اللي ذكرناها تمنشنه .. 

وما تنساش تشترك في المدونة

علشان تبقى زبوننا .. ويوصلك كل جديد